teknologia berriak
software librea | blogak | Internet | copyleft
-
eitb24.com: Nabarmen gehitu da Interneten blogen kopurua
Harritzekoa!
Datu bat hartu teletipotik, zelan edo halan euskaratu (nahiko trakets sarritan) eta albiste bilakatu. Datu bat hartu eta informazio bihurtu. Berdin du New York, London edo Zamudion. Berdin du atzo izan, gaur edo bihar. Egunean 24 ordu albisteak ematen -eta ez sortzen- egotea da kontua.
Hartu noticia hau eta esango didazue. Blogak hizpide hartu, eta Euskal Herriko egoera aintzat hartu ez. Datu bat bera ere ez, loturarik ere ez. Hau da gurean informazioa emateko modua. Hori bai, udablog txatxu horren irudia jarriko dizute alboan, eurak ere bloga dutela adierazteko.
Aztertu dezagun titularra: Nabarmen gehitu da Interneten blogen kopurua. Ona! Esatea zeukaten, 100 milioi blog egongo direal 2007an adibidez. Bikoiztu egiten dela aldiro aldiro blog kopurua. Keba! Nabarmen gehitu da kopurua… hori da zehaztasuna. Hori da albiste deigarria egitea.
Blogak eta eitb24.com
Aspalditik jarraitzen du gure eitb24.com hori. Albistegi bezala txarra iruditzen zait, iturri asko, agentzia asko, langile asko ditu eitb24.com egitasmo horrek, baina Interneteko hizkuntzan ez du asmatzen. Ez da erreferentzia. Eta orduro orduro, euskaraz eta gaztelaniaz, irratitik eta telebistatik aipatzen duten arren, ez da erreferentzia informatiboa Interneten. Ez behintzat gure artean. EITBko gainontzeko langileek ere ez dutela erabiltzen pentsatzen dut, ez dela tresna egokia beraien albistegietarako, beraien erreportaiak egiteko orduan.
Blogosferan ere, ez da erreferentzia. Gutxitan linkatzen dugu, ez bada kritikatzeko. Informazio berezitua, informazio espezializatu gutxi sortzen du. 24 orduz ari dira lanean, baina ez digute abantailarik eskaintzen. Eta pena da. Pena da, euskararen inguruan Interneten dagoen faktoriarik handiena delako hemen. Zamudioko parke teknologikoan, tresna guztiak, nahi beste langile eta beharrezko tekniko guztiak izan arren, ez dutelako asmatzen.
Baina inork ez du dimititzen. Ezgaitasuna nabarmena den arren, Lontxo Sainz bezalako kazetari ezjakinak ditu zuzendaritzan. Hori da EITB. Udan bezala, urte osoan, eta 24 orduz gainera.
Nabarmen gehitu da gai ez direnen kopurua.
Loturak:
-
Bloga izotzarekin
Telefonoa joka ari da. Hartu eta irratitik ari dira. Uda da, badakizu, eta albiste lehortea dago. Txoririk ez da hil, kulturgintza geldi dago, UEUri buruz aritzeak nekatu egiten du… eta esatariari burura etorri zaio kolaboratzailea.
zer egiten du blogari batek udan? Erreportaia izan zitekeen, eta jende ezberdina elkarrizketatu. Hitz egin zitekeen tourraz, oporretaz, jaien gainean, kontertuei buruz, ekonomiaren gorabeherak, nazioarteko egoera, futbola, hondartzak edo Azkunari buruz. Baietz esan nien, duda asko barik. Kazetaritza interpretatzeko gai bagara, egoerak bultzatuta horrelakoak gertatzen dira.
Irratiko eskaleta bete behar, eta elkartasuna adierazi behar zaio uztailean lanean ari denari. Berba egingo dugu, blogari buruz. Udari buruz. Azken asteotan idatzitakoari buruz gura baduzue. Ez dago arazorik. Irratia ala hil!
Eta azken post hauetan idatzitakoaz jardun gara. Zutabelari batek, bere azken zutabeen azalpenak emango balitu bezala, baina irratitik. Bilbo live, Tourra, San Ferminak…. denetarik.
Bloga izotzarekin eskatuko dut hurrengoan. Ea zer ateratzen didaten.
-
larrabetzu.org aurrera doa
Hilabetea sarean, eta emaitzak ikusten hasi dira. larrabetzu.org aurkeztu genuenetik, apurka apurka garatzen joan da gure komunitatea. Larrabetzu herri bizia da, kalean, auzoetan, jendearen artean, eta hori isladatu gura genuen larrabetzu.org proiektuan be.
Sergiok eta biok, geure blogak herriko zerbitzarian jarri genituen lehendabizi, larrabetzu.org bloga sortzearekin batera. Gero blog gehiago etorri dira, eta ikasturte berrirako gehiago egongo dira.
Interneten hilabete batean gauza asko gertatzen da, eta alde horretatik ere gurera egokitzen ari gara. Wiki bat, argazki galeria bat, zabaldu.com plugina, audioak entzuteko aukerak, Google analytics… gure i+g (irudimena eta gogoa / ikerketa eta garapena) taldea ere martxan dago.
Larrabetzu.org komunitatea gaur:
gaztelumendi.org Neure bloga, irakurtzen duzuen hau.
53R61 Sergio, gure herriko hackerra
kukubel 2.0 Kukubiltxo antzerki taldearen antzezlan berria
Hegoafrikatik Gure herriko bidaiariak munduan zehar
literatura, Gabriel Arestiren etxea
Argazki galeria Apurka apurka Interneteko presentzia areagotuz.
Eta proiektu berriak be etorriko dira; blog gehiago sortzeko aukera martxan dago. Herriko pelota eskolak proposamena luzatu digu dagoeneko, eta ostantzeko aukerak be sortuko dira, seguru baietz.
Aurki.com atariko herriak sailean agertzen dira dagoeneko gure feedak, eta bertan beste herri batzuetako ereduak eta ildoak aztertzeko parada daukagu. Gurea herri txikia da, baina Interneten aroan, informazioaren garaian, herriok hor egon beharra daukagu, auzolanean eta teknologia berriekin batera.Zuongandik ere, ideiak eta proposamenak espero ditugu. Ondo etorriak izango dira eta.
Gustatuko zaizu ere
Inoiz herrian egin den mendi martxa handiena
Lasterbidean
Gazte eguna Larrabetzun
-
irratia.com: azken saioa
irratia.com 2.1 azken saio edo emankizuna. Beste ikasturte bat egin dugu uhinetan bezala Interneten ere. Podcast itxura ez dugu galdu, eta interaktibitatean gora egin dugu. Euskal Interneten panoraman murgildu eta musika, teknologia berriak eta irratigintza uztartu ditugu.
Irratigintza etiketatzen ari garela pentsatzen dugu. irratia egiteko modu berri bat abiatu genuen duela 5 urte, eta gero eta pozago gaude orduan emandako urratsarekin. Interneteko irratiaren bideragarritasuna ikusi genuen 2000. urtean… eta eskerrak! Geroztik hemen ari gara, astero astero albisteak informazio bilakatzen, elkarrizketak gogoeta eta gure jarduna irrati bidez azaltzen. Blogak eta irratia, estudioa eta konexioa, skype eta entzuleak, musika eta sorkuntza uztartzen. Irratia guzti hori eta gehiago da.
Mundutik Euskal Herrira
Euskal Herritik nazioarteraSaio berezia izango da gaurkoa ere. Bi gonbidatu izango ditugu. Batetik Jaizki gure Singapurreko entzulea. Munduari itzuli erdia emateari ekin dio Susana lagunarekin batera, hileak emango ditu Thailandia, Kanboia… eta nazioartean bidaiatzen, noizbait Gasteizera heltzeko. Bidean ordenadore bat aurkitu, eta gurekin mintzatuko da, euskaraz noski.
Orhipean hartuko dugu gero hizpide. Xamar elkarrizketatuko dugu, liburuaren edizio ezberdinak berbarako ekarrita; izan ere, gaztelaniaz, frantsesez eta ingelesez argitaratu da Orhipean liburu hori.
Entzun gura baduzu:
[audio:http://www.bilbohiria.com/docs/podcast/irratiacom/irratiacom060627.mp3] -
Maite dut Zarautz
Asteburu librea Zarautzen. Itzela izan da, Putzuzulo gaztetxean software libreari buruz ikasi dudanaz gain beste kontu asko ikasteko aukera izan dut. Duda barik. Zapatuan heldu nintzenean, tailer pratiko batean topatu nituen hainbat lagun. Ordenadore gelan -dena GNU/Linux ordenadoreekin- berriz jendea konektaturik, programatzen, programak instalatzen…
Bazkari gozo batek esaten zidan, sekulako giroa egon behar zuela han asteburuan. Hitzaldiak, hizkuntzak, Catix live CD erakargarria, Euskal Herri librea mahainguru eta solasaldia… denetarik. Bokatak, garagardoak eta eztabaidak jarraitzen du. Musika entzun eta hor ari gara Putzuzulo gaztetxea utzi eta herrian bueltaka. Galdu barik.Gaua ere ederra da Zarautzen. Kale arteko abarrotsak malekoian oinez ibiltzera gonbidatzen zaitu, edo hondartzara hurbiltzeko. Marea behean dago, eta lasai ibil zaitezke oinez… hara eta hona. Ametsetan.
Eta igandean esnatzen zarenean, gaztetxea jende gehiagorekin topatzen duzu, software libreak jendea erakartzen du Multimedia tailerrera. Tresna eta aplikazio mordo bat. Gauza asko ikasteko egia esan. Filmeak, irudiak, diseinua, musika, bideoak… zer ez dagoen egiterik adibidez Ubunturekin!
Bazkari ostean berriz loaldi labur baina atsegin bat, eta esnatzean hitzaldi bat aurkeztu behar dizute… onartzen duzu eta hor zoaz gaztetxe ezin beteago batera. Hezkuntza eta software librea lehenbizi, enpresa eta software librea gera. Eta azkenik, bero izugarri baten azpian Richard Stallman.
Ehundaka lagun, adin guztietakoak Putzuzulo gaztetxean. Adi adi maisuaren lezioari entzuten. Jendea pozik dago, eta azkenean GNU mugimenduaren sortzaileak kantatzeari ekin dio. Free software song. Bi kantu. Eta jendea txaloka. Giro ona nagusi. Softare librearen giroa. Dantzariaren agurra eta plaka gaztetxeko sarreran. Zer gehiago behar da?
argazkiak: 53R61 eta Iker (flickr.com)
-
Gara RSS bidez irakurriko dut aurrerantzean ere
gara.net guneak ondorengo edukiak eskaintzen ditu RSS bidez:
Azken ordua
Jaso itzazu azken orduko berrien izenburuakHorrez gain, sailez sail ere eskaintzen ditu edukiak:
Euskal Herria Jendartea: Iritzia: Mundua: Ekonomia: Kirolak: Kultura: -
Blogak eta garagardoak 3.0
Gara egunkariko azken orrian gaur argitaratutako kronika eta argazkiak.
Ostirala, lan guztiak amaituta, ordenadore portatila hartuta, blogariak gaztetxera jotzen du. Herriko blogariak bakarrik ez, beste toki batzuetakoak ere batu dira: Arrasatetik, Elgetatik, Andoaindik, Galdakaotik, Bilbotik edo Larrabetzutik. Berdin du nondik, baina euskal blogariak batzeko zita izan ohi dira Blogs&Beers topaketak. Garagardo artean, blogariak elkar ezagutu, berba egin eta elkarren berri izateko topagune bilakatzen dira. Orain arte, ia urte betean hiru ospatu dira; 2005eko apirilean lehenengoa -Elgetako Espaloia kafe antzokian- eta Bilboko Kafe Antzokian beranduago, 2005ko azaroan. Hirugarren zita izan da oraingoa Larrabetzuko Hori Bai gaztetxean ostiral iluntzean ospatu zena.
Deialdia Internetetik zabaltzen
Deialdiak egiteko ez dira gutunak egoten, ez da kartelik egiten normalean, Blogs&Beers 3.0 deialdia ere batez ere Internetetik zabaldu da. Post bat Interneten idatzi, eta erantzun eta trackback bidez zabaltzen da konbokatoria. Euskal Herrian, tokian tokiko blogez gain, Sustatu.com eta Zabaldu.com dira horretarako albistea hedatu eta zabaltzeko gunerik aproposak. Ostiralekoa ere horrela zabaldu zen, lehenbizi larrabetzuar blogariek zitaren berri eman eta gero sarean zabaldu zen.larrabetzu.org komunitatea
Ostiraleko ekitaldiak, blogarien topaketa izateaz gain larrabetzu.org komunitatea aurkezteko ere bazuen helburu. Blog komunitate bat, herri txikiak Interneten paratzeko aukera, teknologia berriak eta euskara suspertzea… helburu asko ditu larrabetzu.org egitasmoak. Glokalizazioa ere deitu izan zaie horrelako ekimenei. Dena dago egiteko, eta partehartzea eta jendearen arteko auzolanean burutu ohi dira horrelako proiektuak. Larrabetzuko gaztetxean ikusi zenez, blogarien artean termino hauek ohikoak dira, auzolan telematikoa egunean dago, eta softwarea euskaratzen, proiektuak aurrera ateratzen edo salaketa telematikoak egiteko orduan, blogariak beti lehen lerroan egon ohi dira.Ostiraleko ekitaldian, blogak eta garagardoak gainera musika onarekin uztartu ziren. Kingston hiria irrati emankizuna egiten duen musikazaleak, reggae musika pintxatu zuen zuzenean gaztetxean ere, eta normalean bere Interneteko emankizunetan edonork entzun dezakeen musika, kasu honetan zuzenean eskaini zuen. Bitartean beste blogariek, Klik bikoitza, 53R61, Teketen, Jozulin edo bestek ordenadore aurrean argazkiak Interneten publikatu, kronikak zuzenean idatzi eta gaztetxeko wifi konexioarekin pantaila handian bideoak erakusten zituzten. LarraB&Btzu ekitaldi honetako testuak eta irudiak jadanik Interneten daude eskuragai, eta bb3 etiketarekin aurkitu daitezke technorati.com edo flickr.com bezalako guneetan.
Ekitaldia Larrabetzun eta Txorierrin AEK egunaren aitzakiarekin antolatu diren ekitaldietatik lehena zen. Biharamunean toki berean, Larrabetzuko gaztetxean Ruper Ordorikak musika emanaldi akustikoa eskaini zuen. Kronikak eta argazkiak, zelan ez, irakurgai daude larrabetzu.org gunean, blogariren batek idatzita. Gune berean topatuko duzu gainera, datorren larunbatean, ekainak 10, AEK egunaren inguruko informazio guztia.
-
Blogak eta garagardoak gaztetxean (bb3)
Eta gaur da ekainaren 2a, ostirala. Eta gaur batuko gara blogariak Larrabetzu ko gaztetxean. Reggae musika entzun, garagardoak hartu, blogak erakutsi eta pantaila handian aurkezpen ezberdinak egingo ditugu.
Blogs&Beers 3.0 honetan larrabetzu.org blog komunitatea aurkezteaz gain, eztabaida edo behintzat solasaldia piztu gura dugu. Zertarako blogak? Herri txikietako informazioa zelan zabaldu? Hori eta gehiago ditugu helburu bezala, eta ea ezer pizterik lortzen dugun sikiera.
Argazkiak zuzenean igoko ditugu Internetera, gaztetxean prestatu dugun wifi konexioa profitatuz. Zuzeneko irudiak, kanpotik jarraitu gura duenarentzat. Gogoratu bb3 etiketa proposatu dela komunitatean tag bezala.
Zure zain gaude. Beste barik.
-
Bide berri bat gaztelumendi.org blogean
Autodeterminazio garaiak bizi ditugu. Eta autonomia mugatutik, independentzia eta autogestiorako jauzia egin behar dugu. Gaur bertan. Orain. Hemen. Baita blogetan ere.
Gaztelumendi.org proiektu hau abiatu nuenetik igaro da sasoi bat. Urteak, hileak, asteak eta egunak eman ditut blogari lotuta. Sorkuntza eta eztabaida uztartzen. Gogoeta eta propaganda. Informazioa eta iritzia. Denetarik joan da, askotarik etorri da. Eta tartean izan zarete zuek, tokian tokiko irakurleak. Egia esan, asko izan zarete, harritu eta guzti egin naiz aipamena egin didazuen bakoitzean.
Autogestioa eta independentzia
Eta orain urrats berri bat emango dugu blogarekin. Autogestioa eta independentzia. Larrabetzu.org komunitatea sortu dugu, zerbitzari bat montatu dugu, wordpress 2.0 softwarea euskaldunarekin, lan talde bat teknologia berriak herri mailan lantzeko… ekimen berri bat. Eta blogthing.com laga eta gure zerbitzaritik arituko da aurrerantzean gaztelumendi.org proiektu hau, blog hauxe bera.Eman beharreko pausua izan da hau; norberak tresna guztiak eskura izanez, eta hobetzen eta garatzen joateko moduko urratsa. Pluginak jarri, diseinuak egokitu, bisitak kontrolatu, denetarik egin ahal izango dugu aurreranzean. Autonomiatik, independentziara.
Larrabetzu.org komunitatea
Eta Gaztelumendi Larrabetzuko txokoa den bezala. Gaztelumendi.org ere larrabetzu.org komunitatearen baitan egongo da aurrerantzean. Beste blog batzuk ere sortu dira, tartean Sergiorena (gure linuxzale eta hAcKERrarena). Atal teknikoan jantzia da bera, gure komunitatean bera izango da kontu teknikoetako arduraduna. Gaztea eta azkarra. Interneten eta teknologia berrietan iaioa da. Elementu ona gure proiekturako. Eta egongo dira diseinugileak, argazkilariak, blogariak, poetak, gaztetxeko lagunak… nahi duen guztia murgilduko da proiektu honetan. Larrabetzu.org komunitate bat izango delako. 1500 biztanle dituen herria, Interneteko komunitate aktiboa bilakatu nahi dugu.Larrabetzu.org blogs&beers 3.0 topaketan aurkeztuko dugu. Jendaurrean, jendearekin. Hori Bai gaztetxean wifi konexioa ere jarri dugu horretarako. Guztiok zaudete gonbidatuta.
Helbide berria: larrabetzu.org/gaztelumendi
Beraz badakizue, egokitu zuen rss irakurgailuak, aldatu harpidetzak, eta segi gaztelumendi.org irakurtzen, parte hartzen eta zuen iritziak ematen. Mila esker, orain artekoagatik bezala, aurrerantzean elkarrekin egingo dugunagatik.
-
Bi hitz Berriari buruz
Gaur Berriari buruz modu subjetiboago batean berba egitea tokatzen da. Bart Bilboko Kafe Antzokian izan nintzelako eta gaur goizean, kioskora korrika joan naizelako, badira bi arrazoi, berriari buruz bi berba egiteko.Aurkezpen ekitaldia
Poztu nintzen, aurkezpena egiteko Bilbo hautatu zutela jakin nuenean. Euskal prentsak orohar gutxi jotzen du hirira. Gutxiegi nire uste apalean. Eta Bilbo ezer bada, Euskal Herriko hiria da. Badira gero eta gehiago euskara eta euskal kulturaren gune garrantzitsuak eta atzokoan Kafe Antzokia hautatzean asmatu zuten.
Ekitaldia laburra izan zen, 25 minuturen buruan mintzatu ziren bi hizlariak: Martxelo Otamendi zuzendaria (Berria) eta Joxean Lizarribar enpresa gizona (EKT). Martxelok, produktua pantaila handi batean aurkeztu zuten, power point batekin lagundua. Biharamunetik aurrera ikusi behar genuenari buruz, britaniartu, aldizkaritu eta holango berbak erabili zituen. Enpresaz, aurrekontuaz, laguntzetaz aritzeko profitatu zuen Lizarribarrek. Eta tartean, Onintza Enbeitak bertso batzuk egin zituen. Hori izan zen ekitaldi guztia, gero pintxoak eta argazkiak. Handienek egin ohi duten antzera. Eta jendea kalakan. Berbaz. Eta jaten.
Diseinu berria
Eta gaur, goizean arineketan joan naiz egunkaria erostera. Errez asmatu dut zein zen hartu beharrekoa. Lehen inpresioa ona. Mantxeta mantenduz (oso ona iruditzen zait) beste guztia aldatu dute lehen orrian. Barrura sartzean, gutxiago gustatu zaidala uste dut. Letrak, letrak topatu ditut nahinon. Beltz, oso ilun kausitu ditut zuribeltzezko orriak. Iruditu zait, kolorea eta sail batzuk ondo landu dituztela. Baina harrapatuak egon direla beste orri batzuetan.
Asko gustatu zait, mantxetaren azpian landu duten albiste hori, koloreetan, beltzaren gainean…. gainera gaur Bob Marley hartu dute hizpide. Hori oso polita. Hor bai iruditzen zait britaniarragoa, aldizkaritutakoa. Beste argazki hauek, berez berba egiten dute:
Argazkiak eskuragarri daude flickr gunean.
Edizio elektronikoa
Goizean, edizio elektronikoan sartu naizenean galduta sentitu naiz. A ze anabasa! Letra mordoa, baina non klik egin? Eta gero hasi naiz apurka apurka ordenatzen, gauzak bere lekuan kokatzen. Interpretatzen ikasi dudala ikasi dut. Blogei begiratu diet, diseinua gehiago gustatu zait aurrekoa baino. Komiki tirak topatu ditut iritzi sailean, hau bestea… eta hor aritu naiz. Badirudi RSS jarioa ere izango duela Berria.infok. Ez da gutxi.Blogak
Blog berriak iragarri genituen atzo, eta hala da. Batzuk gaur, oraindik abiatu barik zeuden. Baina badirudi euskal kultura Internetera hurbiltzeko saiakera bat dela. Ez da gutxi. Nire ustez, blogetan belaunaldi berrietako jendea inplikatu beharko lukete. Jende gaztea pantailara hurbiltzeko. Ez horrenbeste idazle eta kultur gizon emazte, baizik eta jende ezezaguna, jende xehea. Institutoetako anekdotak, kaleko istorioak kontatuko dituena. Apal baina txukun.
zabaldu.com 
sareko argia
