-
Hizkuntza bizia gurea
Internetek ez du oporrik hartzen. Ez dauka pertsianarik, ordenadoreek hemen eta han, munduan bezala gure herrian konektaturik jarraitzen dute, etenik gabe. Gau eta egun.
Eta udan ere, denbora gehiago aitzaki hartuta, gauza batzuk bisitatu, beste guneren bat irakurri, bidaietako argazkiak gorde edo prentsa irakurtzen ahal dugu. Mezuak igorri eta agenda eguneratu. Lagunekin berba egin, eta kanpoan direnei ku ku batzuk bialtzen dizkiegu. Mundua bera txikiago egiten dugu udan, mundua txikiagotu egiten digu Internetek.Gurean ere, udan geldirik egon ez diren guneak eta lagunak izan dira. Internet partehartzaile, zabal eta euskaldun bat sortzen ari gara. Informazioa, aisialdia, teknologia berriei buruzko guneak, musika, irratiak… denetarik daukagu gure Internet euskaldunean.
Eta, zelan ez! Hizkuntzari buruz ere mintzo gara, filologo gehien dituen nazio batekoak izaki. Baina alta! Filologo gisa barik, erabiltzaile moduan aritzen gara hizkuntzaren gainean. Programak itzultzen dituztenak ez dira halabeharrez hizkuntzalariak, gehiago dira programatzaileak… edo….. erabiltzaile arruntak. Webguneak elikatzen dituztenak, afizioz, jakinduriaz, gogoz beteta egiten dute, eta ez dute zertan profesionalak izan behar… izan ere, Internetek hori ahalbidetu du, jendartean zabaltzea teknologia berriekiko kezka, edukiekiko ardura… eta edonork parte hartu dezake, mundu guztiak osatzen du Internet….
Eta uda honetan izan dugun aportazio ederretako bat, web gune, web orri edo web orrialde delako afera da.
Arkaitzek bota zuen, Mutilmedia beraien blog kolektiboan… web orria edo web orrialdea? Galdetzen zuen abuztuaren 28an… eta eztabaida ttiki bat sortu du, iritziak trukatu dira… ados daudenak beraien adostasuna agertu eta besteek argudioak eman dituzte… eta gero proposamen berriak, dilema ezberdinak sortu dira, horren haritik edo bestela…
Paperaz ari garenean, orri bat eta orrialde baten arteko ezberdintasuna lehenak bi alde dituela idazteko, eta bigarrenak bakarra. Azken finean web dokumentu bat paperarekin parekatu nahi izan zen, eta web dokumentu batek inoiz ez dauzka bi alde, bakarra baizik. Beraz, zergatik erabili orri hitza? Inork ez du ingelesez web sheet edo gaztelaniaz hoja web esango, eta zergatik ba euskaraz web orri bai? Orri ez da egokia web dokumentu bat adierazteko eta orrialde hitza erabili beharko genuke guztiok.
Besterik da ordea, euskaraz gero eta gehiago modu desegokian erabili ohi dugun web orria, ez soilik orrialde bat adierazteko, baizik eta gunea esateko, web site diogu ingeleses, site web frantsesez, eta página web …. kasualitatea, espainolezko itzulpen txar bat erabili ohi dugu gurean sarrien, web orria…. txarto erabilita gainera. Orria baino orrialde direlako dokumentuak… eta normalean, orrialde kopurua bat baino handiago izaten da webguneetan….Webgune erabili beharko genuken arren, komunikabideetan, sarriegi web orri erabili ohi da…beraz badaukagu, ikasturtea hastearekin batera, zer zuzendu… boligrafo gorriarekin, behin eta berriro azpimarratzen hasi barik.
……………….. ………………………… …………….
2006ko irailaren 5ean, info7 irratian eskainitako kronika. mp3 artxiboa entzungai:
[audio:http://info7.com/entzun/deskargatu.php?fitxaizena=http://www.euskalherria.com/mp3/kolaborazioak/talaiatik/20060905_eus_472.mp3&sekzioa=talaiatik&id=477]Gustatuko zaizu ere
#sfk14 Txupinazotik zuzenean
Deustuko Gazte Lokalarekin kezkatuta
Feria de Durango
-
Zer irakurtzen dugu udan?
Udan ez dut ordenadorea itzali. Saiatu naiz blogari treguarik ez ematen, mantsoago beharbada… baina idatzi, idatzi dut. Basoan eman ditut egun batzuk; Gaztelumenditik Iratira eta han ere topatu genuen wifiarekin kafea hartzeko ostaturik. Bueltan, herrian jaia eta martxa, txurundata eta patxanga… lo egiteko denborarik bez, eta nor hasiko spamak borratu eta ezer idazten. Gogo gitxi holakoetan.
Egia esan, jai giroan gauza asko pasatu ohi da burutik, eta zirriborro batzuk egitea izango litzateke agian horrelakoetan onena… baina keba! gu txoznatik gaztetxera, gaztetxetik tabernetara, egunez eta gauez jo ta ke ibili gara Andramarietan. Gure herriko jaietan.Eta orain, gelaren bakardadean, apaletara begiratu eta buruari galdetzen diozu: – zer irakurtzen dugu udan?
Galdera kolaboratiboa egin gura nuke. Itaunari, trackback bidez, edo erantzun arrunt moduan -gurago baduzue- erantzun dakioke.
Zer irakurtzen dugu udan?
…eta zuek gura duzuena bota. Hemen edo zuen blogean, zuen koadernoan. Loturak egingo ditugu. Irakurketak gomendatuko, ariketa berri bat. Galdera erantzun kolaboratiboak, hari bat sortuz, blogetik blogera. Liburuak aipatuz, edo komikiak, edo artikuluak…. nork daki? Agian ez dugu deus irakurri, agian liburu mordoa dira… udako irakurketak, horra hor gaia.
Mesanotxeari begira egon naiz une batez; ETAren azken komunikatua oraindik hor dago… jaien biharamuna noiz pasako zain, Nabarra aldizkariaren azken zenbaki biak ere eskuetatik ihes ez egiteko moduan ditut. Eta gero liburu gomendagarri zenbait:Miguel Unamunokoa, Mikel eta Iñaki Sotok idatzia (Elkar biografiak). Unamunoren lehen biografia euskalduna. Interesgarria oso Sototarrek egindako lana. Gustura irakurtzen da, atsegina da, eta sorpresak hartzen dira. Esandakoa; interesgarria eta atsegina.
Arana Goiriren pentsamentu politikoa, Joxe Azurmendik (Hordago) aspaldi samar kaleratutakoa, eta apaletan topatu dudana. Herriko jeltzaleek nazionalismoaz asko ez dakitela ikusita, beraiena ideologia baino estatusa dela autoafirmatzeko egin dudan ariketa. Bestetik, asko gozatu dut orduko Joxe Azurmendiren jarrera eta idazteko moduarekin. Orduko giroak erakarri nau, kontestuak…. -Azurmendirena, ez Sabinoreana eh!- baina hala ere, Arana Goirik; Unamunok baino gutxiago egin dit kili kili.
Poemas a la madre Africa, Xosé Lois GarcÃak Angolako XX. mendeko poesiarekin batutako antologia bat. Angolara begira pasa dut uda hau. 30 urte dira independentzia eskuratu zuenetik. Mundialean ere, lehendabiziko biderrez izan da bere futbol selekzioa, eta Agustinho Netoren biografia eder eta txukun bat eskuratu nuen abenduan Lisboan. Orain bere poemak, eta bere garaikideenak berrirakurtzeko aukera izan dut. Lantzean behin irakurteko atseginak.
Bilduma eder bat, guk Euskal Herrian, oraindik osatu ez duguna, liburu batean. Baina etorriko da hori ere, XX. mendeko poemen antologia bat. Bere garaian, XX. mendeko poeten antologia ederra plazaratu zuen Koldo Izagirrek.Eta zuek? Zer irakurri duzue?
-
eitb24.com: Nabarmen gehitu da Interneten blogen kopurua
Harritzekoa!
Datu bat hartu teletipotik, zelan edo halan euskaratu (nahiko trakets sarritan) eta albiste bilakatu. Datu bat hartu eta informazio bihurtu. Berdin du New York, London edo Zamudion. Berdin du atzo izan, gaur edo bihar. Egunean 24 ordu albisteak ematen -eta ez sortzen- egotea da kontua.
Hartu noticia hau eta esango didazue. Blogak hizpide hartu, eta Euskal Herriko egoera aintzat hartu ez. Datu bat bera ere ez, loturarik ere ez. Hau da gurean informazioa emateko modua. Hori bai, udablog txatxu horren irudia jarriko dizute alboan, eurak ere bloga dutela adierazteko.
Aztertu dezagun titularra: Nabarmen gehitu da Interneten blogen kopurua. Ona! Esatea zeukaten, 100 milioi blog egongo direal 2007an adibidez. Bikoiztu egiten dela aldiro aldiro blog kopurua. Keba! Nabarmen gehitu da kopurua… hori da zehaztasuna. Hori da albiste deigarria egitea.
Blogak eta eitb24.com
Aspalditik jarraitzen du gure eitb24.com hori. Albistegi bezala txarra iruditzen zait, iturri asko, agentzia asko, langile asko ditu eitb24.com egitasmo horrek, baina Interneteko hizkuntzan ez du asmatzen. Ez da erreferentzia. Eta orduro orduro, euskaraz eta gaztelaniaz, irratitik eta telebistatik aipatzen duten arren, ez da erreferentzia informatiboa Interneten. Ez behintzat gure artean. EITBko gainontzeko langileek ere ez dutela erabiltzen pentsatzen dut, ez dela tresna egokia beraien albistegietarako, beraien erreportaiak egiteko orduan.
Blogosferan ere, ez da erreferentzia. Gutxitan linkatzen dugu, ez bada kritikatzeko. Informazio berezitua, informazio espezializatu gutxi sortzen du. 24 orduz ari dira lanean, baina ez digute abantailarik eskaintzen. Eta pena da. Pena da, euskararen inguruan Interneten dagoen faktoriarik handiena delako hemen. Zamudioko parke teknologikoan, tresna guztiak, nahi beste langile eta beharrezko tekniko guztiak izan arren, ez dutelako asmatzen.
Baina inork ez du dimititzen. Ezgaitasuna nabarmena den arren, Lontxo Sainz bezalako kazetari ezjakinak ditu zuzendaritzan. Hori da EITB. Udan bezala, urte osoan, eta 24 orduz gainera.
Nabarmen gehitu da gai ez direnen kopurua.
Loturak:
-
Aupa Iñaki
argazkia: etengabe.org
Jendetza Lezaman. Omenaldia Iñaki Rike bertako semeari. Ia 18 urte urte espetxean egona. Lezamarra, abertzalea. Baionan hil zen uztailaren 27an.
Nekez uzten du bere lurra zuhaitzak
ez bada abaildu eta oholetanEz du niniak begia uzten
ez bada erroi edo arrubioen mokoetanNekez uzten du gezalak itsasoa
ez hareharriak basamortuaEz du liliak udaberria uzten
ez elurrak zuritasunaBere sorterria nekez uzten du
sustraiak han dituenakGustatuko zaizu ere
Oskar Alegria eta biok
Fermin Muguruzarekin berbetan
Ustelkeria: han eta hurbilago
-
Aezkoatik wifi bidez
Gazte eguna arrakastatsu. Astelehenean San Inazio. PNVren sorrera duela 110 urte, ETArena 59an edo, Hori Bai gazte elkartearena 1965an…. eta aurrera goaz. Gure herriko gaztetxeak, Loiolakoa barik, bere eguna ospatzen du urtero. Festa eguna. Herri bazkaria, karta jokoa, musika kalean, eromeria eta beste kontu asko.
Herri giroa. Parranda. Eta abuztuan ajea.Batzuk kostaldera, besteak mendira. Eguzkitara edo gerizpetara. Mugitzea da kontua. Gero jaietan kontatu ahal izateko bakoitza non egon den. Zenbat ordu eman dituen eguzkipean, zenbat milako igo dituen pirineotan edo ze kontzertu ikusi dituen Afrikako punta. Ipar zein Hegoaldean.
Aezkoara etorria naiz ni, Irati aldera. Giro lasaia, lo egiteko altura ona, eguzkitsu atzo, euri artean gaur. Eta Orbaran, wifia daukan guinness garagardoak topatu ditugu. Etxeko lanak egiteko ordenadore zuri hau ekarri genuenez, kafearekin, edo garagardoarekin konektatzen gara Euskal Herrira. Pirineora heltzen ez den euskarazko prentsako titularrak irakurri, rss harpidetza guztiei jaramon egin, eta spam apur bat borratzen dugu gure posta kontuetatik.
larrabetzu.org zerbitzarian dauden argazkiei begiratuta dakigu zeinen arrakastatsua izan den Gazte eguna. Eta laister, jaiak berriro herrian, Andramariek 06, eta barriro ere juerga eta parranda.
Bitartean, Irati aldean txango batzuk egin, errekan bainu freskoak hartu, jatordu onak ospatu, eta datorrenari aurre egiteko prestatu. Aezkoatik, biba zuek!
-
Honek eman du | Hizlandia bukatu da
Iñigo Aranbarriren Hizlandian ibili denetakoa naiz. Letrak, hitzak, komunikazioa, prentsa, kazetaritza maite dugunontzat, sagardo ederra izan da Hizlandiakoa. Garratz batzutan, gozo sarri, azukera gitxigaz gehienetan… ia astelehenero irakurri ditut Iñigorenak domekako Berrian. Pena hartzen dut, dauden kazetaritza fakultate guztiak baino eskola hobea den hori desagertuko delako. Baina bestetik, Iñigo Hizlandiak bahituta egon dela somatzen dut. Iñigo idazlea, Iñigo sortzailea, Iñigo editorea, Iñigo Aranbarri.
Azkena be, gordetzeko modukoa, duda barik. Gogoeta serio bat gaurko kazetaritzaz. Hemen eta munduan.
Andoain erdialdeko jatetxe bat, orain dela bi urte pasatxo. Mahaian, egunkari honetako hiru lagun nituen zain. Proposamen bat zekarten, ez nolanahikoa. Ordura arte -esan dezadan lasai: orain arte- inguruko hedabideek ez zuten zerbait nahi zutela jakinarazi zidaten, gozorik gabea, autokritikoa, eta ea egingo nuen.
– Egunkariaren jarraipen bat nahi diagu, publikoa, errukirik gabea.
– Press ombudsman moduko bat?
– Ez, irakurlearen defendatzailea zuzendariaren defendatzailea duk horrelakoetan. Zorrotzagoa. Ez amore emaile.
Laguntza eskaini zitzaidan, blindajea etxe barruan lana behaztopa eta sostorrik gabe egin nezan. Etxearekin kritikoak izango ziren begi-eskuak nahi zituzten, beste inork eskaintzen ez zuen zerbait, osasungarri zelakoan, erredakzioan langileren bat gaitzitu arren. Berritik zuenagatik, errazegi heldu nion alaia muturreko malutari, atuna nintzen, amuan preso, eta hala irten nuen ostatutik, zeri eman nion baietza ondoegi jakin gaberik. Ez genekien une jakin batzuetakoa izango zen edo hamabosterokoa. Ez genekien nora zihoan bidea, ez zenbatean behin kaleratu ahal izango genuen. Asterokoa izateko, gehiegizko martxa neritzon. Gainera, egunkari txukuna izanik, ez zegoen hainbeste gauza ere zortzi egunean behin ahoz gora esateko. Hasi arte.
-
Gazte bitaminak
Badira 20 urte Hori Bai gazte elkartean murgildu nintzela. 1985ean lehen rock kontzertua egin zen Larrabetzun: Bap! Ximorrak, Kortatu eta Zarama izan genituen herrian. Gu ume moko batzuk ginen, auzoen arteko futbito partidua antolatu ziguten Hori Baiko gazteek. Eta pozik parte hartu genuen handiek bezala. Eta gero, gau hartakoa gure bizitzako lehen rock kontzertua izango zen. Bide berri bat.
Orduan ezagutu genituen BAP!ekoak, eurekaz berba egin genuelako; gainera, Andoandik jende piloa etorri zen Larrabetzura bizikletaz; Kortatukoek lehen lana zuten kalean (Mierda de Ciudad, Manolo Rastaman…) Jotakie, Cicatriz eta Kontuz Hi!rekin batera. Zaramaren kantuak ikastolan entzunak genituen, euskaraz zirelako, rocka euskaraz atsegin genuen ikastolan.1985. urtean 20 urte betetzen zituen Larrabetzuko Hori Bai gazte elkarteak. 20. urteurren hori lokal barik ospatu zen, gazteentzako lokalak aldarrikatuz. Hurrengo urtean ere kontzertua egin zen herrian, eta hurrengoan, eta baita hurrengoan ere.. urtero…. gazte eguna izendapenarekin. Rocka, hitzaldiak, bazkaria, ekitaldi ezberdinak… mugimendu berri bat, 80. hamarkadatik aurrera.
80. hamarkadako mugimendua(k)
1986ko gabonetan, lokala berreskuratu zen, okupatuz. Konponketak egin, argia eskuratu… eta olentzeroren oparirik onena izan zen hura. Larrabetzuk luzaroan bizi izan duen oparia. Ordurako mendira joaten ginen gu Hori Baiegaz. Baina handik aurrera, gurre herriak ere, Larrabetzu -k izango zuen gaztetxea. Asanbladak, batzordeak, batzarrak, aktak… kartelak, kontzertuak… bizitzan aurrera egin ahala, bide berrietan murgiltzen hasi ginen. Mugimendu sozial aberatsa izan da gaztetxeena. Tokian tokikoa bezala, baita Euskal Herri mailakoa ere, nazioarteko squat mugimenduaren irudi, ikur eta adierazpenekin. Herri bat gaztetxe bat! lemapean mobilizazioak egiten hasi ziren orduan Euskal Herri osoan.Musika lagun, kontzertuak, adierazpen kulturalak. Herri nortasuna eta izaera errespetatuz, gazteek herriarentzat makina bat ekitaldi antolatu ditugu urteotan. Urte asko, borroka asko. Gorabeherak. Haserreak. Enfrentamendua. Subentzioa ukatu, lokala desalojatzeko mehatxu etengabeak. Kamisetak, txapak, kartelak… zer egiten ez dugu ikasi Hori Bai gaztetxean. Mendira joan gara, Euskal Herria ezagutu dugu, militantzia ezberdinak uztartzen ikasi, mugimendu sozial alternatiboen txoko eta kultur erreferentzia bakarra herrian: areto, antzoki, zinema, jolastoki, eskola, euskaltegi… denetarik egiten da gure Hori Bai gaztetxean. Denetarik egiten dugu. Denetarik egingo da aurrerantzean be.
Gazte Eguna 2006
Eta bart, Gazte Eguna ospatu dugu. Beste behin. Gazte bitaminak topera. Juerga, gogoa, ilusioa, indarra, antolaketa eta kalean neurtzeko modukoak. Indarberrituta, ilusioz gainezka. Freskura eta gozotasuna. Gazte bitaminak. Eta goizean, gazteagoak direnekin gosaltzean… pentsamenduak joan egin zaizkit. Zirikatu egiten gaituzte. Historia oroitu gura dute, barre egiten dugu, elkar bazilatu…. eta 20 urteotako ibilbidea etortzen zait burura bapatean. Jatorrak dira oraingo Hori Baiko gazteak. Ausartak dira, trebeak, sekulako irudimena daukate… eta beraien ondoan edozertan ibiltzea gozada hutsa da. Berandu da, baina ez zara logura. Zelan ba?!
Eskerrik asko, Hori Bai. Bizitza honetan gertatu zaigun gauza ederrenetako bat daukazue esku artean. Eutsi, gozatu. Barre egin, zirikatu. Beti aurrera begira. Zapaltzaileei egurra. Kolorez eta ilusioz margotu Larrabetzu. Ametsez bete Andra Mari kaleko 23a. Aurrera bolie!Gustatuko zaizu ere
Tokiko garapena eta berrikuntza
barkatu, ama
Larrabetzu Eskura webapp eta Badok.info
-
Gazte eguna ( larrabetzu )
Heldu da, gaur da Gazte Eguna Larrabetzun.
Kartela programa eta argazkiak
Gure herria, Larrabetzu pozik jartzen da, alai, gogotsu egun honi aurre egiteko. Hori Bai gazte elkarteak antolatutako jaia da, gaztetxetik herrira, herritik Euskal Herrira. Jende asko, giro ona, musika, rock&rolla, garai bateko debekuek PNVren jarrera itxia agerian utzi zuten. Debekuen gainetik, gaztetxeak jai hau antolatzen jarraitu zuen, normaltasun guztiarekin. Antolaketa ona, Euskal Herriko zein atzerriko taldeak ekarriaz 1500 biztanle ez zituen herri txiki honetara.
1998tik, gaztetxea ere irekita egoten da gazte egunean. Disko jartzaileak egoten dira bertan, eta gaur ere aukera egongo da Makala eta Aritz sound system entzuteko. Musika ona, giroa, dantzarako uneak gaurkoak. Gonbidatuta zaude zu ere.
Argazkiak atara eta larrabetzu org gunean zintzilikatuko ditugu. Kronika bat zuzenean. Eta hemen daude, orain arteko lehenengo argazkiak.
-
Bloga izotzarekin
Telefonoa joka ari da. Hartu eta irratitik ari dira. Uda da, badakizu, eta albiste lehortea dago. Txoririk ez da hil, kulturgintza geldi dago, UEUri buruz aritzeak nekatu egiten du… eta esatariari burura etorri zaio kolaboratzailea.
zer egiten du blogari batek udan? Erreportaia izan zitekeen, eta jende ezberdina elkarrizketatu. Hitz egin zitekeen tourraz, oporretaz, jaien gainean, kontertuei buruz, ekonomiaren gorabeherak, nazioarteko egoera, futbola, hondartzak edo Azkunari buruz. Baietz esan nien, duda asko barik. Kazetaritza interpretatzeko gai bagara, egoerak bultzatuta horrelakoak gertatzen dira.
Irratiko eskaleta bete behar, eta elkartasuna adierazi behar zaio uztailean lanean ari denari. Berba egingo dugu, blogari buruz. Udari buruz. Azken asteotan idatzitakoari buruz gura baduzue. Ez dago arazorik. Irratia ala hil!
Eta azken post hauetan idatzitakoaz jardun gara. Zutabelari batek, bere azken zutabeen azalpenak emango balitu bezala, baina irratitik. Bilbo live, Tourra, San Ferminak…. denetarik.
Bloga izotzarekin eskatuko dut hurrengoan. Ea zer ateratzen didaten.
-
Hibai Castro “Palestinarren duintasuna eredugarria da”
Izenburua: Palestina, hesien zirrikitutik
Egilea:Hibai Castro
Argitaratzailea: Komite Internazionalistak
Informazioa: www.herriak.org
Deustuko Hibai Castrok Palestinari buruzko ikusentzunezko lana egin du. Palestinan brigadista bezala egon zen Komite Internazionalistak erakundearekin, eta bertan batutako irudiekin hango egoera isladatu gura du hemen. Prest! aldizkarirako egindako elkarrizketa argitaratuko dut hemen, gaiak hartu duen jitea ikusita.
Hibai Castro: Palestinarren duintasuna eredugarria da
Palestina, hesien zirrikitutik bideoa aurkeztu duzu duela gutxi, zer batu duzu lan horretan.
Palestinan bizi den egoeraren berri ematen du bideoak. Bideo didaktiko bat egitea zen asmoa, bertako gatazkaren oinarriak, egunerokotasuna eta Israelen okupazio militarraren eragina azaltzeko. Iazko uztailean Komite Internazionalistek antolaturiko brigadan jasotako irudi eta materialean oinarrituta dago.Eta zerk bultzatu zintuen horrelako ikusentzunezko lan bat egitera?
Zalantza barik Palestinan bizi den zapalkuntza egoerak eta injustiziak daukaten oihartzun eskasak eta jasaten duen blokeo mediatikoak. Bestalde, Palestinarekiko elkartasuna bultzatzeko egoeraren ezagutza eta kontzientziazioa ezinbestekoa da eta horretarako tresna baliogarria izan daitekeela uste dut. Komiteen oinarrietako bat da jendartea kontzientziatzea, salaketa politikoa egitearekin batera.Bideoa zelan mugituko duzue orain?.
Alde batetik aurkezpen edo hitzaldi formatoan mugitzen ari gara. Sortzen zaizkigun eskaera guztiei irekita gaude eta dagoeneko hainbat tokitan (gaztetxeak, kultur elkarteak, tabernak…) erakutsi dugu. Beste alde batetik ikastetxeetan Palestinaren inguruko kanpaina bat prestatzen ari gara eta hor ere erabiliko dugu. Bide batez, aipatu daiteke uztailean San Inazioko jaietan eta abuztuan Larrabetzun ere erakutsiko dugula lan hau.Palestinan brigadista bezala egon zinen, zer nolako esperientzia izan zen?
Latza eta ederra. Oso egoera gogorra bizi dute han eta horren lekuko izatea latza da. Batez ere Israelen inpunitatearen aurrean indarge ikusten duzulako zeure burua. Hala ere, palestinarren duintasuna eredugarria da eta hori ezagutzeko aukera izateak benetan merezi du.Une latzak une honetan Palestinan, urruntasunetik zelan ikusten duzu palestinar herria?
Ikaragarria da gertatzen ari dena. Orain garbi dago duela urtebete handik etorrita saltasen genuina. Israelek Gaza uzten zuen baina, zertarako? Ba orain lasai-lasai suntsitu ahal izateko, bere koloniak oztopo izan barik. Eta Libano eta Siriakoa? Salatzekoa da nazioarteko gobernuek, gure ordezkatzen gaituztenak barne, duten jarrera konplizea sarraski hauen aurrean.Komite Internazionalistak eta beste erakunde batzuek elkartasunera deitzen dute, baina zer egin daiteke?
Lehendabizi palestinarrei entzun; eta haiek diotena da hemen ezin dugula Israel estatu normalizatu moduan onartu. Ezin dugu onartu gure kirol lehiaketetan, kultur ekitaldietan, merkataritza harremanetan… Boikot orokorra egin behar zaio.Eta etorkizuna zelan ikusten duzu?
Palestinarrek ez dute etsiko, hori argi ikusi genuen. Nazioartean dago gako garrantzitsu bat, nazioarteko presioak bultzada eman behar dio palestinar herriaren erresistentziari, bestela oso zaila izango du biziraupena. Israelen helburua mapatik ezabatzea da eta Palestinak bizi behar du!
sareko argia
