-
Argi geratu da, ezta?
argazkia: ahtgelditu.orgNahiz Guardia Zibilaren kontrolak, nahiz Miren Azkarataren kriminalizazio eta desitxuraketa saiakerak, nahiz Jaurlaritzaren oztopo eta trabak, nahiz komunikabide nagusien izkutaketa eta desinformazioa… argazki hau luzaroan izango dugu gogoan.
Arrasateko mobilizazioa, orain arteko handiena izan da Abiadura Handiko Trenaren kontrako burrukan. Abiapuntu berri bat, estabaida soziala galdegiteko, inposaketari aurre egiteko… eta gizarte mugimendu herritarra bultzatzeko. -
Arrasaten Abiadura Handiko Trenaren kontra
Gaur ere ez gara geldirik egongo, ez horixe. Egunero daukagu zeozer gure herri honetan. Herri hau kudeatzen dutenek atsedena hartuko dute asteburuan, soldatak igo berri dituzte eta pozik egongo dira bere atsedenlekuetan, skiatzen, paseatzen, hipermerkatuetan dirua gastatzen…
Apalagooi, Udalaitz defendatzea tokatzen zaigu, mendira joaten jarraitu ahal izateko. Abiadura bizikletaz neurtzen dugun arren, trena sarriago erabili gura genuke, Zarautzera joateko, inoiz Gasteizera joateko, Bilboko alde zaharrera hurbiltzeko… baina hori ez, hoiek ez daude berrikuntzetarako. Madrilekin lotu behar dugu, Paris dugu begiko. Baina Euskal Herrian patxada ibiltzeko ez daukagu tren egokirik.
Badirudi, inposaketaz Y hori onartu behar dugula. Halabeharrez. Eta zelan diren kontuak, herritarrek iritzia eman ahal izan duten kasu guztietan, trenaren kontrako bozak izan dira nagusi. Kontsultaz berba egingo digute gero, jario etengabean.
Abiadura handiko trenetan ibilia naiz, Frantzian, ibilia naiz Madriletik Kordobara ere. Eta? Ez dut beharrezko ikusten halakorik gurean. Gitxiago egin behar duten txikizioa ikusi ostean. Mapetara begira aritu -mila esker herri ekimenari horregatik- eta informazioa gero eta gehiago eduki, argiago daukat ez dugula behar horrelako obrarik.
Baina, aste honetan ere, gero eta nabarmenago geratu dira jeltzaleen asmoak. Praileaitzen argi ikusi da zerk mugitzen dituen, harriak eta ez herriak. Harria errepide berriak egiteko. Praileaitzen balio historikoa, artistikoak… beraiei bost. Badute Gugemheim. Badute Kursaal. Badute Y. Badute sekulako muturra. Jeltzaleek obrak gura dituzte. Makinaria ezin da gelditu. Baimenak, tramitazioak, soldatak. Abiadura. Nora joateko? Zertan gastatzeko.
Badirudi herri mugimendua asko azkartu dela aspaldion, zantzo politak ikusten dizkiot hedatzen ari den gizarte mugimendu honi. Horregatik ere, gaur Arrasatera joango gara hainbat herritar. Autobus bete. Kontatuko dizuegu, handik bueltatzean.
-
Bertsoak Interneten
Lehen iragarkia, spota, webgunea begiratzean, itzela begitandu zitzaidan. Asmo eder bat, jendearen partehartzearekin gauzatu behar zena. Eta denborak -laburra gainera- erakutsi du, posible dela. Jokoa, lehia, sustraituta daude gurean, eta maletilla.gara.net bada horren adibide.Adibide xumea da. Baina aukera asko zabaltzen dituena. Bertsolaritza, txapelketa giroa, Interneteko euskarriak aprobetxatu dituzte. Zezenketen irudiak ere, kalte baino on gehiago egin die gainera.
Spota lehenbizi
Gara egunkariaren edizio digitalean ikusi genuen spota. Youtuben euskaldunok zintzilikatu ohi ditugun bideoak baino landuagoa. Bertsolariak -Andoni Egaña, Xabier Silveira, Maialen Lujanbio eta Xabier Paya- zezenplazaren erdian. Zezenarena eginez. Maletillak ateratzen dira gero, aurre eginez, beraien bertso edo koplak abestuz. Hasiera ona, gonbidapena egina.
Spot honek, harrera ona izan bide du sarean. Youtubekoak 1.000 deskarga baino gehiago izan ditu, EuskalTubekoak berriz, 300 inguru. Horrez gain, GARA.net gunean bertan ikusitakoak ere marka ona jarriko zuten, dudarik gabe.
“Ondo pasatu dugu”
Josebarekin hizketan, ondo pasatu dutela adierazi digu. Spota grabatzen, bertsolariekin elkalanean, kanpaina prestatzen. Eta areago, emaitzak ikusita, pozago egongo dira. Pozerako motiboak dira, dudarik gabe.
Partehartze eredugarria
Eta datuak ere eman dizkigu Josebak. 350 partehartzaile erregistraturik gara.net-eko joko honetan. 1500 bertso baino gehiago tarte honetan. Edukiak, partehartzaileek jarri dituzte. Internet eta partehartzea beraz, eskutik doaz, beste behin.
Gauza jakina da, azken urteotan bertso foroek duten arrakasta, bertso forofoak ere gero eta gehiago diren neurrian. Baina ez da gauza bera, bertsolaritzaz iritzia ematea, edo bertsotan iritzia ematea. Gehiago pantaila aurrean, eta tabernatik kanpo. Horregatik, datu politak iruditu zaizkit niri ere.Sareko oihartzuna
Kezkatu nau ordea, sarean ez duela horrenbesteko presentziarik izan gaiak. Saiatu ez direlako? Jaramonik egin ez diogulako? Komunikabideei beste begi batekin begiratzen diogulako? Zabaldun adibidez, erabiltzaileon 7 boto baino ez zituen eskuratu gaiak. Sustatu batek, ez aipatzeak ere atentzioa deitu dit. Albistegarri da, berez. GARA delako boikota egin dio baten batek? Zalantzak dauzkat. G puntuan berriz, oihartzuna ez ezik elkarlana topatu du Maletillen lehiaketak. Sikiera.elkarrizketa irratia.com emankizunean
Guk, sarean gertatzen denari astero egiten diogun begirada horretan, gaia aipatu gura izan dugu. Interesgarria begitandu eta elkarrizketa egin. Datuak aportatuta, esperientzia ona izan dela ezin uko egin. Sariketa, eta bukaerako afaria ere ez da txantxa izango, maletillen matxinada eta lau bertsolarien partehartzearekin Astigarragako sagardotegi batean. Zer gehiago behar da ba, gure festa nazionala ospatzeko?Elkarrizketa entzun gura baduzu:
[audio:http://bilbohiria.com/docs/podcast/irratiacom/irratiacom071212.mp3]Eta hara non, hemen eta han ari nintzela GARAko zuzendariaren post bat ere irakurri dudan. Datuak ematen ditu berak ere, eta ikusgai jarri du kanpaina honetako making off bat. Sarean eskuratu dut kodea, eta blogean jartzea erabaki dut.
Podcast: Play in new window | Download
-
Ordu beteko etena | 18/98+ elkartasuna eta gehiago
Gaur, abenduak 13 ostegunez. Ordu beteko lanuzte, geldialdi, mobilizazioa egingo da Euskal Herrian.
Nik ere, blogean horren berri utzi nahi nuke. Ordubetez, afitxa egongo da ikusgai.
Eguneraketa:
Larrabetzuko plazan hainbat jende batu da ordubetez. Etorri dira langileak, tabernariak, antzerkigileak, eskolako irakasleak, udaletxeko langileren bat, auzokideak, etxekoandreak, bazkaltzeko ordua aprobetxatu duen umetxoren bat, ama batzuk, bertsolariak, autonomoak, kamiolariak, baserritarrak
Larrabetzuko plazan elkartasuna adierazi diegu 18/98 sumarioan atxilotutako euskaldunei. -
gauez bide ertzean
Lanetik etxera nihoan, lasai. Mezularia nuen entzuteko autoko irratian. Gaua da Kanpazar gainean. Ez dago bidea azkar ibiltzeko, ez nik ere gogo larregirik horretarako.
Kanpazar behera, gauez. Argi urdinak bide erdian. Polizia Nazionala omen. Kontrola. Geldi. Stop. Leihoa jeitsi eta linterna batekin begiratu dute auto barnera. Eskumatara. Stop.
Karneta. Autoko agiriak. Jeisteko. Atzeko atea ireki dute bi polizia nazionalek. Autotik aldentzeko. Nor naizen. -¿Ha estado detenido alguna vez? Ezetz. ¿Seguro? Ziur nik, ez dut jakingo ba!
Autora hurbildu naute, dena miatzen ari dira. Autotik aldentzeko berriz, furgoneta baten albora. Paisanoz jantzitako kaputxadun bat da burua. Nire gidatzeko baimena faltsifikatuta dagoela esaten dit. Lasai nago ni, dei dezala trafikora nahi badu.
Beste polizia batek besotik heldu eta urrutiratu egin nau. Autoko ate guztiak zabaldu dituzte dagoeneko. Goitik behera miatzen ari dira. Paperak, egunkariak, aldizkariak, iPoda, mp3 bat, diskoak, agenda… GARA egunkari bat eraman dute furgonetara. Ondoan geratu dira El Pais eta Berria.
Koldo Izagirreri egin nion elkarrizketa bat daukat paperean inprimatuta, gustatu bide zaie, irakurtzen aritu dira. Angolillori buruzkoa zen elkarrizketan, aspaldi Ekintza Zuzena aldizkarian argitaratua, berriki blogean jarri nuena. Adi daude poliziak. 100 urte geroago.
Gaua da. Ilun. Argi urdinak bakarrik. Auto gehienak aurrera doaz. Batenbat gelditu dute. Bakarrik nago bide ertzean. Hotz egiten du. Ez dut berotzerik nahi ordea. Luze doaz minutuak. Beldurtzen hasi naiz.
Etorri da kaputxaduna. Non bizi naizen. Norekin. Joan da berriz ere. Furgoneta barruan norbaitekin ari da hizketan. Datuak konprobatzen arituko da. Neure alde. Etorri da furgonetako gidaria. Gidatzeko baimena eta autoaren paperak dakartza. Dena zuzen. Joateko.
Ezetz beste polizia batek, eta miatzen jarraitzen dute. Geldi ni. Joateko desiatzen. Luzeago zaizkit minutuak. Hotzago orain. Urduriago. Joateko gogoz.
Azkenean baietz, joateko. Dena zuzen. Hankaz gora itxi dute autoa. Autoa martxan jarri eta banoa Elorriorantz. Telefonoz etxera deitu, eta lasai egoteko. Kafe bero bat eskatu dut Parran. Elorrioko alkatea bertan. Berbetan hasi gara. Lasaitu naiz.
Autoa berriro hartu eta lasaiago noa etxera. Non hobeto etxean baino.
Eta orain, atzokoa kontatzen dudan une honetan, etxerantz joan behar dut berriz ere. Kanpazar igo behar dut. Kanpazar jeitsi. Etxera nahi dut, lehenbaitlehen.
-
herrikultura.org
Aktualitateari so, Durangoko azokak ekarri duen eztabaida iragarri gura izan dut aste honetako Infozazpi irratiko kronikan. Internet lekuko baino ez da izango, posta zerrenda bat delako finean herrikultura.org guneko egitasmo nagusia.Posta zerrendan jende asko ari da izena ematen, eta alde horretatik eztabaida interesgarria suertatuko dela atzeman daiteke. Baina hori, egunerokoak esango du. Kultura, merkantilizazioa, merkatua, herri kultura… parametro interesgarrietan kokatu da eztabaida bera.
Musikherria bezalako ekimena, txalogarria da hasieratik. Musikariak batu, eta disko ekoizpenetik haratago, ekimen ugari ari baitira bideratzen. Eztabaida hau ere, Musikherriatik etorri arren, modu zabalago batean planteatu dutenez, aldekoak baino ez ditu niretzat.
Durangoko azoka, merkatu handi bat da. Hiper Eroski batetik gehiago du, bestetik baino. Han batzen gara denok. Baina helburuak ez luke izan behar saltzea bakarrik. Nork helduko dio katuari buztanetik? Hori da koska hori. Horretan gabiltza.
 Herri kultura .org Infozazpi irratian entzun gura baduzu:
[audio:http://www.info7.com/wp-content/uploads/2007/12/20071211_57.mp3]Podcast: Play in new window | Download
Gustatuko zaizu ere
Deustuko Gazte Lokalarekin kezkatuta
#sfk14 Txupinazotik zuzenean
Feria de Durango
-
Azokak EZtaBAIda piztu du Durangon, ez da gitxi
Sarritan mintzatu gara horretaz. Lagunartean, idazleekin, musikariekin, kolektibo ezberdinetako jendearekin. Orain eztabaidak funtsa hartu du, eztabaidatzeko marko bat –posta zerrenda bat hasieran- sortu da.
Ez da gutxi. Eztabaida beharrezkoa da. Kulturaren merkantilizazioa nabarmena da. Azokaren kolore bakarrerako joera honek -ia dena da ELKAR– kezka ere sortu du askorengan. Euskara eta beste hizkuntzen arteko aferak bere buruhausteak ematen ditu.
Liburuak diskoak eta zenbat gauza gehiagoren azoka da Durangokoa? Urtero ari gara horretaz, baina titularretan zer den salduena baino ez dugu irakurtzen ahal.
Ondo etorria izan bedi eztabaida, eman izena posta zerrendan, eta jarraitu dezagun berbetan, erosi ditugun bideo, disko, jostailu, kantu, liburu, komiki eta aldizkariak irakurri entzun ikusi eta pratikan jartzen ditugun bitartean.
herrikultura.org Eztabaida interesgarri bat.
-
irratia.com 100: mila esker guztioi
Heldu zen abenduaren 5a, gaueko 22:00ak eta blogari, lagun eta entzuleak Kafe Antzokian. Urduri geunden gu, azken ukituak ematen emanaldia hasteko jendea zain musikariak prest teknikariak adi…. musika, sintonia, bideoak, lagunak… dena prest.
argazkiak: iMamonEta bi orduko emanaldia eskaini genuen. Akats ttiki batzuk, intentsitate handia, giro oso ona, umorea, kantuak -eskerrik asko Gu, Petti, Txuma, Piperpolis, Josu…- gonbidatu bereziak, Kukubiltxo eta Josu Kamara, Bilbo Hiria irratiko lagunak -Ane, Txuma, Mieltxo-, Bartzelonatik etorritako Olentzero eta Igotz, Myjok kolektiboa Burp aurkezten…
Zuzenean ari ginen, irratitik, Internetetik, Kafe antzokiti. Twitter bidez entzuleen berotasuna jasoz, Txiokari begira…
Ez dugu erraz ahaztuko. Mila esker Mr Johnson. Katixak arrazoi zuen.
Info+
Imanolek argazki sorta ederra eskaini digu. Denak batera ikusteko
Kronika polita idatzi du Mikel Iturriak ere. eus + es
irratia.com blogean argitaratutako kronika zehatzagoa.
-
Irratien sarea, irratiak eta sarea, sareko irratia
Asteon asko lotsatu barik irratia.com hartu dut hizpide asteroko mikrosaion. Talaiatik deitzen dioten kolaboratzaileoon tarte horretan, hurbiletik ezagutzen dudan proiektua aurkeztu dut, eta gainera info7 irratian ere asteazkenero entzuten denez gure emankizuna, aproposa zela iruditu zait.irratia.com egiten dugunok, gogoa eta ilusioa jarri dugu abenduaren 5eko saio berezian, eta horregatik eskura ditugun euskarri, ideia, eta mikrofono guztiak baliatu ditugu. Aurrekontu barik, emanaldi atsegin, interesante, dibertigarri, kritiko, zorrotz eta txukun bat egitea deliberatu genuen… eta gauean ikusiko da lortu dugun edo ez.
Entzun gura baduzu:
[audio:http://www.info7.com/wp-content/uploads/2007/12/20071204_18.mp3]
Info7 irratiak webgune berria dauka orain. Podcast, rss jario, albisteak eta beste hamaika nobedade.Podcast: Play in new window | Download
-
// publizitatea //
Gustatuko zaizu ere
visca zuek!
euskal blogen aldeko manifestua – blogosfera.eus –
[ leihotik mundura ] 20:20
