• hurrengo geltokia,  teknologia berriak

    Euskal Herria 2.0 | abiapuntu bat

    Euskal Herria 2.0Jardunaldiak bi egunetan burutu ditugu. Zenbait hilabete pasa dira hasierako asmoaren berri Donostiako itsasertzean izan nuenetik. Eta egia esan, ez nuke lortu duguna hasiera horretan horrela imajinatuko. Baina olatuaren gainean gaude orain.

    Nora heldu nahi genuen? Zer bilatzen zuen EH 2.0 egitasmo honek? Nik uste, iragan ostegunean Donostiako Artelekun batu ginenon artean sortu zen giroak ondo islatzen duela gure orduko asmoa. Abiapuntu bat daukagu, aurrerantzean Euskal Herria eta Internet batuago ikusteko, gauzatzeko, plazaratzeko. Herrigintzan, euskagintzan, edukietan, software librearen inguruan, Interneten, komunikabideetan aritzen garen jendea batu gara bi egunez. Eta oinarri bat jarri dugu, eztabaidarako, gogoetarako, ekimenarako, auzolanerako. Eta alde horretatik pozik egoteko motiboak dauzkagu.

    Euskal Herriko domeinuaren beharra azaleratu dute EH 2.0 jardunaldiek irakurtzen genuen Berrian, jardunaldiaren biharamunean. Eta bai, horra ere heldu behar ginen. Modu naturalean, eztabaida piztu da. Vicent Partal gomitatzeak, .cat adibidea gertutik ezagutzeak, gurean gaiarekiko interesa piztu du. Eta besteak beste ondorio horretara heldu gara. Antzeko kontuak adierazi zituzten Josu Landak eta Josu Amezagak. Edukiak, nortasuna, kultur ondarearen bahiketa, lizentziak, ikurrak…. izan zituzten hizpide bi hitzaldi ezin argigarriagoetan –Info 7 irratiak zintzilikatu ditu sarean – eta ostean Partalek ekitaldia biribildu zuen. Argi eta garbi.

    Orain, Partalen bloga irakurtzen dugunean, oraindik flipatuta jarraitzen dugu. Tipo argia, adibideak ematen azkarra, umorea galdu barik, eta bere nortasunari uko egin barik, besteona begirunez ikusten duena. Komunikabide berrien eremuan aitzandari Europa mailan, eta euskaldunon lagun. Abiapuntu honetan bidaide izango dugu. Katalanak eredu zaizkigu Interneten, hizkuntzan, kulturan, digitalizazioaren aroan. Jarraitu egin behar ditugu, ezagutu, ulertu, begirunez beraiengandik ikasiz. Eta horretara goaz.

    Ondorioak tag edo etiketetan bildu genituen, eta pantailaratu. Hemen ikusi daitezke. Gutako edonork badu zer egin nahikoa aurrerantzean: edukiak sortu, argitaratu; euskara eta gure kultura, gure nortasuna sarean erakutsi eta bultzatu; ikur berriak asmatu; software librea lokalizatu, sozializatu eta erabili. Asmo on guzti hauek gauzatzeko. Euskal Herria Interneten izan dadin. Eta Internet Euskal Herrian. Areago, gehiago. Abiapuntua.

    EH 2.0 ondorioak

  • info 7,  teknologia berriak

    Buztan luzearen teoria

    info 7 irratianAurreko batean, duela aste pare bat edo, Chris Anderson izan genuen Bilbon.
    Wired aldizkariko erredaktore burua da Anderson, tipo ezaguna mundu osoan. Interneteko kontuetan ere aditua da,
    komunikazio eta marketing_ari buruz asko daki, ekonomilaria da ikasketez, eta mundu mailako begirada dauka. Wired aldizkaria, paperezkoa da berez, eta mundu osoan banatzen den teknologia berriei buruzko aldizkari espezializatua da. Interneten ere irakur dezakegu, egin klik.

    The long tail

    Andersonek, teoria berria plazaratu du ez oso aspaldi. the long tail edo buztan luzearen teoria. Bertan dio, arrakastatik aparte ere… badirela jendearen kontsumorako interesgarriak diren hamaika produktu ere. Baina hala ere, super kate eta merkatal gune handienek, arrakastatsuak baino ez dituzte eskaintzen beraien apal eta dendetan. Arrakastak bultzatuta noski, salduenen artean ageri dira salduenak. Baina duela denbora bat baino txikiagoa da salmenta arrakasta hori… orain, Interneteko denda espezializatuetan… arrakasta lortzen ari direnak, gitxi -edo gitxiago- saltzen diren produktuak baitira…

    Eta horrela, buztan luzearen teorian, gutxiago saltzen diren produktuen -pelikulak, kantu edo diskoak, liburu bitixiak…. gutiziak azken finean- zerrenda amaigabea lortzen da, buztan luze bat.

    Argudio asko, grafiko ugari eskaini zituen Bilboko agerraldian bere teoria hau plazarateko. Interneten eraginaz berba egin zuen, blogak direla, youtubeko bideoak direla… eta guzti horrek eragina dauka kontsumoan ere. Telebista asko ikusten da gaur egun, oraindik, baina asko jeitsi da telesail arrakastatsu bakoitzaren kontsumoa… jada ez dago izar nagusirik, eta izatekotan Interneteko bideoak dira.

    Crhis Anderson entzun genuen Bilbon, eta kezka ugari planteatzeko aukera izan zen. Eta oraindik kezka hoiek buruan buletaka dauzkagu. Adibidez, gurea bezalako kultura txiki bat, non kokatuko genuke buztan luze horretan? Ba al daukagu irauterik euskara bezalako hizkuntza batekin globalizazioaren aurrean?
    Gure liburuak, diskoak, kultur produktuak orohar, ze bide hartu beharko lukete Interneten panorama honetan?

    Entzuteko:
    [audio:http://www.info7.com/entzun/deskargatu.php?fitxaizena=http://www.euskalherria.com/mp3/kolaborazioak/talaiatik/20060926_eus_526.mp3&sekzioa=talaiatik&id=526]

  • teknologia berriak

    “Hemen inork ez du Internet seriotan hartzen”

    Orue.com edo Deusto.com bisitatzen badituzu, bere eremuan sartuko zara. Interneteko itsasoetan ari da, ontzigintzarako lan egiten duen arren. Hemen baino ezagunagoa da munduko hamaika bazterretan. Baina Interneti buruz berba egiteko elkartu gara Eduardo Perez Oruerekin. Kezkati agertu da.

    Interneten oso lagun ezaguna zara. Noiz eta nola hasi zinen sarean murgiltzen?
    1984 urtean nire anaia Karmelo AEBtan zegoen ikasten. Handik bueltan, zeukan diru guztia amaitu ostean, etxekoentzat opari bakarra ekartzea erabaki zuen, eta han ofertan zegoen Commodore 64 bat ekarri zigun. Orduan, zeharo zaletu nintzen. Baina izugarriena Espainiako BBS -Internet hedatu aurreko sareak- batzuetara konektatzen hasi nintzenean etorri zen. Orduan, SPRIk diruz lagundutako 1.200 baudiotako modema neukan. Internet geroago ezagutu nuen, 1995ean, Belgikan bizi nintzela.

    Ez da denbora asko, Deusto.com dominioak buruhausteren bat eman dizula ezta?
    Bai, Planeta argitaletxeak nire kontrako helegitea aurkeztu zuen Jabego Intelektualaren Nazioarteko Erakundean, Deusto.com dominioa beraiei zegokiela argudiatuta.

    Zertan geratu zen afera hura?
    Irabazi egin nuen. Eta eskerrak, dominioa duela 10 urte erregistratu nuen, Planeta argitaletxeak Deusto marka oraindik erregistratu barik zeukanean. Nik Deusto.com erosi nuenean, Planetak oraindik ez zeukan webgunerik ere. Dena nire alde nuen, baina denbora eta dirua horretan eman behar izan nituen.

    Orain argitaletxe elektronikoa da deusto.com
    Jendeak argitaratu gura duen guztia argitaratzeko aukera eskaintzen dugu. Liburu irekia da. Sartu, zure orria sortzen duzu eta idazten hasten zara. Hori da guztia, erraza eta doan.

    Sarean zuk egindako bideoak ikusi ohi ditugu, Hombrelobo.com gunea ere badaukazu, baina zertan egiten duzu lan?
    Berez, indabak ordaintzeko dirua Danimarkako ontzigintza enpresa batetik jasotzen dut. Nire lana, gas likuatuak garraiatzen dituzten gure itsasontzientzat merkatu berriak aurkitzea da. Internet ordea, pasioa da niretzat lana baino gehiago.

    Duela gutxi eyeOS esperientzia ezagutu genuen, argituiguzu zertan den Interneteko proiektu hori.
    EyeOS sistema operatibo birtual bat da, ordenadore bateko lan guztiak egiteko, ezer behar ez izatea ahalbidetzen du, soilik Interneteko konexioa. Berdin lan egin dezakezu bulegotik, etxetik edo ziberkafe batetik. Zure fitxategi guztiak izango dituzu, testu prozesadoreak, agenda… http://eyeos.info gunean doako kontuak banatzen ditugu, frogatu gura duen guztiak aukera izan dezan. Dagoeneko mundu osoko 66.000 lagunek egin dute.

    Zelan ezagutu zenituen hiru gazte horiek?
    Sarean. Beraien proiektua atsegin nuen, eta frogatu egin nuen. Idatzi egin nien, ingelesez idatzi ere, ez nuelako somatu ere egin Kataluniakoak izan zitezkeenik. Beraiek nire zerbitzaria eskatu zidaten, froga batzuk egin eta txateatzen hasi ginen. Handik egun pare batera, 18 urteko mutikoak zirela ikusita, autoa hartu eta Bartzelonara joan nintzaien bisitan. Jenioak iruditu zitzaizkidan, gauza harrigarriak egin dezaketen mutilak zirela uste bainuen.

    Proiektuak oso itxura ona dauka, zeintzuk izango dira hurrengo urratsak?
    Garapena eta garapena. Proiekturako programatzaile gehiago lortu eta, ahal dela, dirua egin.

    Eta gure inguruan, zelan ikusten duzu Internet bera?
    Txarto, txarto, txarto. Inork ez du horretan sinesten, enpresariek tentelkeria delakoan daude. Hemen inork ez du aintzakotzat hartzen. Pasa den astean Chris Andersonen hitzaldian egon nintzen Euskaldunan; Wired aldizkariko erredaktore burua da Anderson, Buztan luzearen teoria -The long tail- plazaratu duena. Betiko bostak batu ginen han, 40 bat ikasle,eta ez zegoen beste inor. Korbatarekin lau lagun. Eta arratsaldeko 19:00etan zen gainera! Eta tipoa, Inteneti buruz munduan dagoen argienetakoa da gainera. Eta jendeak ez dio garrantziarik ematen, antza denez ikasi baino, hobe da bekarioak kontratatu eta zapaltzea.

    Euskarazko Interneta jarraitzen duzu?
    Egia esan, ez. Sarritan gainera, gehiago jarraitzen dut ingelesez sortzen dena, gaztelaniazkoa baino. Ez dugu ahaztu behar, Internet berez globala dela, eta gustatu ala ez, gauza gehienak ingelesez sortzen dira. Nik, gaur gaurkoz, proiektu berri bat sortu beharko banu, ingelesez egingo nuke. Eta gero, beste hizkuntzetara egokituko nuke. Zolow.com proiektuarekin horrela egin genuen.

    Eta zer gehiago egin beharko genuke?
    Hasteko, guztion lana dela aintzat hartu beharko genuke, eta ez soilik gobernuarena. Denok daukagu ikasi beharra, lagundu eta lan egin. Azken finean, Internet hori bera da, gogor eta gogoz lan egitea. Eta euskaldunok langile fama izan dugu beti. Baina azkenaldian, badirudi beste norbaitek arazoak noiz konpondu zain gaudela. Baina hemen, argi eta garbi lan egin beharra dago. Eta benetan, zinez, gure gazteak lagundu egin behar ditugu. Ez beka miserable horiekin, baizik eta ideia onak lagunduz, benetako arrisku kapitalarekin, arriskatuko duena. Eta noski, ingelesa ikasi beharko dugu.

    Hara eta hona

    Bidaia asko eginda zaude. Zer ekarriko zenuke Euskal Herrira, hemen erabiltzeko edo egokitzeko?
    Bidaia asko eginda nago, bai, baina gainera 17 urtez kanpoan bizi izan naiz, Tarragonan, Begikan, Argentinan, Estatu Batuetan eta Singapurren. Nire ustez guri falta zaigu bidaia gehiago egitea eta gainerako kulturen alderdirik onenak kopiatzea. Leku guztietan ikas daiteke zer edo zer. Singapurren, berbarako, SMS bidez taxi bat eska zenezake, zagozen lekuan zagozela, sistemak badakielako zu non zagozen. Edo Iranen, urteak direlako han semaforoek atzera-kontua daukatela. Zer esanik ez, Danimarka, han amatasunari laguntza emateko sistema ikaragarri ona delako. Kanpora joan behar da baina ez harrotasuna erakustera, ikastera baino. Zer ikasi asko daukagu eta.

    Esaiguzu, nondik ibiliko zinateke paseoan?
    Iguazúko ur jauzien ingurutik, deabruaren atakaraino, Argentinan. Edo Tokioko Harajuku auzotik.

    Eta hiri bat aukeratu beharko bazenu?
    Buenos Aires, Singapur, Bartzelona, Oslo, Tokio, Río de Janeiro, … Bakarra, inoiz ez.

  • hurrengo geltokia

    Luis Goia joan zaigu

    Luis GoiaZinema produktorea. Euskararen laguna. Euskaldunon EGUNKARIAko kide arriskutsua, atxilotua eta Madrilera eramana. Orduan, Madriletik bueltan ikusi genuen Andoainen. Neke aurpegia, ondo orraztu bako uleak.
    Badakit, hainbat ekoiztetxe antolatu zituela. Euskarazko film batzuk ere atera ziren aurrera, bera produktore zela. Ke arteko egunak, Off-eko maitasuna nik gogoan ditudanak.

    Nik, askatu ondorengo Andoaingo bere irudia gordetzen nuen. Eta Pablo Maloren filme arrakastatsuan ere produktore lanetan ibilia zela ikusi nuen. Madrilen ez zuten gogoko agian, baina lanean jarraitu zuen.
    Egunero hartan egindako elkarrizketa.

    Bilbon azkenekoz
    Aurreko astean berriz ikusi nuen Bilbon. Azkenengoz. Hamaika telebistaren aurkezpenean zen. Andoaingo aurpegi berarekin ikusi nuen. Beharbada pozik egongo zen. Beharbada triste. Inork ez zion ezer galdetu. Egunkarietako kroniketan ez zen bere izenik agertu. Produktoreak, bigarren planoan egoten dira, batzuetan hori ere ez. Baina beharrezko ditugu horrelakoak, egin, antolatu, kudeatu eta ekoiztuko dutenak. Kulturan. Herrian.

    Agur Luis, neguko eguzki hotz hori.

    Eguneraketa>

    BERRIA

    GARA

    URTZI URKIZUREN BLOGA 

  • agit/prop,  info 7,  teknologia berriak

    Info 7 irratia FMtik entzuten da

    Badira hilabete batzuk Info 7 irratia sortu zenetik. Internetetik abiatu zuen bere martxa. On_line irrati bezala ezagutu genuen, Urruñako estudioetatik Euskal Herri osora -mundu osora- hedatu zituen bere mezuak. Orain, uhinen bidez ere entzuten da Kantauri itsasoaren magaletan. Lapurdi eta Gipuzkoan (FM 99.2) eta Bizkaia aldean (FM 102.3) . RDS sistemarekin, autoan edo irrati berriagotean ikusiko duzu INFO 7 mezua, eta grabatzeko aukera izango duzu.

    INFO 7 autoko irratian

    Gipuzkoa eta Lapurdi aldean, bada denboratxo bat entzuten ahal dela. Kalitate onarekin entzuten da Zarautzetik aurrera A8 autopistako bidean. Zarautzen 99.3an bertako Arraio irrati librearen uhinak oso ondo hartzen dira. Handik Ipar Euskal Herrirako bidean ordea, 99.2an ederto entzuten dira Info 7ko emankizun eta musika saioak.

    Bizkaiko berri

    Internetetik batera, Koska irratiak (108.0 FM) ematen izan ditu goizeko INFO7ren emanaldi batzuk. Gasteizetik berriz Hala Bedik berdina egiten zuen. Orain, Bizkaian behintzat FMtik entzun ahal izango dugu, egunero 24 orduz. Nik frogatu dut, albistegiak entzun ohi ditut -puntuan euskaraz, terdietan gaztelaniaz eta laurden gutxitan frantsesez…- eta informatiboki, hasi zirenetik asko hobetu dela aipa dezaket.

    Orain baina, nondik eta zelan entzuten den batzen ari naiz. Entzuleen mapa bat osatu gurean.

    Info 7 ondo entzuten diren herriak:

    Deustu
    Larrabetzu
    Lezama
    Zamudio
    Derio
    Zornotza
    Alonsotegi
    Bilbo

    … zerrenda eta mapa osatzen lagunduko didazue? Nondik eta zelan aipatuz. Frogatu FMko zenbaki horretan, eta idatzi.

    Mila esker, aldez aurretik.

  • hurrengo geltokia,  teknologia berriak

    Blogari edo kazetari

    Duela gutxi irakurri diot Eduardo Perez Orueri -tipo interesgarria, ekonomilaria, eyeOS egitasmoan ere ari da, webgune pila baten sortzaile eta garatzaile- honako esaldi hau. Asko gustatu zait. Arrazoi osoa dauka. Euskaraz ere antzera ari gara.:

    Periodistas y bloggers

    15 septiembre 2006

    La diferencia entre un periodista y un blogger es que el blogger no sabe escribir, pero sabe de lo que habla; y el periodista sabe escribir, pero no sabe de lo que habla.

    Así, con una sola frase, he perdido unos cuantos amigos ……


    Kazetariak eta blogariak

    Kazetari baten eta blogari baten arteko ezberdintasuna: blogariak ez daki idazten, baina zertaz ari den badaki; kazetariak idazten dakien arren, ez daki zertaz diharduen.

    Horrela, esaldi bakarrean, hainbat lagun galdu ditut….

    Adibideak lokalizatzen
    Kinka berean ez ote gauden gu, euskaldunok ere. Kazetaritza tradizionala gero eta urrunago sentitzen dut, bizi dut. Eguneroko irakurle naute hemengo egunkari gehienek, kioskoan bi egunkari gutxienez erosten ditut ia egunero, irratiak entzun ohi ditut oraindik, telebista ez dut askorik jasaten… baina Internetetik urruti samar ikusten ditut gremiokoak. Ez direla enteratzen ez dut esango… baina irakurleari ez diotela asko argitzen esatera ausartuko naiz. Behintzat.
    Atzo abiatu ziren Euskal Herria 2.0 jardunaldiak, Artelekun (Donostia). Nire aurrean ikusten nituen kazetariak. Hainbat zeuden. Berriak bi kazetari igorri zituen -kazetari multimedia aldarrikatu zuen alferrik Iban Arantzabalek- edizio digitalerako eta paperezkorako bana. Garak bakarra igorri zuen, bi kronika egin zituena, zein zein baino gehiago gainera!

    Eta hombreloborekin nago… sentitzen dut.

    BERRIA edizio elektroniko jarraitua | paperezko edizioa

    GARA edizio elektroniko jarraitua | paperezko edizioa

    Errua gurea, prentsari dena idatzita ez ematearren. Zuek esango didazue. Blogarion kronikaren zai nago orain. Niri gogoak joan zaizkit. Ez blogari ez kazetari, une honetan Obabako musker gura nuke.

  • hurrengo geltokia

    Hamaika ikusteko jaioak

    hamaika telebista hedatzeko taldea

    Bilbo. Asteartea. 11:30.

    Gran Via. Euskaltelium.

    Aurkezpena. Komunikabideak. Jende ugari.

    Ezohikoa. 6 egitasmo ezberdin bateginda. Euskarazko telebista -lokalak, digitalak- sortzeko egitasmo handiago batean. Hamaika izena aukeratu du talde berriak –Euskaltel, Elkar, Ekhe, Ekt, Bainet, Cmnt– ekimen berrirako.

    Hamaikaren berri jakin nuenean, poztu egin ninduen urrats berri honek. Apostu teknologikoen gainetik, unean uneko komunikabide bat sortu baino, haratago zihoan estrategia bat atzeman niolako ekimenari. Aliatu teknologiko bat -Euskaltel-, kioskoetako prentsa abertzale guztia –Gara, Berria, Deia, Diario de Noticias, Le journal-, euskal kulturako erreferentzia nagusia –Elkar-, eta orain arte telebistan esperientzia handia duen -Bainet- enpresa. Izugarria iruditu zitzaidan orduan, eta gaur nire begien aurrean ikusi dut.

    Euskararen inguruan inoiz sortu den ekimen handiena da duda barik. Euskaraz sortu da, euskara hutsez aurkeztu dute, eta euskarazko proiektuak sortu gura dituzte ikusentzunezkoen alorrean. Orain arte, euskarazko telebistak bi hanka zituen: ETB1 eta herri telebista zenbait. Aukera aniztasuna izateko sortu da talde berri hau, lizentzia berrien aukeran abiatuko dena, eta telebista digitalaren alorrean buru belarri sartu gura duena.

    Eta aurkezpenean ere jende ugari batu da. Horren kronikak, argazkiak batuko dira paperezko egunkarietan. Hizlarien aipamenak ikusi ditut ETBko albistegietan. Euskara hutsez, bi kateetan. Prentsa eta komunikabide munduko jendea, unibertsitateko irakasleak, politikariak, blogari zenbait, kulturgile batzuk eta bakoitzak gonbidatu dituenak egon dira. Normalean baino -ni egoten naizenetakoak behintzat- jende gehiago. Aniztasun zabalagoa.

    Euskal Herrian egiteko ditugu proiektuen artean, bide hau interesgarria izan daiteke. Adostasuna bilatu, proiektu erakargarriak mahai gainera ekarri eta etorkizuneko apustuak egin behar dira, baina orain. Bide zailenak orduan hasiko dira. Baina bidea egitea da afera. Bideak erakutsiko digu tamaina, luzera, erronkaren zaila.

    Hamaika ikusteko jaioak benetan; izan be sei lagun mahai baten gainean, bostekoa emanez, zazpi Euskal Herriei begira bat eginda.

    hamaika eta bostekoa

    Eguneraketa:

    | Sareko Argia hari@-k beti bezain ondo egin du prentsa bilduma.
      | Erabili.com gunean, Hamaika telebistakoak zabaldutakoa argitaratu dute.

      | zabaldu.com beti bezain adi eta partehartzaile.

  • agit/prop

    non zaudete demokratok?

    Iñaki gose greban

    Desobedientzia zibila aldarrikatu baina inoiz pratikatu ez dutenentzako oharra.

    Borroka armatua beharrezkoa ez dela esaten dutenentzako abisua.

    Giza eskubide guztiak defendatzen dituztenei jakinarazpena.

    Demokrazian bizi garela uste dutenei adierazpena.

    Presoen eskubideak defendatzeko aldarria.

    Euskaldun abertzaleentzat gaztigua.

    Kazetarientzat aholkua.

    Hilabete pasa egin du euskaldun batek gose greban, prentsan bi artikulu idazteagatik gubidagabe bizitza osoko kartzelara kondenatu dutela salatzeko.

    Nik ere, hitza maite dudan lez, adierazpen askatasun osoaren alde nagoen lez, demokraziarik egon badagoela -baina non- pentsatu gura dudan lez, presoen eskubideen alde nagoenlez, beraien izaera politikoa onartzen dudan lez eta Iñakiren askatasuna aldarrikatzen dudalako… blog honetan, egunero Iñakiren argazkia jarriko dut, bere eskubideak bermatuak izan arte. Dagozkionak. Ez bat gehiago, ez bat gutxiago.

    Bitartean, heldu eskutik eta aurrera bolie.