-
Maite dut Zarautz
Asteburu librea Zarautzen. Itzela izan da, Putzuzulo gaztetxean software libreari buruz ikasi dudanaz gain beste kontu asko ikasteko aukera izan dut. Duda barik. Zapatuan heldu nintzenean, tailer pratiko batean topatu nituen hainbat lagun. Ordenadore gelan -dena GNU/Linux ordenadoreekin- berriz jendea konektaturik, programatzen, programak instalatzen…
Bazkari gozo batek esaten zidan, sekulako giroa egon behar zuela han asteburuan. Hitzaldiak, hizkuntzak, Catix live CD erakargarria, Euskal Herri librea mahainguru eta solasaldia… denetarik. Bokatak, garagardoak eta eztabaidak jarraitzen du. Musika entzun eta hor ari gara Putzuzulo gaztetxea utzi eta herrian bueltaka. Galdu barik.Gaua ere ederra da Zarautzen. Kale arteko abarrotsak malekoian oinez ibiltzera gonbidatzen zaitu, edo hondartzara hurbiltzeko. Marea behean dago, eta lasai ibil zaitezke oinez… hara eta hona. Ametsetan.
Eta igandean esnatzen zarenean, gaztetxea jende gehiagorekin topatzen duzu, software libreak jendea erakartzen du Multimedia tailerrera. Tresna eta aplikazio mordo bat. Gauza asko ikasteko egia esan. Filmeak, irudiak, diseinua, musika, bideoak… zer ez dagoen egiterik adibidez Ubunturekin!
Bazkari ostean berriz loaldi labur baina atsegin bat, eta esnatzean hitzaldi bat aurkeztu behar dizute… onartzen duzu eta hor zoaz gaztetxe ezin beteago batera. Hezkuntza eta software librea lehenbizi, enpresa eta software librea gera. Eta azkenik, bero izugarri baten azpian Richard Stallman.
Ehundaka lagun, adin guztietakoak Putzuzulo gaztetxean. Adi adi maisuaren lezioari entzuten. Jendea pozik dago, eta azkenean GNU mugimenduaren sortzaileak kantatzeari ekin dio. Free software song. Bi kantu. Eta jendea txaloka. Giro ona nagusi. Softare librearen giroa. Dantzariaren agurra eta plaka gaztetxeko sarreran. Zer gehiago behar da?
-
Eskaera eta eskaintza euskal kulturan
Kontzertu ttikiak ematen ari da Ruper Ordorika. Aurrekoan gurean izan zen, txukun, benetan, berbatsu, gogo izugarriagaz. Hiztun egon zen kontzertuaren ostean ere… eta mila eta bat kontu aipatu genituen garagardoak edanez. Kontzertuaren gainean idatzi zigun Julen Gabiriak, eta irakurgai duzu larrabetzu org gunean.
Berak esanda genekien Lou Reed Azkaraten egotekoa zela; eta musikagintza, kulturgintza, txirrindularitza, garai bateko kontuak… denetarik izan genuen hizpide. Garagardo batzuk edan genituen herriko Foteri tabernan.
Iruñean jo behar du gaur. Eta elkarrizketak egin dizkiote medio ezberdinetan. Batean, industria diskografikoaren harira gogoeta batzuk egiten ditu… baina txiki izatearen ideiaren gainean egin dituen gogoetak gustatu zaizkit, batez ere.Krisialdi baten erdian gaude, eta ganoraz jokatu behar dugu, ongi pentsatuz. Batzutan, minoriak garenok, gure tranpetan erortzen gara. Gutxiengoa izaki, are minoritarioago nahi dugu izan, oso selektoak gure alorrean. Eta gero edozein kolpe hartuta, hondoratu egiten gara. Oso erabaki sendoak hartu behar ditugula uste dut.
Euskal alorrean eskaintza eskaeratik oso gora dago. Idazten da irakurtzen dena baino askoz gehiago, grabatzen dira sekula entzungo ez diren diskoak, eta abar luze bat. Oso zaila da merkatu hori oinarri horietan mantentzea. Baina aldi berean badago egarri bat, interes handikoa eta oso kualifikatua den minimo bat. Gure gauzak arretaz hartzen dituena, eta hori egilearentzat oso gauza handia da. Industria minimo bat eusteko indarra izatea da gure erronka.
-
Gara RSS bidez irakurriko dut aurrerantzean ere
gara.net guneak ondorengo edukiak eskaintzen ditu RSS bidez:
Azken ordua
Jaso itzazu azken orduko berrien izenburuakHorrez gain, sailez sail ere eskaintzen ditu edukiak:
Euskal Herria Jendartea: Iritzia: Mundua: Ekonomia: Kirolak: Kultura: -
Bizkaiko sagardaoa, ona eta gozoa
Edari zaharra da sagardoa, aspaldikoa. Baina halako egunetan, sargori danean batez ere, ondo sartzen dana.
Eta atzo, Bizkaiko sagardogileek, aurten botilaratutako sagardoa aurkezten zuten Bilbon. Bilbon nintzen atzo, gora eta behera. Kale artetik, beroagaz ito beharrean, eta Kalderapekora joan nintzen. Bazkaltzeko asmotan. Freskuraren bila.
Atzo eguerdian egin zuten deskortxea, eta trikitilari eta bertsolariekin, alde zaharrean Bizkaiko sagardoa duten tabernetatik poteoa egin zuten kantuan. Lantzean lantzean, tragoa joz. Kantuan barriro.
Tarte hori aprobetxatuta, eta eurak Kalderapekora bueltatu aurretik hartu nuen lekua tabernan. Bazkaltzeko. Eta sagardo freskoa edateko. Zelan ez.
Bizkaiko sagardogileen elkartearen panfletoa eskuan hartuta jakin nuen dagoeneko 13 baserri badirela elkartean. Hasi Berriatuan eta Dimaraino; Ajangiz, Mungia, Gizaburuaga, Markina, Mendexa, Gernika, Gatika, Muxika, Zornotza eta Lezaman. Nik Uxarte baserrikoa eskatu nuen, Zorrontzako Jose Antonio Zamalloa Txanpiren sagardaoa.
Sagardotegia ezagun dot, leku polita. Etxeko oilaskoa eta EHNEko baserritarren okela egoten da normalean jateko, bera be sindikatukoa da, eta gauza hauek ondo zaintzen dituena. Eta Kalderapekon be, bazkaltzeko oilaskoa sagardotan. Itzel gozoa. Postrea gero eta kafe hotza barran.
Etxahun Lekue eta Arkaitz Estiballes bertsotan ibiliko ziren artean, Zazpi kale beroetatik gora eta behera. Sagardoagaz freskatzen beharbada. Bertsotan epeletan egon baino, gurago Kalderapekon bakarrik bazkaltzen, batekoagatik.
Bizkaiko bitsez eta
Bizkaiko lurraren
sagardao alegrea
naukazu pozarren
zelan zeuk jaten dozun
sagarrak nakarren
ez dozu izango gatxik
lartxo edan arrenXabier Amuriza
-
Irudi bakar batek adierazi dezakena
Zer ikusten duzue hemen?Bizikleta bat iluntzean izan zitekeen, edo bizikleta bat zutunik, edo non dago bizikleta zeramana? Zertarako geratu da? Nora doa? Norekin?
Argazki bat dela esango didazue… bai badakit, baina gehiago ikusi daiteke hor. Hobeto asmatzerik bai?
Ez dago dudarik, horrelako hamaika argazki egongo dira Interneten. Nik hau topatu dut gaur, iluntzen ari den une honetan… zerura begiratu eta ez da ilunago, ordulariak kontrakoa dioen arren.
Argazki hori bera egin nahi nuke, hor bertan, orain posible balitz. Lagunduidazue argazkilaria topatzen bestela…. bizikletatik jeitsi berri da eta. Nora ote doa? Zertarako geratu da, argazkia egiteko ez bada? Zer ikusten duzue zuek hemen?
-
Fermin Muguruzarekin berbetan
Fermin Muguruzak duela hilabete aurkeztu zuen Euskal Herria Jamaika clash diskoa. Donostian aurkeztu zuen jendaurrean, prentsa ere bertan zela. Gero Bartzelonan egin zuen astebeteko beste aurkezpen bat, elkarrizketak, harremanak… denetarik. Madrilen aurkezten, elkarrizketak egiten -tartean El Pais, TVE 2 Miradas, El Mundo…- ari zenean jaso zuen bere aitaren osasun egoera txarraren berri. Irunera itzuli, eta aitaren aldamenean eman zituen Fermin Muguruzak haren azken uneak.
Parisera eta Berlinera joan behar zuen, baina lehenbizi gurekin egon da, irratia.com emankizunean lagun izan dugu. Eta elkarrizketa luze eta sakona, ordubetez, egiteko aukera baliatu dugu. Musika, Euskal Herria, Jamaika, Nazioarteko egoera, politika, kultura… zer ez dugu aipatu elkarrizketa horretan! Beti bezain zorrotz, gogoetak behin eta berriro eginez, balorazioak, azken hamarkada hauen errepasoa… diskoa atera eta hilabetera eman dizkigu bere iritzi hoiek Muguruzak. Elkarrizketa sakona da, eta une batzuetan sentimendu guztiak jarri zituen Ferminek mikrofonoaren aitzinean.
Hamaika lotura, erreferentziak -musikalak zein artistikoak, munduko tokiak zein borrokak- aipatu dizkigu… Hitzjario izugarria dauka Irungoak, eta tartean gauza oso interesgarriak bota dizkigu, abesti tarteetan. Adi entzuteko moduko elkarrizketa, zinez.
Elkarrizketa gustura entzun dut beste hamaika aldiz ere. Sakontasunetik musika bezala beste hamaika bizipen eta kontakizun dauzka kontatzeko gure musikari nazioartekoenak… Entzuteko jartzen dut blogean ere. Hartu denbora, eta egin komentarioak. Blogetako jarraitzaile sutsua dela aitortu digulako Ferminek berak ere.
Entzun gura baduzue:
[audio:http://bilbohiria.com/docs/podcast/irratiacom/irratiacom060606.mp3]Blog berri honetara audio artxiboak ekartzeko asmoa daukat, balizko podcast saio baten aurrekari gisa. WordPress-ek audio plugin mordo bat dauzka, eta zenbait frogatzen ari naiz gainera.
Podcast: Play in new window | Download
-
Blogak eta garagardoak 3.0
Gara egunkariko azken orrian gaur argitaratutako kronika eta argazkiak.
Ostirala, lan guztiak amaituta, ordenadore portatila hartuta, blogariak gaztetxera jotzen du. Herriko blogariak bakarrik ez, beste toki batzuetakoak ere batu dira: Arrasatetik, Elgetatik, Andoaindik, Galdakaotik, Bilbotik edo Larrabetzutik. Berdin du nondik, baina euskal blogariak batzeko zita izan ohi dira Blogs&Beers topaketak. Garagardo artean, blogariak elkar ezagutu, berba egin eta elkarren berri izateko topagune bilakatzen dira. Orain arte, ia urte betean hiru ospatu dira; 2005eko apirilean lehenengoa -Elgetako Espaloia kafe antzokian- eta Bilboko Kafe Antzokian beranduago, 2005ko azaroan. Hirugarren zita izan da oraingoa Larrabetzuko Hori Bai gaztetxean ostiral iluntzean ospatu zena.
Deialdia Internetetik zabaltzen
Deialdiak egiteko ez dira gutunak egoten, ez da kartelik egiten normalean, Blogs&Beers 3.0 deialdia ere batez ere Internetetik zabaldu da. Post bat Interneten idatzi, eta erantzun eta trackback bidez zabaltzen da konbokatoria. Euskal Herrian, tokian tokiko blogez gain, Sustatu.com eta Zabaldu.com dira horretarako albistea hedatu eta zabaltzeko gunerik aproposak. Ostiralekoa ere horrela zabaldu zen, lehenbizi larrabetzuar blogariek zitaren berri eman eta gero sarean zabaldu zen.larrabetzu.org komunitatea
Ostiraleko ekitaldiak, blogarien topaketa izateaz gain larrabetzu.org komunitatea aurkezteko ere bazuen helburu. Blog komunitate bat, herri txikiak Interneten paratzeko aukera, teknologia berriak eta euskara suspertzea… helburu asko ditu larrabetzu.org egitasmoak. Glokalizazioa ere deitu izan zaie horrelako ekimenei. Dena dago egiteko, eta partehartzea eta jendearen arteko auzolanean burutu ohi dira horrelako proiektuak. Larrabetzuko gaztetxean ikusi zenez, blogarien artean termino hauek ohikoak dira, auzolan telematikoa egunean dago, eta softwarea euskaratzen, proiektuak aurrera ateratzen edo salaketa telematikoak egiteko orduan, blogariak beti lehen lerroan egon ohi dira.Ostiraleko ekitaldian, blogak eta garagardoak gainera musika onarekin uztartu ziren. Kingston hiria irrati emankizuna egiten duen musikazaleak, reggae musika pintxatu zuen zuzenean gaztetxean ere, eta normalean bere Interneteko emankizunetan edonork entzun dezakeen musika, kasu honetan zuzenean eskaini zuen. Bitartean beste blogariek, Klik bikoitza, 53R61, Teketen, Jozulin edo bestek ordenadore aurrean argazkiak Interneten publikatu, kronikak zuzenean idatzi eta gaztetxeko wifi konexioarekin pantaila handian bideoak erakusten zituzten. LarraB&Btzu ekitaldi honetako testuak eta irudiak jadanik Interneten daude eskuragai, eta bb3 etiketarekin aurkitu daitezke technorati.com edo flickr.com bezalako guneetan.
Ekitaldia Larrabetzun eta Txorierrin AEK egunaren aitzakiarekin antolatu diren ekitaldietatik lehena zen. Biharamunean toki berean, Larrabetzuko gaztetxean Ruper Ordorikak musika emanaldi akustikoa eskaini zuen. Kronikak eta argazkiak, zelan ez, irakurgai daude larrabetzu.org gunean, blogariren batek idatzita. Gune berean topatuko duzu gainera, datorren larunbatean, ekainak 10, AEK egunaren inguruko informazio guztia.
-
Blogs&Beers hasi da
-
Blogak eta garagardoak gaztetxean (bb3)
Eta gaur da ekainaren 2a, ostirala. Eta gaur batuko gara blogariak Larrabetzu ko gaztetxean. Reggae musika entzun, garagardoak hartu, blogak erakutsi eta pantaila handian aurkezpen ezberdinak egingo ditugu.
Blogs&Beers 3.0 honetan larrabetzu.org blog komunitatea aurkezteaz gain, eztabaida edo behintzat solasaldia piztu gura dugu. Zertarako blogak? Herri txikietako informazioa zelan zabaldu? Hori eta gehiago ditugu helburu bezala, eta ea ezer pizterik lortzen dugun sikiera.
Argazkiak zuzenean igoko ditugu Internetera, gaztetxean prestatu dugun wifi konexioa profitatuz. Zuzeneko irudiak, kanpotik jarraitu gura duenarentzat. Gogoratu bb3 etiketa proposatu dela komunitatean tag bezala.
Zure zain gaude. Beste barik.
-
Bide berri bat gaztelumendi.org blogean
Autodeterminazio garaiak bizi ditugu. Eta autonomia mugatutik, independentzia eta autogestiorako jauzia egin behar dugu. Gaur bertan. Orain. Hemen. Baita blogetan ere.
Gaztelumendi.org proiektu hau abiatu nuenetik igaro da sasoi bat. Urteak, hileak, asteak eta egunak eman ditut blogari lotuta. Sorkuntza eta eztabaida uztartzen. Gogoeta eta propaganda. Informazioa eta iritzia. Denetarik joan da, askotarik etorri da. Eta tartean izan zarete zuek, tokian tokiko irakurleak. Egia esan, asko izan zarete, harritu eta guzti egin naiz aipamena egin didazuen bakoitzean.
Autogestioa eta independentzia
Eta orain urrats berri bat emango dugu blogarekin. Autogestioa eta independentzia. Larrabetzu.org komunitatea sortu dugu, zerbitzari bat montatu dugu, wordpress 2.0 softwarea euskaldunarekin, lan talde bat teknologia berriak herri mailan lantzeko… ekimen berri bat. Eta blogthing.com laga eta gure zerbitzaritik arituko da aurrerantzean gaztelumendi.org proiektu hau, blog hauxe bera.Eman beharreko pausua izan da hau; norberak tresna guztiak eskura izanez, eta hobetzen eta garatzen joateko moduko urratsa. Pluginak jarri, diseinuak egokitu, bisitak kontrolatu, denetarik egin ahal izango dugu aurreranzean. Autonomiatik, independentziara.
Larrabetzu.org komunitatea
Eta Gaztelumendi Larrabetzuko txokoa den bezala. Gaztelumendi.org ere larrabetzu.org komunitatearen baitan egongo da aurrerantzean. Beste blog batzuk ere sortu dira, tartean Sergiorena (gure linuxzale eta hAcKERrarena). Atal teknikoan jantzia da bera, gure komunitatean bera izango da kontu teknikoetako arduraduna. Gaztea eta azkarra. Interneten eta teknologia berrietan iaioa da. Elementu ona gure proiekturako. Eta egongo dira diseinugileak, argazkilariak, blogariak, poetak, gaztetxeko lagunak… nahi duen guztia murgilduko da proiektu honetan. Larrabetzu.org komunitate bat izango delako. 1500 biztanle dituen herria, Interneteko komunitate aktiboa bilakatu nahi dugu.Larrabetzu.org blogs&beers 3.0 topaketan aurkeztuko dugu. Jendaurrean, jendearekin. Hori Bai gaztetxean wifi konexioa ere jarri dugu horretarako. Guztiok zaudete gonbidatuta.
Helbide berria: larrabetzu.org/gaztelumendi
Beraz badakizue, egokitu zuen rss irakurgailuak, aldatu harpidetzak, eta segi gaztelumendi.org irakurtzen, parte hartzen eta zuen iritziak ematen. Mila esker, orain artekoagatik bezala, aurrerantzean elkarrekin egingo dugunagatik.
