-
Urtea amaitzeko modu ugari dago
- Afariaren bueltan amaituko dugu gutako askok, erlojuari so beharbada.
- Gogoan dut, urte askotan Tas Tas irrati librean amaitzen genuela, Basauriko presoei zorion agurrak, programa berezi bat burutzen. Dispertsio basatiak hori ere eragozten digu, egun.
- Petardo, tiro hots eta su artean amaitzen duenik ere badago, gurean franko.
- Bilboko gazte batzuek, okupatu berri duten etxe eta eraikinean egingo dute.
- Kalean ere egongo denik izango da, urte amaiera eta barria zelan batzen diren, egunero bezala ikusten.
- Ihesean daudenek, etxera noiz itzuliko pentsatzen egongo dira. Ordu aldaketak ordu aldaketa, berbak noiz trukatuko pentsatzen, idazten, amesten.
- Lo emango dio batek baino gehiagok agurra urteari.
Eta urteak joan urteak etorri, hemen jarraitzen dugun bitartean, pozik egon behar. Ez da gutxiagorako. Beherapenak ei datoz.
-
Giro ona herrian egunotan
Egunero badago zeozer. Gaztetxeak beti gauza asko antolatu izan ditu gabonetan Larrabetzun. Kultur ekitaldiez gain, ostantzekoak be lekua izaten dute holakoetan, eta azkena kirolarien ekimena izan da. Herriko kirolariak batu, eta Euskal selekzioen aldeko ekimena burutu dute. ESAITen deialdiarekin bat egin, eta abenduaren 29rako Bilbora deitu dituzte herritarrak. Nazio bat selekzio bat deialdia bultzatu dute herritik bertatik.
Futbolari (mutil eta neska), korrikalari, aizkolari, pilotari edo txirrindulariak batu dira.
-
lau ertz eta saio borobila
Urteroko bertso saioa izaten da abenduaren 25ekoa. 1994an hasi ginen antolatzen. Ari naizela! Ari naizela! ekitaldietatik azkena izan zen ordukoa. 1994ko Euskal Herriko finalistak izan genituen orduan, Andoni Egañak lehen txapela jantzi eta astebetera. Frontoia bete genuen, eta hurrengo urtekoan pentsatzen hasiak ginen.
Egin genuen 1995ekoa ere, frontoian. Baina hotza gogoratzen dugu ordutik, eta Sarasua eta Egañaren bertsoak, Areitiorekin. Leire Bilbao hasiberria ere gogotsu zetorren, ahots ederragaz.
Hurrengo urtekoa gaztetxean egin behar zela zioskun Xabier Amurizak. Eta halan hasi ginen 1996an. Tartean eztabaidak ere izan ziren herrian, hobeto zela frontoian egitea, beroagoa gaztetxea, hau eta bestea. Kontua da 1996tik ari garela gabonetako bertso saioa Hori Bai gaztetxean egiten. Eta urtero betetzen da. Urtero berotzen da. Urtero gozatzen dugu bertsoagaz, aurten ere berdin, eta urtero ezberdin.
Amets Arzallus, Aitor Mendiluze, Fredi Paya, Xabier Silveira
Lau ertz zituen saioak. Lau bersolari ezagun. Bizkaia, Gipuzkoa, Nafarroa eta Lapurditik, nor bere mahaitik jaiki, eta gurera bertsotara etorriak. Bertsolari handiak laurak. Beteranoak bere gaztetasunean. Zein baino zein.
Etxahun Lekue aritu zen gai jartzaile. Ondo. Sartu egin zen saioan, sartu zituen bertsokideak be. Bertso eskolan atondutako gaiak ziren, aproposak. Lana ondo betea zuten gaztetxean astero batzen diren bertsozaleek. Ondo egindako lanak, hobeto eskertzen ditu gero bertsolariak bezala, entzulegoak ere.
Entregatutako entzuleak.
Iluntzeko zazpiretarako ondo beteta zegoen Hori Bai. Epel epel gaztetxea, eta bertsolariak hurbildu zirenerako txalo zaparrada. Eskenatokitik kantuan hasi eta atoan girotu zen saioa. Etxahunek agindu, bertsolariek erantzun. Puntuak jarri, ofizioka aritu. Paperean sartu eta saio elegantea egin zuten.Larrabetzu.org gunean atoan egongo da saioa entzungai, eta zaleak badauka orduterdi atsegin bat igarotzeko aukera.
Entzun gura badozu:
[audio:http://www.larrabetzu.org/bloga/audio/horibai071225.mp3] -
Urte gorri on
Maiatzaren lehenean, kokakola lata bat… kantatzen dugu Moraurekin. Eta gabonak datoz orain, jatordu ikaragarri luzeak, familiakoen bilkurak, opariak, Olentzero, herriko argi garestiak, erropa berriak, gertukoak urruti, haiek gogoan, hotza kalean, gaztaina gozoak… ez da erraza guzti hau Kontraesanen Errepublikako biztanleontzat.Munduko hiritar izan nahi zenuke halakoetan. Marxekin mozkortu, Leninen ardotik edan, eta ostean Castroren bizarrak laztanduz munduari itzulia eman. Maogaz dantzan egin, eta Trosky eta Stalin gay mugimenduan erroldatu direla ikusi, zelan ateratzen diren armariotik biak.
Gau gorriak egunsentirik ez. Mozkorraldi sasoi be badira gabon egun hauek, bertsotarako, zinemarako, parrandarako, kalerako. Aspaldi ikusi ez dituzunak barriro ikusi, askotan agurtu be bai… eta hurrengorarte.
Gabonak heldu dira Euskal Herrira. Ospatuko ez dituzten gero eta auzokide gehiago heltzen ari da gurera, eta galdetuko dute zertan ari garen gu, kristau ateook.
Urtea amaitu da, eta barria dator. Beste negu luze bat, eta oraingoan etxean jokatzen dugu.
Osasuna danontzat. Askatasuna irabazten duenarentzat. Eta goraintziak munduko Martin Larralde guztioi. Biba zuek!
Gora Internazional kontsumista!
-
Blogen eragina
Aspaldi idatzi zuen Mikelek bere itsasertzeko zubian post bat blogaren eraginaren inguruan. Orduan ez nintzen jabetu, eta berandu bada be, ohartu naiz bere idatziaz.
Ba al dute eraginik gure blogek?
Askok uste duena baino handiagoa. Gauza txikiek beti dute erauntsi handiei aurre egiteko gaitasuna. Horretan sinetsita nago. Baina blogek, bere horretan, beste barik ez dute mundua aldatuko. Baina blogak, auzolanean arituta, lagun berriak eginez, koherentziaz idatziz, kidetuz… tresna eraginkorra dira.Ni sinetsita nago horretan. Inoiz baino lagun gehiago ezagutu ditut aspaldi honetan. Blogariak batzuk, irakurleak asko. Eta lagun onak egin ditut.
Idatzi egiten dizute, edo tabernan azken mezuaz iritzia eman, hasarratu egiten dira batzuk, eta komentarioak egiten dituzte besteek.
Blogek eragina dute, ez dago dudarik. Egunetik egunera gehiago zarete blog honetara zeozer irakurtzeko hurbiltzen zaretenak ere, eta batzutan lotsa-bertigoa-harrokeria sartzen zaio norberari idazteko orduan.Beste batzutan, amorruari irteera emateko, penei aurre egiteko, zoriontasuna banatzeko balio dute. Balio izan dute. Zer esango dizuet nik?
Musikari batzuk haserretu zitzaizkidan behin, musikariak adiskidetu zaizkit. Bertsozaleak inguratu zaizkit, irakurleak ondoan somatzen ditut.Besarkadak jaso ditut, eta espetxeren batera be heldu dira blog honen fotokopiak. Tabernan gauez, etxetik urruti, ezagutzen ez nuen baten batek ere galdetu dit herriko kontuei buruz. Lan elkarrizketa batean blogik banuen galdetu zidan pertsonal burua zen batek. Polizi kontrol batean, hurrengo post baterako izenburua pentsatu nuen. Eta inoiz, kontzerturen batean ere, etortzen zaizu akorduan bloga.
Blogen inguruko azterketa psiko-soziala ez dut egin. Baina badago ezpala bai… ikerketari ekiteko.
Blogak eragina dute. Eta hori ona ere izan dezakete.
Argi daukat, eta horregatik egunero zeozer idazteko gogoa pizten zait. Batzutan mezuak pilatu egiten dira, eta beste askotan nagitu egiten naiz. Baina indar eta gogo hau nirekin diren bitartean, idazten jarraituko dut. Zuek ere ondoan nahi zaituztet… irakurle agurgarriok.
zer pentsatuko du honetaz, egunero bisita egiten diedan horrenbeste blogarik. Teketen, Jabi, Arkaitz, Joxe edo Iratxek, adibidez.
-
Olentzerori gutuna idatzi barik
Egunak aurrera doaz, eta ez dot Olentzerori gutuna idazteko astirik hartu.
Egunak aurrera, eta telebista iragarkiz bete da, kaleak argi garestienarekin apainduta daude, erregalutarako papera amaitzen ari da gure herriko estankoan, eta asteburuan umeak Olentzeroren bila joango dira solorik solo… ogie eta artoa eskutan hartuta.Egunak aurrera doaz, eta dendaz leporaino beteta, eskuetan ez da boltsa gehiago sartzen, diru kutxak gainezka eta eskaleak ere gabonetako paga hartzeko prest.
Egunak aurrera, eta Olentzero zer eskatu ez dakidala nago hemen, gutuna noiz eta zelan idatziko pentsatzen.
Idatzi duzue zuona? Eta zer eskatu? Kontsumismoa dala badakigu, baina umetan baino ilusio handiagoagaz kentzen diegu papera gure opariei… ezta?
Olentzero berbara ekarriz.
Irakurriko zenuten sustatun edo zabaldun. Baina Luistxok egindako pantailargazki honek, bakarrik egiten du berba. Argi dago.
-
kirolariak ez daude geldi egoteko
Hasi dira mugitzen. Abenduaren 29koak historiko izateko zantzu guztiak ditu. Partida Euskal Herriaren izenean jokatuko du selekzioak -Urkullu bera be hasi da marmarka..- eta gainera Bartzelonan egiten duten antzera Nazio bat selekzio bat manifestazioa egingo da Bilbon.
Argazki hau esanguratsua da. Futbolari, txirrindulari, herri kiroletako partehartzaileak, arraunlariak, gizonak, emakumeak… zer ez den batu Donostian kamaren aurrean.
Doka kafe antzokia txiki geratu eta kanpora atara behar izan zuten argibila. Flashak ez luke guztia ondo hartuko eta. Poztu nau argazkiak, beti ez dira horrelako ekimenak ikusten eta.
Euskal selekzioen aferak, hari asko mugitzen ditu gure herrian. Konponbidea, konponbide handiago baten parte edo zati izan daiteke agian. Giltza, zerraila asko zabaltzeko bera da. Baina kirolariek eurek hartu dute lekukoa. Eta poztekoa da hori.
Gure herrian be, zeozer mugitzen ari da horren inguruan. Eta argazki horren zain geratzen garen bitartean, foto nazionalari begira gaude gu. Eta partidua mundiala izango ei da zaletuen iritziz. Ikustekoa hori be!
-
zazpi@2007 info7 irratian
Joxe Rojasek teknopata blogean botatako proposamena, ekimen interesgarri bilakatu zaigu oso denbora gutxian. Nik neuk be, entzuleei luzatu diet dagoeneko horren berri. Urteko interesgarriena dena, modu partehartzaile batean erabakitzeko aukera den ezkero.2007 urtea badoa, eta zazpi ekimen aukeratu beharko ditugu guztion artean. Abenduan proposamenak egin eta urtarrilean bozkatu, wikiak dioenaren arabera.
Infozazpiko entzuleok badakizue, zazpi@2007. Zenbat 7 ezta?
[audio:http://www.info7.com/wp-content/uploads/2007/12/20071218_98.mp3]Bidenabar, zer iruditzen zaizue info7 irratiaren gune berritua?
-
Zakilixutek bai G puntua
Gaia aproposa OlariaGarentzat.
Gaiari zotzak atera dizkio baina.
Gehiago gura duenak…
G puntua, bertsolaritza, nor hasiko adarra jotzen?Grazia puntua behintzat, Goizero eskaintzen digu, Gosari ederra paperezkoa…
Beste behin ere, Zakilixut eleGante.
-
zazpi@2007 urteko onenak emanda
Ideia bikaina izan du oraingoan be Joxe teknopatak. Izan be, holan begiratuta urtea ona izan dela ezin ukatu. 2007an gauza berri asko ekarri ditugu Interneteko plazara. Eta zerrendatzen hasi, eta zazpirekin abiatuko zen Joxe Rojas, baina wikia begiratu eta gehiago ageri dira dagoeneko.
Blogak jada ez dira ezer, plataforma, mikrofono izatekotan. Orain haratago doa Internet. Eta hori ona da. Komunitateak sortzen dira, eduki konpartituak, motorrak, bilatzaileak uztartzen dituzten gailu berriak. Eta dena zaigu beharrezkoa, guztia da interesgarri. Bideoak, kanalak, ikusentzunezkoak eta mikroformatuak. Komunitatea eta ikusgarritasuna.
Ondo ari garen ez dakit, baina geldi ez gaude behintzat. Begiratzekotan, sortzen dugunari begiratzen diogu… eta ez jarrera pasibo batean presezki. Pozik nago urtearekin. Pozik nago, guk geuk be, sorkuntza guzti horri toki egiten diogulako gure emankizun eta agerraldietan.
irratia.com Joxek hautatutakoen artean dago. Ez da berria. Baina eguneratu egiten dugu, horra hor lagunak bota duena. Egunean egotea da komunikazioaren ardatza. Egunean egoten laguntzea. Egunean egunekoa kontatzea. Badugu zeregin bat aurrerantzean ere, komunikazioaren paradigma honetan. Egiten sortzen asmatzen indartzen ari garen horri islada ematea. Irrati baten funtzioa azken buruan.Urtea badoa, eta gure artean be balantzea positiboa delakoan.
