-
Jabi Zabala: Paperezko egunkariak oso gutxi irakurtzen ditut egun
baga) Blogaria zergatik?
Zer pentsatzen dudan, zer gustatzen zaidan, munduaz dudan ikuspegia… ADIERAZTEKO. 2007an ez naiz fanzine bat egiten hasiko, ezta? Interneten komunikaziorako ahalmenak hasieratik liluratu ninduen. Nire bozeramale ofiziala da bloga.
biga) gaur egun, zeintzuk dira zure egitekoak, zelan uztartzen dituzu blogarekin?
Lantegian komunikazio munduan nabil, Internetekin lotutako zereginetan gehienbat. Horrez gain, nire egitekoak harrikoa egitea, lagunekin, lagunarekin, familiarekin egotea, txakurra ateratzea… Blogak denbora asko kentzen dizu, apur bat hemendik, apur bat handik… Desorekak beti sortzen dira bati asko emanez gero.
higa) euskarazko komunitate bat dagoenik esan daiteke? Zuk zeuk, zelan ikusten duzu?
Noski, bada euskal komunitate bat. Badira komunitate horretan sartuago dauden blogak baina baita aparteago daudenak ere.
laga) Irakurri, idatzi, erantzun, ikusi, jarraitu…Internet zer da zuretzat?
Norabide anitzeko eta izaera anitzeko edukien komunikabidea, nik une honetan informazioa eskuratzeko gehien erabiltzen dudana. Paperezko egunkariak oso gutxi irakurtzen ditut egun. Komunikatzeko, argazkiak argitaratu, testuak, bideoak, e-posta asko erabiltzen dut, saretik telefonoz deitu…
boga) Eta zer gehiago behar du, behar luke, zure gustuko Internetek… Ausartuko gara zeozer asmatzen?
Botere autonomo txiki asko, zentsuraren aurkako berme gehiago, hirugarren munduaren presentzia handiagoa, hizkuntza txikien presentzia handiagoa…
sega) Internet bidez, ezagutu duzu lagun onik, nor? non? noiz?
Batzuk, bai. Esaterako, sarearen bidez lagun bat ezagutu eta haren etxean astebete pasatu nuen Holandan. Gehienak, baina, hurbilago ezagutu ditut eta euskaldunak dira. Hamar urte hauetan, Internet dela eta, dozenaka lagun interesgarri ezagutu ditut.
zai) Internet gabeko egun bat kontaiguzu, zer egingo zenuke, goizean hasi eta gauerarte, hori posible ote den jakiteko irrikitan nago eta…
Erlaxatu, deskonektatu egingo nuke, hori bai, edonon egonda ere. Akaso hondartza-mendi egun bat litzateke, egun osokoa ia, aspaldi egin ez dudan horietakoa. Kostaldeko haitzarte bakartian biluzik bainatu, bokata jan eta gerizpean zerbait irakurri… Gero herrira heldu eta zerbeza hotz batzuk edanda oso zoriontsua izango nintzateke. Oporrak behar ditudala igartzen da, ezta?
zoi) Webgune bat gomendatuiguzu, egunero irakurtzen duzun blog bat, besteok ere horren berri izan dezagun.
Garai batean egunero irakurtzen nuen alt1040.com, hain famatua bilakatu aurretik. Egunero blog, webgune eta hedabide zenbaiten bilan modukoa egiten dut. Ezagutzen ez duzun bat gomendatuko dizut: www.wsahara.net – ingelesez Mendebaldeko Saharari buruzko informaziogune bikaina.
bele)) Orain etiketa ezazu zure burua, zure jarduna… laupabost etiketa nahikoak izango al dira.
kazetaritza, hizkuntzak, baroja, argazkiak, sareak
arma)) Nahi baduzu, bota zuk orain galdera, nik erantzungo dut zure partez, atsegin handiz.
Noiz bueltatuko dizkidazu zor dizkidazun 30 euroak? …Broma da. Zein izango da zure hurrengo proiektu zoroa, duela hamar minutu bururatu zaizun hori?
iPtx: Egia esan, aspaldion zer egin pentsatzen dihardut. Interneten jauzi bat eman beharra dagoela uste dut. Podcasting-a izugarri gustatzen ari zait, etxean egindako saio bat daukat aspaldian buruan, eta udagoienean horretan murgildu gura nuke. Baina galdera sorta hau, bidenabar, nire iparrorratza ez herdoiltzeko baliatu gurean nabil. Zer egin hobeto asmatzeko. Hamar minutu baino gehiago daroat horrekin bueltaka.
tiro pUm! Nori egingo diot hurrengo galdera sorta? E-lkarrizketa zeini egin proposatuidazu.. itaunok berari igortzeko.
E-goitz Goikoetxeari, reggaezale, blogari eta Euskal SEO gizon bizkorrari
Gustatuko zaizu ere
Gazteak sarean territorio libre propioak sortzeko gai dira
-
[ hamaiK 11 kontu ] e-hizketan hasiko gara
Ekimen berri bat abiatuko dut blog honetan: hamaiK
Lagun batek, behin eta berriro errepikatzen didanez, behin eta berriro eskatzen didanez elkarrizketei ekitea, e-hizketan hasiko gara aurrerantzean.Elkarrizketak egingo ditut, 11 izango dira. Hamaika blogari ezberdin izango dira; blogik blog, Internet, blogosfera eta bizitzari buruz arituko gara. Berbetan.
11 galdera izango dira, 10+1. Hamaika itaun Internet bidez eginak, luzatuak. Erantzunak ere hamaika izan daitezke, nork jakin.Lehenengo galdera sorta Jabi Zabala lagunari jaurti diot. Harek beste bati egitea proposatuko du, hurrengo bati harek, gero besteren bati… hamaika elkarrizketa egin arte.
hamaiK hasiera da. e-hizketan hasteko aitzakia. Esperimentazio bat elkarrizketa digitalen aroan. Ez dakit zer emango duen, baina jakinmina daukat. Galderak arruntak dira, agian aldatzen joango naiz, erantzunen arabera… baina ikusiko dugu hori ere.
hamaiK honek bere bidea eginen du, ziur. Amaitzea espero dut, beste zerbaitetan abiatzeko berriz ere. Gogoeta egiteko, galdera-erantzunetatik –e-hizketak– ondori batzuk plazaratzeko. Gogoeta hoietatik ikasteko. Ikusten dugunaren berri emateko, egin nahi genukenari heltzeko.
Udan hasi eta udagoienean amaitzeko ekimentxoa izango da. Internet bidez… asterik aste.
Hasi gara bai, eta ez gara berehalakoan lotuko.
-
Arnaldo Otegi
Elkartasuna klik batetara dago.
Sinatu, eskatu, aldarrikatu….. Arnaldo Otegi askatu!
Bake prozesuan burubelarri egon den Ezker abertzaleko bozeramalea giltzapean daukate.
Internetetik zer egin dezakegu, ideiarik, aholkurik, ekimenik?
-
Udaminez
Uda deitzen diogun hori badoa, astiro astiro. Egunak goizean hasi eta ilunkerarekin amaitzen ari zaizkidan aro honetan… ikaratuta nago.
Oraindik ez dut uretan segundu bakar bat eman. Ez dute nire besoek igeri egin, ez dut oraindik itsasoko kresalik, Iratiko urik ezta igerileku ziztrin bateko klororik dastatu.
Herrietako jaietara joan barik, txoznetan egon barik, garagardoen aparrik dastatu barik…
Uda badoa, eta hemen geldi nago ni.
Tourrak amaitu behar du, lanak iraunen du, goizetan eguzkia ateratzen da, eta hemen jarraitzen dut nik, geldirik.
Uda badoa, eta ez daukat bere berri.
Ezagutzen baduzu, kontaidazu, jakiteko irrikitan nago eta.
-
gazte egonaldiak
Gasteizen izan naiz azken bi egunotan. Gazteagoekin aritu naiz, 12 eta 14 urte bitarteko gaztetxoekin. Asko ikasi dut, belaunaldi berrien argazki bat egiteko aukera izan dut bi goizetan. 80 gazte, Euskal Herri osokoak. Nafarrak batez ere, nabarmenak direlako, bizkaitar zenbait, arabarrak, Iparraldeko batzuk, eta oharkabean igaro zaizkit gipuzkoarrak. Gasteizen, beraien gazte egonaldien karietara.
Bloga egiten, blogean idazten ikastea zen helburua. Blogak ezagutzen zituzten batzuk -ikastolan bazutelako, messengerretik ezagutzen zutelako, entzun dutelako- eta blogeatzen aritu gara.
Egia esan, ikasi eta erakutsi dena bat izan da. Bidai lagun izan ditut beraien egun hauetako begiraleak -Txomin, Nagore,…- eta Gasteizko Sareguneko arduradun Premin eta beste kordinatzaileak.
Bi blog egin ditugu batez ere: gazte egonaldiak 07 eta Soinuetan blai 1.0 Esperientzia ona izan da. Bideoak jartzeko abilezia erakutsi dute -youtuben ondo murgiltzen dira, arraioa!-, argazkiak zelan sartu, google euskaldundu dugu, testuak idatzi…
Blogak egitearekin batera, Hala Bedi irratian irrati emankizun batzuk egin dituzte, ikusentzunezko laburmetraia batzuk grabatu dituzte, grafitiak egitekoak ziren, bizikletan ibili dira, Etxeren kontzertua izan zuten aterpean bertan…. eta gehiago jakin gura baduzue, jo beraien gunera.
Saregunen egin dugunari buruzko bideoa grabatu zuen Preminek bere telefonoarekin.
Gustatuko zaizu ere
Itsasoaren isiltasuna
Euskal Herria 2.0 topaketatik puntuEUS dominiora
Korrika badator
-
Tailerrak 2.0
Uda heldu da.
Ikastaroak, udako kurtsoak, unibertsitate eta campusak. Master, kreditu eta enparauak.
Ikasteko gogoa bai, adituak entzuteko apetarik ez ordea.
Tailerrak 2.0 eskaintza interesgarria.
Gure komunitatea, gure Interneteko presentzia, gure jakintzan aurrera egiteko urratsak. Beharrezkoak. Bide baten hasiera baino ez, abiapuntua alegia.
- Wikipedian eduki gehiago sartzeko.
- Blogak egiten ikasi baino, blogekin beste gauza batzuk egiten hasteko. web 2.0 kontzeptua gurera egoki ekartzeko.
- Podcasting-a zer den baino, zelan egin asmatzeko.
- Ubuntu bidez, software librean barneratzeko. Jarduteko.
- Eta uda ostean, irailerako asignatura: bideogintza. Eguzki bideoak kolektiboarekin batera egin beharreko ikastaroa. Interesgarria, oso azken hau.
Izena emateko, parte hartzeko, proposamenak luzatzeko, zabaltzeko, hedatzeko, kezkatzeko… edozertarako sartu hadi wikian.
-
Let´s come together
Gustatu zait Europar Batasuneko Media proiektuak, europar zinema bultzatzeko egin duen irudien bilduma eta bideoa. Korritu gaitezen elkarrekin bada! -
Kukuxumusu ere hasi da telebista kontuetan
Euskal Herrian gero eta proposamen interesgarri gehiago dago. Begira jarri, eta ea zeozer ikasten ahal dugun. -
web 2.0 azaltzen ari zaizkigu oraindik
web 2.0 aspaldion Interneten gehien erabiltzen dugun berba hori. Azalpenak ematen ari zaizkigu oraindik. Azalpenak, hitzaldiak, ikastaroak, mintegiak, negozioa… eta zenbait bideo interesgarri ere.
Hau ikusi dut berriki, eta hona ekarri dut.
