euskal blogen aldeko manifestua – blogosfera.eus –

Euskal blogak bultzatu eta hedatzeko helburua du manifestu txiki honek.
Urteak dira blogak abiatu , eta bertan edukiak sortzen ditugula.
Idatzi dugu hontaz eta hartaz. Eztabaidatu dugu. Ezagutu dugu. Ikasten saiatu gara.
Garatu dugu eta sortu dugu. Berritu dugu eta ikertu dugu.
Ondo pasatu dugu. Ez gara haserretu.

Bloga bloga mariñela! euskal blogak bogan…
barearen ostean dator ekaitza
baina ez dira betiko garai onenak


horregatik zurekin dantzatu nahi nuke….

Eta astero blogak irakurri, iruzkindu eta bultzatzeko xedearekin konpromisio hauek hartuko ditugu:

  • Astero blog bat aipatu.
  • Sare sozialetan norberaren zein gustuko ditugun blogak aipatu edo komentatu.
  • Besteen blogean komentarioak egin.
  • Eztabaidak bultzatu, kanpainak animatu, edukiak sortu eta jende berria erakarri.

 

atsegin ditut

Nik atsegin ditut blog hauek, eta jarraitu ohi ditut. Ezagutzen ditudan hauetatik abiatuko naiz blogak hedatu eta ezagutzera emateko zereginean. Apurka apurka.
01sarean

sarean.com Jabi Zabalaren blog aitzindaria. Euskaldunon EGUNKARIA itxi zutenan sortu zuen, ordurarte Interneti buruz idatzitako artikuluekin.
Lehen blog pertsonala izan zen euskaraz, eta urteotan gauza interesgarri asko eta asko idatzi ditu. Gaur egun Jabik Bilboko Kafe Antzokia eta Zenbat Gara elkartearen inguruko Internet estrategia guztia kudeatzen du (sareak, sare sozialak, mezua, irudia…). 2000. urtean irratia.com sortu genuen elkarrrekin.

03maitego

maitego.com Maite Goñi blogari eta irakaslearen gune pertsonala. Aurretik euskaljakintza.com sortu zuen ikasle ezberdinekin, eta sekulako arrakasta izan zuen ikastetxean bezela handik kanpo ere. Gaur egun hezkuntza eta teknologia berrien artean daukagun aditurik onena da. Langilea, nekaezina, komunikatzaile ona eta irribarrea galtzen ez duen laguna da Maite.

02iturri
iturri.eus   
Mikel Iturria irundar eibarnauta donostiartuaren bloga da. Badu es bertsioa ere bai. Eta gure edukiak gaztelaniara pasatzen sekulako lana egiten du. Kultur munduan ari da Mikel donostiakulturan eta gauza askori buruz pasioz idazten duen laguna da. Blogarekin temati eta gogotsu jarraitzen duen horietakoa Iturria, eta horregatik arretaz jarraitzen ditugu bere pausuak, bere iritziak, bere planteamenduak. Bloga bloga mariñela! aldarri oihuaren sortzaile, bere oihartzuna urrutira heldu daiteke.

08teknopataTeknopataren txokoa da teknopata.eus eta Joxe Rojas bere frikiak bizi du. Eta tankera honetako bloga sortu eta egiten aitzindaria da Etxebarriko euskaltzale hau. Topagunean eta Tokikom-en buru belarri, ikerketa eta garapena da bere fuertea, komunikaziotik eta euskaraz. Gailuak, joerak, rollo frikia, euskalgintza eta aurrerapenak, bideoak, umorea… denetarik eta ona aurkituko duzu aspalditik hobetzen eta garatzen ari den blog honetan.

 

 

04boligorriaBoligrafo gorria Batez ere kultura. Noizean behin iritzi sendoak botatzen dituen ARGIA aldizkariko kazetaria da Gorka Bereziartua. Eremulauak hartan ezagutu genuen, eta gero kulturan esanguratsua izan de proiektu literarioeren batean ere parte hartu izan du. Zirikatzaileagoa ezagutu dugu, baina bere artikuluek oraindik gauza asko iradokitzen dizkigute. Aldizkariko edo ARGIAko guneko artikuluak eta blogerako beren beregi idatzitakoak uztartzen ditu, maisuki. Kultura interesatzen bazaizu, pentsamendua eta gogoeta sakonak gura badituzu, boli gorriarekin azpimarratuta datoz bere artikuluak.

 

05hanetahmenhan eta hemen. Bea Salaberri idazle eta AEKko irakasle beteranoaren bloga. Baionak ez daki liburua ezagutzen duzu? Ba idazle gisa ezagutu aurretik blogean idazten zuen. Bere ikuspegia berezia da, ezberdina, femeninoa agian… baina zorrotza. Umoretsua. Eta oso interesgarria.
Uste dut gure artean dagoen blogari onena dela. Iparraldeko neska euskalduna. Ezin beltzago.

 

12laborategialaborategia.eus David Martinez bermeotar hackerraren azken bloga. Informatikaria da eta dibulgazioan lan asko egindakoa. Gogoetak gurekin partekatzen ditu, eta copyleft eta software librearen aldeko mezua hedatzen buru belarri ari denetakoa.
Euskal blogosfera tresna bere ekarpenetako bat izan zen, eta orain, horren bakarrik gaudenean faltan botatzen dugu. Ea bata bestea aipatzen hasi garen honetan, berak zer dioen, bere iritziak fundamentalak iruditzen zaizkit eta. Euskal blogosferaren aldeko manifestu kolektibo batean, asko aportatuko lukela uste dut.

 

 

blog kolektiboak | albisteak | bestelakoak

11sustatusustatu aspaldiko erreferentzia da. Aitzindaria. Teknofiloen albistegia. Moderatua. Goienak sortu zuen eta Codesyntaxek kudeatzen du gaur egun.

 

 

 

10zuzeuzuzeu berriagoa da, profesionala. Irekia firma askorentzat. Zarata asko somatzen da iruzkingileen artean, baina garai batzuetan oso jarraitua izan da. Ekipo sendoa dauka atzetik, teknologikoki, kazetaritza ikuspegitik eta enpresa egituratik.

 

06etzipmetzi.pm Talaios kooperatibaren komunikazio tresna bat da. Artikulugile ezberdinen partehartzearekin, etorkizunera begiratzen duten piezeak biltzen ditu bere baitan.

 

 

 

07berriolaberriola naiz plus ataleko informazio biltzailea da. Bateko eta besteko albiste, bideo, bitxikeri eta informazio ezberdina ekartzen du naiz atarira. Euskaldunon artean gauza biralik badago, berriolak bere berri eman duelako ere izango da, besteak beste. Batean eta bestean zer egosten den jakiteko funtsezkoa.

 

 

 

09emailuakLiteratur Emailuak Susa argitaletxearen blog itxurako albistegia da. armiarma.eus proiektuaren baitan, asteroko Emailuan liburu berriak, efemerideak, sarean eskura dauden liburu eta idazleak, ekitaldien agenda eta beste gauza gehiago ere badaude.

 

______________________

Iritziak, komentarioak, proposamen gehiago onartzen ditut. Azken finean feed back apur bat sortzea da helburua. Eta apurka apurka blogosfera euskalduna ezagutzera ematea.


Please follow and like us:

3 thoughts on “euskal blogen aldeko manifestua – blogosfera.eus –

  1. Nik beti dut bost treneko beranta, normala da e !
    Beraz zure deiari erantzuteko, garbi da euskal blogak beharrezkoak direla eta horien inguruko/ horiei buruzko dinamika oro ongi etorria. Erran gabe doa.
    Halere, nago ez dela bakarrik holako aitorpen baten bidez berpiztuko dudala deus. Zeren, horretan egia duzu, baitu zenbait hilabete dinamika apalduz doala alde horretatik. Nik aitortzen dut : gutxiago idazten dut. Baina gutxiago irakurtzen ere.

    Badira hortik Azkuek plazaratu datuak. Datugintza inportantea iduritzen zait baina nik tendentzia nuke identifikatzen entseatzeko zerk egiten duen palanka efetua.
    Ene kasuan aipatuko dut, hori baitakit zein zen.
    Hasi nintzelarik blog bat idazten hainbat gauza beteak ziren :
    – Banuen zerbait erraiteko.
    – Banuen denbora eta gogoa horretarako.
    – Banuen ezagutza teknikorik nahikoa bakarrik egiteko.
    – Bazen posibilitatea errazki sortzeko nonahi, nehorren menpe, nehorri asimilaturik edo loturik izan gabe.
    – Blogak gauzarik arruntenak ziren eta hainbat gauza bideratzeko, enbotatzeko, gehitzeko aukerak ere baziren.
    – Bloga egoitza finkoak ziren, norbanakoarenak, vitrinak, biltegiak, hots gune zentralak.

    Gaurko egunean hainbat gauza aldatu dira. Batzuk garatuz :
    – blogez gain beste hamaika tresna badira. Hots iritziak barreiatuak dira eta tendentzia da denetan, karaktere gutxitan bi iruzkin arin egiteko, deus ez zentratua, iraunkorra edo dena delakoa.
    – komunikatzen denaren bolumena, kantitatea biderkatua da. Irisgarritasuna gauza biziki erlatiboa da.
    – garaiak aldatu dira, garai batzuetan ematen du gehiago badela erraiteko, besteetan baino.
    – zahartu naiz (eta behar bada prioritate aldaketa gertatu zait).

    Beste gauza batzuk ez dakit noraino aldatu diren :
    – jendearen gaitasun teknikoa adbz, zinez garatu da ? Ala ustea da ?
    – analisia eta trukerako gogoa ? Ene inguruan, egunkaririk ez du nehork irakurtzen eta ozenki erraiten du : « zertarako irakurri zutabe osoak ? Bi lerrotan laburturik agertzen bada nonbait ? » ez dakit erremediorik ote duen. Aldiz zerk galkatzen du ?
    – indibidualismoa, jendeak duen futilitaterako gogoa, « off » sakatzeko gogoa… emendatu dira.

    Jarrai daiteke, ez naiz aditua, zuk jakinen duzu nik baino gehiago horretaz.
    Iduritzen zait dinamika bat sortu behar bada, berpiztu dena delakoa, hutsunearen arrazoina ontsa identifikatzea eta palankak ere ezartzea.

    Halere, blogintza-edo, ene ustez, bada forma onean. Ez letrazkoa, idatzia, txoko batean antolatua eta abar. Baina norbanakoak egiten dituen ekarpen txikiak, forma desberdinetakoak, dudarik gabe biderkatu dira forman (bideo, artxibo partekatu, soinu, irudi…). Aldiz barreiatuagoak dira : festival bat da, jendeak baditu gauzak denetan, inon ez zentratuak, inondik ez molde ordenatu batean bildurik, hedaturik lau haizetara, sakontasun gutxirekin, etab…

    Bon, Patxi, honaino eman dit burmuinak gaur. Ongi ibili !

  2. A eta beste gauza bat: imaginazioa eta blogen funtzioak asmatu behar dira.

    Funtzio asko ukan ditzake.
    Adibidez, irakasle gisa, ikusten dizkiot meta bat! Sortu material konpartitzeko, ikasleekin sortzeko gauzak, ikasleak berak sortzeko portfolio moduan, news-orri txukunak egin daitezke lantaldeetarako, … Erran nahi dut blog bat norberaren buruaren komunikatzeko, ongi da, baina hori 1.0 garaia da. Eta agian kostatzen zaigu gainditzea.

    Nahi baduzu hartu dut kurtso bat horri buruz duela gutxi! Pasako dizut! “definition des stratégies numériques aux services des stratégies d’entreprise” 😉 😛

  3. Aupa Patxi!

    Nik ere bat egiten dut Euskal Blogen Aldeko Manifestuarekin. Blog propiorekin edo post idazle moduan baino sarriago ibili naiz editore moduan azken urteetan, eta bai ni ere ibili naiz kezkatua blogosferaren osasunarekin, baina urte hauetan ere sustatu dugu Etzi.pm utopikoon blog kolektiboa, eta sustatzen jarraituko dugu.

    Manifestuari ekarpena eginez konpromisoa hartzen dut: Etzin gehiagotan idazteko, besteen idatzietan iruzkin gehiago egiteko, Etziko iruzkinei bisibilitatea emateko, sare sozialetan blog eduki gehiago zabaltzeko konzienteki, eta Dabidek proposatu duen Larrabetzuko bazkari/bileran parte hartzeko.

    Aitzina!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude