• agit/prop,  hurrengo geltokia

    Greba orokorra martxan

    maiatzak 21 greba orokorra

    greba deialdia egin dute gurean sindikatu nagusiek. erantzuteko beharra somatzen zen bazterrotan.

    eusko jaurlaritzako jabe berriek beraien kontra delakoan, abertzaleak astintzen hasi direlakoan.

    kapitalismoaren kontrako greba euskalduna gura nuke nik. mobilizaziotik alternatibak eskaintzera pasatzeko. eta ez geldirik egoteko.

    pausu bat da greba. mobilizazio orokor eta handi bat. xxi garren mende honetako lehen greba handia izango da euskal erdian. bidasoaz haratago badaramatzate batzuk. bai horixe.

    tira, apuntatu agendan. m21. greba orokorra. #grebaorokorra etiketa sortu da jadanik sarean. ari gara zerbaitetan.
    grebaorokorra.info gunea ere guztion artean eraikiko dogu, modu partehartzailean. sindikatuek egin dute bere deialdia. langileok, langabetuok, ekintzaileok, prekariook… sarean arituko gara, jo ta gehiago…

  • ikusi eta ikasi,  musika

    Gu gira! nola aldatzen diren gauzak

    gu gira! radi0 euskadi
    Sekulako txapa ematen ari zaizkigu Radio Euskadin (eitb osoa) Gu gira diskoa dela eta ez dela.
    Zelan diren gauzak, hemendik 25 urtera agian, gaur jartzen ez dituzten diskoei omenaldia egiten dietenean AHT gelditu pegata jarriko diote iPod zahar bati.
    Botereak, radio euskadi botere administratiboaren irratia da egun, Ibarretxerena oraindik, Nuklearraren kontrako pegata batekin, a ze muturra! ez dute gogoratzen zer zioten jeltzaleek orduan? Nuklearra egin ezean, kandelekin egongo ginateke gaur egun euskaldunak. Baina orain, mundu guztia Frankismoko batailitak kontatzen, klandestinitatea, Iparraldean erositako diskoak, zentsura… mundu guztia mobilizatzen zen orduan… mundu guztia kalean, musika eta aldarrikapenaren inguruan.
    Batailitak kontatzea gustatzen zaigu bai, lehen pertsonan kontatu, hirugarren pertsonan bizi genuena. Eta orduan botereak txarto ikusitako aldarrikapenak geure egin…
    Amarru komertziala? Gu gira…. Iparraldeak lekurik ez duen direccion Franciako irrati horretan. Euskarazko disko bat, eta egunean zenbat kantu jartzen dira irrati horretan euskaraz? Zenbat berba? Gu gira… onenak, noski.

  • agit/prop

    Hizkuntza eta aldarrikapenak

    Gaur jet lag apur batekin esnatu gara. Ordu bat aldatzea nahikoa izan da, ezker hankagaz altxatzeko.
    Mezuak irakurtzen hasi, eta okerreko bidetik sartu Korrikari buruz lagun batek idatzitakoa. Eta horren gainean gabiltza twitter bidez, gaurko gaia bada.
    Horregatik bada, egunean zehar laburrean idatzitakoak, orain luzeago, lausoago idazteko gogo berezi hau.

    Zer da Korrika?

    Korrika, Euskal Herri osoan euskararen alde egiten den etenik gabeko laisterketa da. Euskararen alde egiten den etenik gabeko (gau eta egunez) ekitaldi jendetsua. Kilometroz kilometro, lekukoaren atzetik, euskararen aldeko korrikalariak aritzen dira korrika. Euskararen aldeko oihuak jaurtiz, eta euskararen aldeko pausu eta urratsak emanez.

    Aldarrikapenen lekua euskararen aldeko ekitaldi jendetsu honetan.

    Euskararen aldeko ekitaldia izanik, tokian tokiko elkarte, herri mugimendu, sindikatu, alderdi, lagunarte, eskola, ikasle talde, guraso batzar,  soziedade, udal eta jendarteko kide ezberdinak parte hartzen dute. Beraien eskariak, euskararekin uztartuz, modu normal batez. Euskarak beste aldarrikapen batzuetan duen leku bera hartuz, beti ere euskara eta Korrikari lehentasuna emanez.

    Zelango aldarrikapenak bizi izan ditugu Korrika ezberdinetan?

    Txikitatik egin dut Korrika. Eta azken 15 urteotan, hainbat korrika osorik egin ditut prentsa taldean. Egin ditut kronikak Egunkariako, irratia.com digitalerako, Indymedia Euskal Herrian kontatu ditut bizitakoak, euskal irrati ezberdinetan kronikak (Euskadi Irratia, Radio Euskadi, Hala Bedi, Xorroxin, Eguzki, Euskalerria irratia, Bizkaia irratia…)

    Urtez urte ikusi izan ditut gertakari, eskaera, oihu ezberdinak. Beti euskaraz, eta beti patxadaz. Korrikan boluntario doazen antolatzaileek, ondo zaintzen dute Korrikaren pankarta nagusiari besteak ez aurretzea, eta furgonetan doazen esatari/animatzaileek ozen egiten dute Korrika, euskara eta AEKren alde.

    Entzun eta ikusi ditut langileen aldarrikapenak (sindikatuen eskutik bezala, langileen eskutik buzo eta laneko erropa kendu barik), entzun ditut ikasle euskaldunak eskola aldarrikatzen, Seaskako erakasleak, Egunkariako langileak 2003an Egunkaria indarrez itxi eta denbora gutxira, gogoratzen dut ere Lasa eta Zabalaren gorputzak agertu zirenean, Korrika erdian zelango omenaldi hunkigarria egin zitzaien Bentaundi inguruan, Iparraldeko Demoen eskaerak, Euskal Herriko intsumitu askoren aldarriak, nekazariak, antzerkilariak klowna egiten, presoen senide eta lagunak, gazteak, gaztetxeak, kulturgileak….  hala ere Itoiz inguruko aldarrikapenak ezin ahaztuta ditut, Korrika bakoitzean.
    Itoitz
    Gogoan dut Korrika hura. Egunkariarako idazten nuen orduan, kronikak telefono bidez pasatuz, aldez aurretik kuadernoan idatzitakoa. Ez genuen emailik. Aspaldi? 1995. urtean edo. Egin egunkaritik Kepa Petralanda, Egunkariatik nik, Joxi Ubedak korrikako kronikak egiten zituen irratietan, Klaudio Landa orduan Aizu!ko kazetaria zen, Ibon Gojeaskoetxea gidari moduan, eta AEKko kide bera ere, telebistan zerbait ibilia ordurako.

    Gogoan dut Agoitzetik pasa ginenean Itoizko kordinadorakoak sekulako abarrotsa egin zutela karreran, Itoitz herri ingurutik obrak ditut gogoan, oraindik hasi barri, oraindik egiteke zegoen presa, proiektua zen, ez askoz gehiago… eta lurra eta hizkuntza ulertzen hasi ginen. Uztartzen. Gogoan geratu zitzaidan Agoitzko elkarte batean izan genuen elkarrizketa. Gogoeta.

    Urte batzuk beranduago, berriz handik pasatzean, ordurako presa eginda zirudien, Nagoreko bide zaharretik joan ginen. Eta begietatik negarra urten zitzaidan -kontatua dut hau ETBko dokumental baterako, egunotan ETB3an ematen ari direna, bidenabar- eta albotik lagunak ea zer gertatzen dan, korrika biok. Eta nik ezin eutsita, uste nuela gehiago handik ez ginela pasako. Hura guztia, urez bete behar zutela. Egonda nengoen lehenago Artozkin, eta bete zituzten herriak, estali zituen urak. Eta bide zaharrarenak eginda zuela, bizitzen ari ginena betiko estalita utzi behar zuela presak. Eta korrika jarraitu nuen.

    Aurtengo korrikak ez du urratsik eman lekuotatik, Itoitzik ez dago Euskal Herrian. 15 urte beranduago orduko aldarrikapenak ulertzen ditut orain. Euskarak ere eremua galdu du, presarekin. Zer ikustekorik zuen Itoizeko aldarrikapenak euskararekin? galdetuko zuen baten batek. Gobernuak, Nafarroakoak, orduan ere ez zuen Korrika laguntzen.

    Bidean botata geunden korrikalariok. Gure kabuz antolatzen genuen errepidea bera, zenbaitetan bizia jokatuz, ezer ulertzen ez zuten kamiolari castellanoekin. Baina egin egiten genuen, boluntarioki, euskararen alde. Oztopo guztien gainetik.

    Zein da aldarrikapenen esparru naturala.
    Herri mugimendu bat da euskararen aldekoa. Beste aldarrikapen eta mugimendurekin batera bizi da egun, Euskal Herrian. Nork bere esparrua eta jarduna duela ukatu barik, badago konbibentziarako lekua ere. Modu naturalean, elkareraginez, interaktuatuz, zehartasun batez. Sareko logikan, gura baduzue. Aldarrikapenetan murgilduta dagoenak, badaki herri mugimenduen artean elkar eragiteko gaitasuna badagoela. Lekua eginez aldarrikapen ezberdineti. Eta pentsatuko dut Abiadura Handiko Trena igaroko den esparruetan, euskararen aldeko oihuak lurraren aldeko aldarrikapenekin bat egingo duela, modu naturalean.

    Euskaldunon Egunkariaren alde, Martxelo Otamendirekin, IñakiUria preso zegoela oraindik gogoratzen ditut Iruñean bukatu zen Korrikako azken urratsak. Mikel Aldasoro Nafarroako AEK-ko arduraduna eta Martxelo Korrika. Mauletik abiatu zenak, bukaera Iruñeako alde zaharrean. Egun batzuk lehenago ez genekien non eta zelan bukatuko zen, dena debekatu asmo zutelako UPNkoek. Barcinak. Ez zen ETAgatik, ez zen Independentzia aldarrikatzeagatik… euskarak berak jartzen ditu aztoratuta. Euskaldunok gara beraien burukomina. Eta jakin genuen aurrera egiten, ez gelditzen, ez isilik geratzen… eta heldu ginen. Eta euskaltegiek gora egin zuten hurrengo ikasturtean Euskal Herri osoan, Martxelok ordurateko agindu bat hautsi, eta gaztelaniaz eta frantsesez deitu zituen euskaltzale ez euskaldunak euskara ikastera… eta abian den herri bat garela irudikatu genuen han.

    Eta gerora beste korrika bat, eta beste bat. Eta aldarrikapenek bat egiten dute irudimenarekin, Oteiza omendu genue gero, Laboa hil zaigu berriki, eta beraien asmoak, beraien gogoak irauten du. Euskaltzale zenbait kartzelaratuak dituzte, ETAkoak izateagatik batzuk, ETAkoak izan barik ETAkotzat jo dituztelako beste asko, eta holan jarraitzen dugu, aldarrikapenei lekua eginez. Eskubideak aldarrikatzen, jendearenak, mugimenduenak, hizkuntzarenak, langileenak, pertsonenak… azken finean. Gelditu barik, baina mugitzen. Korrika.

  • agit/prop,  ikusi eta ikasi

    Korrika badator

    Zer falta da ba? Tuteran hasi eta pausoz pauso dator, bihar hasi eta gaur da hemen, gero hor, atzokoa etorkizun dugu.
    Tuteran hasi eta Nafarroa zeharkatuko du, behin eta berriz, herriz herri herrialdeak josiko ditu, eta mugak eta errekak gainditu, zubiak eta tunelak igaro, gauak eta egunak eman, eta ez da nekatzen, ez da gelditzen. Arin eta astiro, han eta hemen, modu batera edo bestera.
    Euskararen metafora bizia da Korrika.
    Euskaldunok asmatu ditugunetatik handienetakoa… gainera.
    Bihar hasten den horrek, zenbat oroitzapen, zenbat une.
    Txikitatik gogoratzen dugun zeozer, txikiagoei adierazi gura diegun hori…
    Hizkuntza bat, herri bat, jendea, kaleak, bideak, mendiak…. bazterrak, hiriburuak, fabrikak, errepideak, estartak…
    Korrika hastera doa, eta zapatillak prestatu behar.
    Kaskoak jarri, izan be gaur irratia.com saioan Alicia Iribarren elkarrizketatuko dugu, Tuteran lehen kilometroan euskararen lekukoa eramango duen AEK-ko irakasle gaztea.
    ongi etorri, euskara sarea egiten dugunon herrira

  • hurrengo geltokia,  ikusi eta ikasi

    Blog proposamenak

    Goizero, kafearen ostean irakurtzen ditugu gure blogak. Nork zer idatzi duen, loturak jarraitu, rss jarioari kasu apur bat egin, eta aritzen gara gure kioskorik kiosko.
    Goizero baina, zerbait ez irakurri izanaren sentsazioa ere badaramagu. Eta posta txekeatu, twittereko mezutxoei jaramon egin eta eguneraketa deiei itxaroteko esan ostean, gune berriren bat ezagutzeko irrika pizten zaigu.
    Egunero blog berri bat ezagutu nahiko genuke, edo software aplikazio interesgarriago bat, edo auskalo zer… berritasunaren berritasunez… dena zaharra da hamabost minutu barru.
    blog elkarrizketa

    • Baina, blogak irakurtzen jarraitu gura dudala esango banizueke?
    • Proposatuko zenukete blog barririk?
    • Hori du asmotzat post honek, blog barriak  ezagutzea, ezagutaraztea.
    • Ea zenbat batzen ditugun, gero proposamenekin post luzeago bat egiteko.
    • grafikoa: robinhamman creative commons

    post-oharra: post hau twitter eta facebook bidez ere iragarria izan denez, handik jasotako proposamenak ere gehituko dira hurrengo post batetara.

  • agit/prop,  musika

    Irish rebel day

    Gaur egun irlandarra daukagu. Stiff Little Fingers Bilboko Kafe Antzokian, eta Irlandako gaiak hizpide hemengo prentsan, hango azken gertakariak kari.

    stiff little fingers

    Belfasten 1977an sortutako punk taldea da SLF. Sortu eta gutxira utzi zuten taldea, baina gero berriro ekin zioten. Orain sortu zeneko 30 urteurrena dela eta, Europan barna biran ari dira irlandarrak. Irlandakoak sortzez, baina gehienak Estatu Batuetan bizi dira egun.

    Azken astea beraien kantuak entzuten eman dut. blip.fm zerbitzuan asko dira, eta beraien slf.com gunean eta wikipedian sarri samar sartu izan naiz, gauzak irakutzeko asmoagaz.

    Jake Burns abeslariak, adierazpen interesgarriak egin ditu gaurko GARA egunkarian. «Ez dut uste Irlandan bortizkeria aro berri baten aurrean gaudenik». Bertan musikaz ez ezik, egunotako gertakariak hartu ditu hizpide. Bera ere, bake prozesuan murgiltzearen aldekoa dela ematen du.

    Egungo disidentzia irlandarra

    Irlandara begira jarri gaitu Iñaki Sotok ere. Analisi zorrotza egin du: La disidencia irlandesa, entre Platón y Patton.

    Interesgarri egin zait gogoeta, baina hala ere badirudi batzuei ez zaiela horrenbeste gustatu. Paul Rios Lokarriko kordinatzaileak Lo que es bueno para Irlanda no lo es para Euskal Herria.

    Beraz artikulu bat eta bestea irakurtzen, aurretik atzera, tximur tximur eginda geratu zait egunkari gaurko egunkari hau.

    Tira, gaueko garagardoekin dana berdinduta. Irish egun bat beraz, ahalik eta errebeldeena izan dadila.

    Egunak irakurtzeko eta pentsatzeko balio badu, balio beza gauak edateko eta musika aditzeko. Biharamunekoan pentsatzen ibili barik. Gau(r) irish.

  • agit/prop

    Gazteak martxan


    Gogotsu ikusten ditut gazteagoak. Errepresiorik gogorrena, ankerrena jaso arren, koloretsu ikusten ditut, sarean eta kalean.
    Eztabaidetan sutsu, jarreretan irmo baina koloretsu.
    Independentzia ozen eskatzen dute, kamiseta gorriak jartzen dituztenean.
    lotuindependentziara.net gune honetan gainera, tresnarik eraginkorrenak beti gustuko izan dituztela argi nabarmentzen da.
    Segi holan! jarraitu gogotsu!

  • ikusi eta ikasi,  musika

    Musika sormena da batez ere

    Negozioa, jarrera, itxura… denetarik pentsatzen dugu musikaz ari garenean. Harrokeria, apaltasuna. Ireki edo itxia. Fama eta aparra. Dirua eta jukutria.

    Baina niretzat, musika sormena da batez ere. Eta horregatik dakit jakin, musika onak, musikak zeozer esan gura duenean, aurrera egingo dela. Negozioaren, jarreraren, itxuraren, harrokeriaren, apaltasunaren, famaren, aparraren, diruaren eta jukutriaren gainetik.

    Sormena da behar dena. Sortu eta zabaldu. Ikasi eta hedatu. Kantatu eta gozatu.


    Kantu hau sortzaile talde batek asmatutako zerbait da. Ez da kantua soilik atsegin egiten duena. Bideoklipen garairik onena gainditzen duen zerbait da. Binilo diskoen portadei egin diezaiokegun omenaldirik onena. Ikusentzunezko ekoizpen honek, zer pentsatua eman dit.

  • musika

    Astero kontzertu bat

    musika eta biok

    Gogotsu nabil aspaldion. Urtea hasteagaz, kontzertuetako giroa somatu dot barruan. Eta banabil mugitzen.Banabil hona eta hara joateko ahaleginak egiten. Bakarrik batzutan, lagunduta bestetan. Ahal dan moduan.

    Bilboko kafe antzokia itxita egon dan sasoian barau egin arren, Bilbokoa dalako bazterrotan dekogun aretorik txukunena. Bertokoa zein nazioartekoaren eredu. Eta ia egunero dago zeozer interesgarria, beitu asteon zenbat gauza egon diren dagoeneko, zer dagoen programatuta aurrera begira be.

    Ingurukoetara be joateko aukera izan dot. Eta badago non ibili bai.

    We are Standard ikustera joan nintzen Bermeora. Aspaldiko kontzerturik onena, duda barik. All Jazz era izan ziren aurretik, ondo eurak be. Aretoa be, kafe antzoki barria, oso txukuna.

    Gose ikusi genuen hurrengo astean Gernikako Trinketen. Elkarte batek kudeatutako pabiloi industrial batean dago aretoa, txoko oso txukuna. Gosek ohiko kontzertua egin zuen, programatua. Gustuko badituzu ondo. Ni erakurtzen naute.

    DLRN ikustera barriz aurreko astean. Berandu heldu nintzen arren, oso giro polita Bilboko Kafe Antzokian. Zuzenekoan, zenbat eta gertuago hobeak dira zarauztarrak. Euskal Herrian dugun talde onenetakoa da Bartzelonatik mugitzen den Delorean. Bakarrik joan nintzen Bilbora, baina han zeuden larrabetzuar gazteago batzuk be, eurak be oso pozik.

    Asteon Zea Mays dago Bilbon. El deseo del Doctor izango dituzte laguntzaile. Aspaldian Zea Mays ikusi barik, eta oso talde gustukua dut. Aspaldidanik. Aioraren ahotsa eta taldearen jarrera elektrikoak erakartzen naute. Gogotsu nago ikusteko. Gero buelta barriro be etxera. Di da. Joan eta etorri.

    Argazkiak.org | blip.fm © cc-by-sa: gaztelumendi

    blip.fm akuilu
    Pantaila aurreko orduetan berriz, what are you listening to? erantzuten diot sarri blip.fm bidez. Kantu bat bilatu, mezua idatzi eta igorri. Entzun eta twitter bidez lagunei banatu. Batzuk agian entzungo dituzte gure gumendioak, gurekin batera. Nik neuk entzuten ditut beste lagun batzuenak.
    Komentarioak ere izaten dira.
    Musikazalearentzat tresna txukuna da blip.fm eta musika entzuteko aukera polita. Kantuak bilatu, idatzi, komentatu eta zabaltzeko. Nik astean zehar batzuk jartzen ditut, eguraldiaren arabera, gogoaren arabera, ikusitako edo bizitakoari lotuta, egingo dugunari begira… auskalo. dj Kaiku bezala topatuko nauzue blip.fm horretan.

    Zuzeneko emanaldia, pantaila aurreko entzunaldiak, autoko irrati entzuketak eta ostantzekoek osatzen baitute gure bizitza musikala.

  • gaztelumendi.eus

    Endikaren gola

    Egunotan gogoratu dute. Behin eta berriro ari dira aipatzen, eta ia mende laurden igaro da. Denok gogoratzen dugu Endikaren gol hura. Bartzelonari sartutakoa.

    Gure ume garaiko jokalaria zen Endika. Gu zapatu domeketan joaten ginen Lezamara, bizikletan. Gure herrian futbol zelairik ez, eta herriko taldeak han jokatu ohi zuen. Eta gu, Hori Baiek antolatuta bizikletan joaten ginen, lagun pilo bat, Agusegas.

    Eta Athleticeko jokalari guztien kotxeen markak ezagutzen genituen. Opel Kadett Gsi zen orduan kotxerik guapoena guretzat, eta baten batek Golf bat ere bazeukan. Baina Endikak, Endikak 127 zuria zeukan. Apalena zen orduan.

    Baina gola sartu zuenean, idolo bilakatu zen orduan guztientzat. Eta oraindik historiak gola haixe sartzearren gogoratzen du. Eta gaur gogoratuko dute. Ondo gustura sartuko luke berak be gol hori. Ezta?

    Eta orain ikusten duzu Endika. Mobida guztietan, beti laguntzen, ikastolako maisu moduan, Getxo taldean buru belarri sartuta, ESAITen laguntzen, manifetan hor aurrean… gustua ematen du.

    Jokalari moduan handia zena, handi da orain ere.