-
larrabetzu.org aurrera doa
Hilabetea sarean, eta emaitzak ikusten hasi dira. larrabetzu.org aurkeztu genuenetik, apurka apurka garatzen joan da gure komunitatea. Larrabetzu herri bizia da, kalean, auzoetan, jendearen artean, eta hori isladatu gura genuen larrabetzu.org proiektuan be.
Sergiok eta biok, geure blogak herriko zerbitzarian jarri genituen lehendabizi, larrabetzu.org bloga sortzearekin batera. Gero blog gehiago etorri dira, eta ikasturte berrirako gehiago egongo dira.
Interneten hilabete batean gauza asko gertatzen da, eta alde horretatik ere gurera egokitzen ari gara. Wiki bat, argazki galeria bat, zabaldu.com plugina, audioak entzuteko aukerak, Google analytics… gure i+g (irudimena eta gogoa / ikerketa eta garapena) taldea ere martxan dago.
Larrabetzu.org komunitatea gaur:
gaztelumendi.org Neure bloga, irakurtzen duzuen hau.
53R61 Sergio, gure herriko hackerra
kukubel 2.0 Kukubiltxo antzerki taldearen antzezlan berria
Hegoafrikatik Gure herriko bidaiariak munduan zehar
literatura, Gabriel Arestiren etxea
Argazki galeria Apurka apurka Interneteko presentzia areagotuz.
Eta proiektu berriak be etorriko dira; blog gehiago sortzeko aukera martxan dago. Herriko pelota eskolak proposamena luzatu digu dagoeneko, eta ostantzeko aukerak be sortuko dira, seguru baietz.
Aurki.com atariko herriak sailean agertzen dira dagoeneko gure feedak, eta bertan beste herri batzuetako ereduak eta ildoak aztertzeko parada daukagu. Gurea herri txikia da, baina Interneten aroan, informazioaren garaian, herriok hor egon beharra daukagu, auzolanean eta teknologia berriekin batera.Zuongandik ere, ideiak eta proposamenak espero ditugu. Ondo etorriak izango dira eta.
-
Ben Harper ez ikustearen penaz
Hasi da Bilbo live jaialdia. Pena eta amorruz gustatzen zaizkidan talde batzuk ikusi barik geratuko naiz. Hasteko lotsagarria iruditu zait Bilbon egin dutena, baina eraberean, ikusteko moduan egon diren kantari eta talde batzuk ez ikusteak pena ematen dit. Kontraesanak.Atzo arratsaldean hasi zen, Gatibuk irekitzen omen zuen jaialdia. Baina, atzo besteak beste Ben Harper kaliforniarra izan zen Kobetamendiko zelai horretan. Eta gaur, bere webgunean kantuak entzun eta entzun ari naizen honetan, horren pena daukat. Aurretik zerbait entzuna nuen, orain gehiago gustatu zait.
-
Cerquita de España
Batzuetan ez dakit zer pentsatu ere. Kanbon eguerdian hasitako etapa, bertatik ezin jarraitu eta telebistatik egin dut. Behe Nafarroatik Zuberoara, Euskal Herrian egin dute tarte zabal bat. Gertuko herriak, ikuslego euskalduna, eta SantaGrazitik gora, Auñamendietara bidean maldak gero eta gogorragoak.
Gertu gertutik jarraitzen milaka euskaldun, ikurriñak, presoen aldeko banderolak, bide ertzean euskal herrian euskaraz zioten plastikozko pankartak… denetarik. Ikusleen artean, aurten ere laranjaz jantzitako ehundaka jarraitzaile.
Eta tve-tik jarraitzen ari nintzenez, jabetu naiz zelan aipatu ere ez zuten egiten gure zalegoaren presentzia. Ignoratu egin dute guztiz. Asteak eman dituzte, opa eta opa, eta orain deus ez txirrindularitza gurtzen duen gorri berde zuri laranja horretaz. Nazionalismoaren zama. Besterik ez.
Cerquita de España
Baina deskuidoan ez zaie ba okurritu telebistako esatariei, normala dela jende asko egotea, cerquita de España dagoelako inguru guzti hau. Barrezka hasi gara tabernan. Nazionalismoa bidaiatzen ere sendatzen ez dela ikusita. Zer egingo diogu ba?
Euskal Herria atzean utzi eta Arettera heltzear zirenean, tabernatik etxerako bidea hartu dut nik ere. Kafearen gozoa ezpainetan, etxean telebista piztu dut.Samako miña
Pentsatu dut, telebistari ahotsa kendu eta Euskadi Irratia jartzea. Euskaraz ari zirelako bertan Perurena eta enparauak. Mayogatik kezkati, Gorosperi mobilera deitu diote behin eta berriz irratikoek. Azkenean lortu dute Mañarikoagaz berba egitea. Ez die esan ba, samako miñagaz dabilela Iban. Eta klaro, giputzek tautik bez ulertu. Zer izango ete zan samako min hori? Garriko miña dala deliberatu dute, instantean, duda izpi barik. Garria, zama, pisutsua, miña… hasiko ziren pentsatzen. Konturatu direnean, hanka goraino sartu dutela, teknikoren batek edo ohartarazita ziurrenik, aipatu dute, lepoko miñekin ibili dela bezperetan Iban, euren akatsa ezin zuzenduta…Etapa polita
Kontuak kontu, etapa polita izan da gaurkoa. Iñigo Landaluze oso ondo ibili da, Iñaki Isasik be bereak eta bi eman ditu gaurkoan. JuanMi Mercadok merezita irabazi du gaurko etapa, bigarren egin du Cyrill Desselek. Geroago sartu da Iñigo Landaluze.
-
Mikel Urmeneta zentsuratu du El Pais-ek
Egunero ari nintzen nire entzierro partikularra jarraitzen. Sanfermin.com gunetik jarraitzen ditut aurten Iruñeako festak, eta Mikel Urmenetaren blogean bere gau desfasatuen berri izaten dut. Gaztelaniaz polito idazten du, sortzailea dela ezin ukatu… eta euskaldun baten abenturak irakurtzea edo erantzunak jarraitzea ariketa polita izan da egunotan.
Baina zezenak harrapatu du. Kokarakinaren argazkia jarri zuen, harakin bat farlopa mozten… eta egun batzutara, argazkia moztu diote. Zentsuratua izan dela dio berak… ez dakigu. Hori dio argazkiak ere, baina inork ez du azalpenik eman.
-
Fernando Muniozguren gogoan
Fernandoren bloga: Hau ta hori ta bestia, joik buruakin postiaÂ
Donostiako KMtik Zarautzera bitarte egindako azken bidaia izango dot gogoan. Mikel Elorza, Fernando Muniozguren eta hirurok autoan, Estilo ariketak liburuaren aurkezpenean izan ostean.
Zer izango hizpide eta Zarautzen gazteek okupatu berri zuten gaztetxea. Tipo jatorra hau! pentsatu nuen. Jantzia bazela banekien, filosofia ikasketak zituela ere jakinarazi zidaten, bloga irakurtzerik besterik ez zegoen. Utzi gaitu, gogoan izango dut nik, luzaroan.
-
Zanpantzarrak tirokatu dituzte Palestinan
Uztailaren 7an, Bil’in herrizkan, Ramallahtik gertu, joaldun koadrila bat abiatu da palestinarrekin batera. Lurrak aldarrikatzen, lurrari deika. Harresia eraikitzen hasi dira han israeldarrak, eta ostiralero aldarrikapena eta mobilizazioa izaten da bertan. Gasteiztik abiatutako joaldunak, han daude egunotan, zanpantzarrarekin lurra aldarrikatzen, euskal ohituren berri eman eta zaldi buztanarekin israeldar armada uxatu gurean.
Euskaldunak han. Baina parean topatu dituzte israeldar militarrak. Zer eta tiroka hasi zaizkie, burrunbadak ikaratuta edo. Telebistan ere ikusi ditugu irudiak, sinestezina zaigun arren, Interneten bila hasi eta informazio mordoa dago, Ramallahko San Ferminari egunari buruz.
Basque and Bil’in Demonstrators Keep the Beate
Los zanpantzar hacen frente al ejército de Israel en Bil’in -
Hasi dira San Fermin jaiak
Hala Bedi irratitik entzuten ari nintzen, zelan jaiek hasi behar zuten, Iruñearekin konexioa egin zutenean, gogoak bultzatuta telebista piztu behar izan nuen. ETB jarri nuen lehenbizi, baina ahotsa kendu behar izan nien lotsaren lotsaz. San Ferminei buruz pitorik jakin ez, eta lelokeriak baino ez dituzten esaten esatariak jartzen dituzte horrelakoetan. TVE1 jarri nuen gero, eta han jaiaz, tradizioaz, ohiturak, zezenketak…. denetarik izan zuten hizpide, jaien hasieran. Irudien kalitatea antzekoa, ez dakit gainera ikurriña gehiago ez zituzten ematen TVE1 horretan.Kontua da hasi direla. Lagunak ere, kafea hartu ostean joan ziren Lesakara. Eta ni hemen. Ez dakit luzaroan aguantatuko dudan. Aurtengo hasiera ederra izan da, aurtengoa ere, eta aurretik jaiak beste astebete luzea dauka, tartean Tourra igaroko da Euskal Herritik, eta mundu guztia, planetaren txoko honetara begira dagoela ematen du…
Nik, Mikel Urmenetaren bloga hautatu dut, jai hauek jarraitzeko. El Pais egunkariak aukera hori eman dio Kukuxumusuko sortzaileari, eta berak bere erara kontatuko dizkigu Iruñeako karriketan bizitakoak. Argazkiak ere eskaintzen ditu.
SanFermin.com gunean ere, argazki asko, kronikak, encierrometroa, kamisetak, denetarik. Iruñeara joateko gogoa pizten badakizue
-
Javier Clemente botako dute
Harrigarria da, iritzia eman eta kanporatu. Pirinioetako alturak, kalte gehiago egin dio presidenteari, beste inori baino.Javier Clemente, Athletic-eko entrenatzailea gaur arratsaldean botako dute.
Kazetarien artean bolo bolo dabil albistea, batzuek zuzendaritzaren eskutik jaso dute berria, beste batzuei izkutatu egiten diete… baina arratsaldean zuzendaritza batzartuko da, ostean jakingo dugu ofizialki.
Athletic taldeak, krisi berri bati egin beharko dio aurre orain, beste behin. Entrenatzailea botatzeak gainera, ezer onik ez.
Meñakar bat, Lotina, bera izango omen da Athleticen hurrengo entrenatzailea. Apusturik egin nahi?
Nork esango luke, blog honetan ere, mundiala hala nola igarota… futbolaz jardu beharko genukenik… baina albiste bonba honi, ezin eutsi!
A todo Clemente le llega su San Fermin! esaera barria.
Gotzon Garateri beste hau irakurri diot: ohore izateko, Premin (Fermin), gutxi ta ondo itz egin. Badu zer ikasia hemen ere gure Clementek, ondo gogoan izango du aurtengo San Fermin eguna ere.
-
irratia.com: azken saioa
irratia.com 2.1 azken saio edo emankizuna. Beste ikasturte bat egin dugu uhinetan bezala Interneten ere. Podcast itxura ez dugu galdu, eta interaktibitatean gora egin dugu. Euskal Interneten panoraman murgildu eta musika, teknologia berriak eta irratigintza uztartu ditugu.
Irratigintza etiketatzen ari garela pentsatzen dugu. irratia egiteko modu berri bat abiatu genuen duela 5 urte, eta gero eta pozago gaude orduan emandako urratsarekin. Interneteko irratiaren bideragarritasuna ikusi genuen 2000. urtean… eta eskerrak! Geroztik hemen ari gara, astero astero albisteak informazio bilakatzen, elkarrizketak gogoeta eta gure jarduna irrati bidez azaltzen. Blogak eta irratia, estudioa eta konexioa, skype eta entzuleak, musika eta sorkuntza uztartzen. Irratia guzti hori eta gehiago da.
Mundutik Euskal Herrira
Euskal Herritik nazioarteraSaio berezia izango da gaurkoa ere. Bi gonbidatu izango ditugu. Batetik Jaizki gure Singapurreko entzulea. Munduari itzuli erdia emateari ekin dio Susana lagunarekin batera, hileak emango ditu Thailandia, Kanboia… eta nazioartean bidaiatzen, noizbait Gasteizera heltzeko. Bidean ordenadore bat aurkitu, eta gurekin mintzatuko da, euskaraz noski.
Orhipean hartuko dugu gero hizpide. Xamar elkarrizketatuko dugu, liburuaren edizio ezberdinak berbarako ekarrita; izan ere, gaztelaniaz, frantsesez eta ingelesez argitaratu da Orhipean liburu hori.
Entzun gura baduzu:
[audio:http://www.bilbohiria.com/docs/podcast/irratiacom/irratiacom060627.mp3]Podcast: Play in new window | Download
-
Blogetik euskaltegiko ariketara
San Juan sua barikuan. Antzerkia, musika, danborrak eta jai giroa nagusi gure herrian, eta sua. Zelan ez. Ez dut jakin, baina aurtengoan ere alkateak bereak eta bi egin ditu, oztopoak hamaika gazteek antolatutako ekitaldirik garrantzitsuenetakoa trabatzeko. Ez du lortu. Jaia arrakastatsua izan zen, beste behin.
Iazko erridikuluaren ostean, aurten be, ezin geldi egon gure herriko alkate faxista, beste izenik ez du eta. Zein alderditakoa den galdetu zidaten aurrekoan harriturik Iruñean. UPNkoa erantzun nien. Ulertuko zutelakoan. Barcinarekin ezkontzeko modukoa da Tomas Ordeñana, ondo ulertuko lukete elkar. Jeltzale egin da, inoiz nazionalista izan barik. Agintari egin da, inoiz obeditu ez badu ere, baina oraindik gure herriko alkate da, askoren borondatearen kontra, beste gehiagoren borondatez. Eta jainkoaren laguntzagaz, zelan ez. Asteburuetako pulpituetako esanek, bozkak ematen dizkiote oraindik euzko alderi jeltzaleari. Hori da gure herria.
Tira, mintza gaitezen sorginkeriaz. Akelarreaz. Sua eta festaz. Doinu debekatuez, trikitixaz. Sagardotan bustitazko txorizoaz, zeruan ikusitako su guztien azpiko gau ederra izan zelako barikukoa. Beste behin. Gurean bezala, gainontzeko euskal herri askotan ere.
blogetik euskaltegira
Iazkoa gogoan hartuta, nonbait AEK-ko didaktikariek baliagarri ikusi zuten. Jakingo duzue duela egun batzuk AEK eguna ospatu zela gure herrian, eta besteak beste blogetako zein Interneteko informazioa baliatu zuten. Euskaltegietako ikasleentzako ariketa batzuk sortu zituzten, eta besteak beste blog honetan Kale antzerkia tituluarekin iazko sanjuanen ostean idatzitakoa baliatu zuten.
Ariketa edo ataza hoiek sarean daude. Eta testua irakurri ostean, galdera eta ariketa hauek planteatzen zaizkio ikasleari:
* Hitz hauek erabilitz (zabaldu, sutan, harrituta, hitzetik hortzera) berridatzi esaldi hauek:
1. Ahoz aho herritar ia denak berriaz jabetu gara. …………
2. Jende guztia zur eta lur geratu da plazan bertan. ……………
3. San Juan bezperako giroa gori-gori dago………………….
4. Bolo-bolo ibili da albistea herrian …………………………..
* Larrabetzuko alkatea bazina, zer azalpen emango zenuke suak debekatzeko (idatz ezazu)?
*Azalpenak irakurriko ditugu eta onena aukeratuko dugu (irizpidea denon artean erabakiko dugu: logikoena, barregarriena…)
