Wiki bidezko deialdia, izenematea eta beste. Orain arten egin izan ditugu blog&beers euskaldun batzuk. Orain blogaren ordez wikia izan da, eta garagardoak edo bestelakoak FArrasateko kdd honetan. Ni ere geldituko naiz.

Aspaldiko lagunak ikusi, berba egin, eta proiektu berriak ahotan izango ditugu. 2.0 susperraldiari geure ekarpena egingo diogu, hori ziur. Eta bestelako gaiak ere sortuko dira. Baina, hori bai, oraingoan ordenadore barik ibiliko gara. Haririk gabe eta bestelakorik gabe. Gure artean berba egin, eta tabernarik taberna. Arrasateko kaleetan. Hala ere, gadget_zale hauek bestelako tresna mordoa ere izango dituzte eskuartean: azken belaunaldiko mugikorrak, hamaika pixeldun argazki kamerak, kantu zaharrak entzuteko mp3 berrienak, eta bestelako tramankuluak.

Lantzean behin ondo dago, bestelako loturak sortzeko aproposak dira. http:// albo batera laga, eta aurrez aurre egoteko. Euskal Herrian bezala, munduan ere beti egin izan den moduan. Eta egingo. Zu ere Arrasatera hurbiltzeko garaiz zabiltza oraindik.

Badira zenbait aste, behin eta berriro euskal blogosferaren berri izateko aurkira jo, eta Data Base error mezuarekin topo egiten dudala.
Badira zenbait egun, zerbait idatzi behar dudala pentsatzen ari naizela.

Aurki Eibar.org elkarteak sortu zuen, bilatzaile bezala hasieran (DMOZ proiektuaren barne) eta euskal blogosferaren planeta bilakatu zen gero. Ehundaka gunetako RSS jarioa profitatutz, gure komunitateari sekulako indarra eta kohesioa emanez.

Erori da eta ez dirudi altxatzeko asmorik dagoenik. Ez dago enpresa pribaturik, ez dago erakunderik… eta badirudi ez dela garrantzitsua. Bokazio publikoa izanik, sekulako tresna iruditzen zait Aurki. Horrela jakinarazi izan diet beti sortzailei, eta blogei buruz mintzatu behar dudan aldiro aipatzen dut Aurki.com

Itxaroten nekatu naiz, eta pentsatzen dut beste asko ere antzera egongo zaretela. Eta mezu hau eibartarrak probokatzeko asmoarekin eginda dago, ea komunitatearen presioz edo…. aurki martxan jartzea lortzen duten, lortzen dugun.

H4u ir4kur7z3k0 g41 b4z4r4, b3n374n l4gun f4lt4n z4r4, z04z k0rr1k4 k4l3r4!

Ez da beste albisterik izan aste hauetan Interneten, iragan martitzenean Googlek You Tube erosi zuela aipatu zenetik. Google Interneko bilatzailerik arrakastatsuena da eta You tube, egunero milaka eta milaka bideo eskaintzen dituen hodi lodia.

Ez da urtea izango Youtube gero eta ezagunagoa bilakatzen hasi zela Interneten. Norberak egindako bideoak, sarera igo eta edonork edonondik ikusteko modukoak gainera. Umorea, salaketa, txisteak, irudiak, lagunak, ospakizunak, kontzertuak, pasadizoak… denetarik ikusi ahal izan dugu hodi lodiak eskainita. Milioika lagunek igo eta jeitsitako bideoak, milioika bideozale eta bideo ikuslez osatutako sare erraldoi bat, Internet bera bezalakoa.

Eta egon badaude bideoak ikusi eta eskaintzeko bestelako plataformak ere, daylimotion, google videos bera edo beste hainbat…. baina arrakastatsuena youtube izan da, duda barik. bi gaztek duela urtebete sortua, eta azkenean Googlek erosi duena, 1650 milioi dolar akzioetan jarrita. YouTube norbaitek erosi behar ote zuen zurrumurrua zabaltzen hasi zen Interneten bertan, eta azkenean nork eta Interneteko handienak, google bilatzaileak, erosi egin du. Youtubek bere bidea egiten jarraituko du, nortasuna galdu barik. Eta Google bilatzaileak bere aldetik, ez du bideoen saila kenduko… garatu eta hobetu egin beharko du ziurrenik, eta Youtubek duen arrakasta eta oihartzuna baliatu beharko ditu, bere zerbitzuen hobetzeko. Eta orain, google handiago bilakatuko da, tresna onenak sortu eta garatzearen ondorioz…. Google-ek Internet osoa kontrolatuko du. Orain arte gutxi kontrolatzen badu…

Youtube ez da arrotza euskaldunontzat, basque jarri eta manifetako bideoak, surf irudiak, kontzertuetako zatiak, euskaldunon pasadizoak ikusten ditugu pantailaratuta. Basque etiketa bat baino gehiago da youtube bezalako Interneteko zerbitzuetan… basque da munduari begiratzeko modu bat, munduan izateko manera bat…. munduan, google baliatuz, gu bilatzeko era. Bideoan edo bilatzailean… berdin du, basque bezala topatu edo ikusi behar gaituzte. Gureak 1650 milioi baino gehiago balio duen arren…

Entzun gura baduzu: [audio:http://info7.com/entzun/deskargatu.php?fitxaizena=http://www.euskalherria.com/mp3/kolaborazioak/talaiatik/20061017_eus_626.mp3&sekzioa=talaiatik&id=626]

Izena eman nuen, eta antza denez gehiagok ere bai. Gaur 16 lagun hasi gara ikastaroan, eta beste kanpo ateetan geratu dira. Euskarazko ikastaroak urriak dira materia hauetan, baina ari gara horretan ere. Blogei eta teknologia berriei buruzko hainbat ikastaro eta hitzaldi eman eta kordinatu ostean, ikasle moduan joan naiz Eibarrera. UEUra.
Gorka Julio Teketen dugu irakasle. Lana erruz egiten du, hitzaldietarako RSSa baino jario potenteagoa dauka, ikasle ona izan dela nabari zaio, eta sekulako aurkezpenak prestatzen ditu pantailarekin.

Mundu ikaragarri interesgarria da web 2.0 delakoarena, eta asko dago ikasteko eta sakontzeko. Zeozer dakigulakoan, ur berrietan sakontzeko aukera ematen dute horrelako ikastaroek. Ondokoarekin, modu kolaboratiboan gauza berriak egiteko ideiak eta sortzen dira. Eta niri, gaur, pasatu zaizkit batzuk burutik.

Ondoan nuen Morau. Abeslaria eta AEK-ko irakaslea azken urteotan. Musikazalea naizelako aspalditik ezagutzen nuen, baina e-learning asuntuetan ari da aspaldion euskaltegiko lanetan. Euskal Herria 2.0 jardunaldietan ere izan zen, eta mahaian balizko blog batzuen zirriborroak sortu ditugu. Eta ziur naiz, gauza potentea egin dezakela berak, gehien maite eta ezagutzen duenari buruz: musika.

Ikastaroan gustura hasi gara, asko daukagu oraindik ikasteko eta lantzeko. Sakontzeko eta frogatzeko. Hamaseikotea gaude, hezkuntza eta enpresa mundukoak gehienak… blogosferara gehikuntza potentea izango da talde honena, ziur aski. Ikusteko dago.