-
Enric Duran ekintzailearekin berbetan
Iruñean gosaldu, egunkaria irakurri eta alde zaharretik mugitzea, dena bat. Karriketatik oinez, lagun bat, ezagun hori, norako, harako. Eta Eguzki irratiaren estudio berrietara.
Zuzenean ari da Fertxu Izquierdo, Pasealeku bere magazine interesgarrian. Eguzki irratiak gogotsu ekin dio denboraldi berriari, eta goizeko apustua da magazinea. Ordu beteko Iruñerriko edukiak eskaini ostean Hala Bedi irratiaren Suelta la olla entzuten da FMko 107.0an, eta eguzki.net webgunean.
Giro onean, estudiotik Enric Duran atera den arte. Aupa! aupa! eta berbetan hasi arte. Zer moduz? -zer galdetuko diozu, kartzelatik atera den berriari, sekulakoak eta bi egin ostean-.
Bartzelonako giroaz, Berlinen ezagutu ginenekoa, gerora burutu diren zenbait proiektu, egokitu beharrean diren software eta gune batzuk, burruken norabideak…. elkarrizketa arin eta atsegina. Tipoa bezala.
Burrukalari nekaezina da Enric Duran. Eta atzo hitzaldia eman zuen Zabaldin. Gainezka aretoa, emankorra hitzaldia. Pantaila handi bat eta guzti baliatu behar izan zuten, eta jendea pozik, Kapitalismo barik bizi daitekela amesten.
-
“Gurea bezalako hizkuntza minorizatu batentzat beste garrantzi bat hartzen du euskarazko irratiak”
Argia.com Jakoba Errekondoren berbak dira. Euskadi Irratian 25 urte eman ditu landarei, loreei, inusketei eta solo, jardin eta arbola kontuen ganean berbetan. Astero.
Gogoeta ordea ez da bere jardunaren gainekoa, hizkuntzaren eta irratigintzaren inguruan aspaldion entzun dudan gauzarik zentsuzkoena dela iruditzen baitzait.
Hego Euskal Herrian, nago garrantzia gitxiegi ematen ote zaien oraindik irratiei. Telebistaren ondoan apal, egunkarien alboan arin. Baina orduro orduro, hor izaten gaituzte albistegiek engantxatuta, ordu hiletan gure musikaz aspertuta behar izaten ditugu irratiok.
Komunikazio alternatiboaren eremuan, oso tresna garrantzitsuak izan dira irratiak, irrati libreak batipat.
Interneten aroan, gauza ikusgarriagoei jarri zaie arreta guztia. Baina nago, gurea bezalako herri, kultura eta hizkuntza batentzako, garrantzitsuak direla oso, uhinetan bezala sarean ere.
Jakoba Errekondoren elkarrizketa entzun nuen Euskadi Irratian, baina gerora be, emango digu zer pentsa gogoeta txiki eta ausart honek. -
Pragatik bueltan #eumozcamp09 itzel baten ostean
Mozillaren Europako bilkuratik etorri berria naiz. Garatzaile, lokalizatzaile, garapen eta marketing arduradun, kolaboratzaile eta beste askok bat egin dugu asteburu batez Txekiar errepublikako hiriburuan. Mozilla Camp 09.
Asko ikasi, gauza interesgarriak ezagutu, eztabaidatu eta ekimen berriak proposatu ostean, orain nork bere komunitatean jarraitu beharko du lanean.
Nik neuk hainbat gogoeta dakartzat handik, eta apurka apurka apunteetan botako ditut, Pragan twitter bidez aletu ditudanak. Apurka apurka, han jasotako guztia barneratu eta buruan argitzen joan ostean.
Hitzaldi interesgarriak, Kaliforniatik etorritako arduradunen proposamenak, komunitate ezberdinetako kideen iritziak… denak batu dira mozillacamp honetan.
Hitzaldi interesgarri bat: Drumbeat
Drumbeat Mozilla fundazioak Web irekiaren alde abiatuko duen ekimena izango da. Sozializazioa, ezagupena, web irekiaren defentsa, ekitaldiak, newsletter ezberdinak… gurean ondo ulertzeko Zaindu maite duzun hori bat izango da, hirulau berbetan eta euskarazko adibide batekin azalduta.Mark Surman Mozillako arduradunetako batek oso hitzaldi polita eman zuen honen inguruan. Gero tailer batean garatzen jarraitu genuena, adibidez hornitzen, burua nekatzen… ariketak egiten. Hitzaldia sarean jarri du, mozcamp honetan emandako hitzaldiaren audioarekin batera.
Mozilla Drumbeat – MozCamp Europe 2009View more documents from Mark Surman.Firefox nabigatzaileak 5 urte
5 urte egingo ditu aurki Mozilla Firefox nabigatzaileak, eta euskaldunok lehenengo bertsiotik daukagu euskaraz. Hori zelan ospatu pentsatzen hasi beharko genuke, besteak beste. Baina tira, komunitatea indartzeko neurria eta ezagutzera emateko ekimenak izango dira hoiek .Badakizue lagunok, ideiak ongi etorriak, asmoak gauzatzeko dira eta.
-
Trena gelditzeko zuhaitzetan eskegita
Goierrin -Itsasondoko baso baten- zuhaitz gainera igo eta bertan ematen dituzte egunak eta gauak Abiadura Handiko Trenaren kontrako ekintzaile batzuk.
Goierrin, telebistak eman du albistea, AHTaren kontrako komunikatua oso osorik eta irudiekin eskainiz.
Goierrin, hainbat herritan galdeketak egin eta herritarrek trenaren kontrako jarrera argia azladu dute.
Goierrin, zuhaitz gainetik esango diote orain ezetz basoak, azkar, arin, abiadura itzelarekin suntsitzeari.
Goierrin…
< Tokiko telebisten webgunetik hartutako albistea. -
Ezin gozoago Arantza
Aspaldi ez nuen bere berri. Baina Josu Orbek bere blogeko sarrera zabaltzeko bota duenean, irakurtzen hasi eta Zornotzako Arantza etorri zait burura. Blogean murgildu, irakurtzen hasi, argazkiak ikusi… eta, bera da ta!
Urteak dira ikusten ez nuela, badakit Estatu Batuetara joana zela, ez nekiena zen horrelako saltsatan zebilenik. Janari argazkilari, erreposteria erreportari edo. Blog eta webgune izugarri politak ditu: arangoyoaga.com eta cannelle-vanille.
50 of the world’s best food blogs
Hau ezustekoa Timesonline aldizkari digitalean, munduko food blog onenen artean bigarrena izendatu dutela jakitean. Arrazoi du Josuk, ez da albiste. Nik uste interesgarria dela kontua, euskal talentua hedatu beharra dagoela. Eta jatekoak tartean direnean, estilismoa ere badugula euskaldunok. Batzuk behinik behin bai.
Musika kontzertuak gogoan
Nik Zorrontzako neska hura dut gogoan, power pop musika izugarri gustatu eta kontzertuetara beti joateko prest zegoena. Ingelesez ondo mintzatu eta taldekide guztiak ezagutzen zituenak. Egin genituen kontzertu batzuk elkarrekin, erosi nituen pastel batzuk ere bere amaren gozotegian. Eta orain twitter bidez jarraituko ditut bere gozoak. Eta Yo la tengo taldearen kantu bati play sakatuko diot. Gogoratzeko. -
Goenkaleko presoen omenaldia
Errepresioari, debekuei eta judikaturari tururu! egitea ere badago.
Amnistiaren aldeko gestorek, ziri ederra sartu diote oraingoan, Arralden presoen aldeko ekitaldia deituta.
Aski izan da kartela askatu.org webgunean zintzilikatzea, Dignidad y Justicia talde faxistak, bere debekua eskatzeko. Gero etorri da judikatura, eta prentsa espainola. Jugada konpletoa. Zer, nola eta zergatik egiten duten agerian utzi dute.
Arralde ETBko herri garrantzitsuena zela bagenekien euskaldunok. Horrenbeste denboraldi eta gero ezagutu ditugu bertako herritarrak, GARA irakurtzen duten ertzainak, txantxuiloak dituzten alkate inongo alderditakoak, gazteen problematika drogazalea, senideen arteko arazoak, harremanen korapiloak…. egia esan Goenkalek, urte hauek guztietan askorako eman du.
Azkena baina, fikiziorik onena izan da. Imajina ezin genezakeen lekura eroan dute Arralde: Audientzia Nazionalera.
Dignidad y Justicia, Garzon, ABC, La Razon…. guztiek amua jan eta lotsagarri geratu dira, zer eta kartel bat agertu delako sarean, Arraldeko presoen aldeko ekitaldira deituz.
Futbito edo mus txapelketak debekatu, kantaldiak suspendituarazi, manifestazioak jipoitu, etxeko presoen argazkiak zituzten tabernak Audientzia horretara deitu ostean…. edozer imajinatu genezakeen.Askatu.org gunean baina, balizko ekitaldiko irudiak ere jarri dituzte. Goenkaleko aktoreak atxilotuta, protestan…. denetarik.
-
blog arkeologia egiten
Ez, ez naiz Aranzadin sartu. Ez naiz gerra zibilean fusilatutako gudari eta errepublikarrak lurpean bilatzen hasi. Ez naiz aspaldiko garaitara joan, ez dut dinosaurorik topatuko nire saiakeran.
Bloga sortu nitueneko testuen xerka ibili naiz, eta archive.org gune ezin miresgarriagoak eskaini dizkit 2004ko abendutik idatzi nituenak. Geroagokoak, hemen dituzu, eskumako zutabean hilez hile eta urtero sailkatuak.
Aspaldiko irudi bat | gaztelumendi.org zaharra © cc-by-sa: gaztelumendi2004ko abenduan hasi nintzen blogari moduan idazten, eta a ze martxa hilabete hartakoa. Josu Landa lagunak ere ederrak bota zituen lubaki honetatik.
Ez dakit asko edo gitxi den bost urteko tartea. Ez dakit, niri atoan joan zaizkit… denetarik bizi izan dut gainera bost urteotan, eta bizitako asko eta asko letra eta bit artean jaurti ditut gainera. Beste asko gorde ere egingo nituen, eta isilpean oroitu, edo ezin konta daitezkelako, edo lotsagarri arituko nintzatekelako beharbada. Bost urte, idazten eta kontatzen. Zirikatzen eta entzuten. Ikusten eta ikasten. Bost urte lubaki digital honetan.
gaztelumendi.org 2006ko irailean edo… | gaztelumendi.org berriagoa © cc-by-sa: gaztelumendi
Eta garrantzitsuena dena, jarraitzeko gogotsu. Idazteko, ikasteko, sortzeko ilusioarekin. i+g departamentuan, kalean, lagunartean, mendian, kortan… edonon ikasten delako, sortzen delako, asmatzen dugulako.pottdata: apurka apurka orduko post zaharrenak be ekarriko ditut hona blog honetara; 2004ko abenduko post haietako batzuk ekarri ditudan moduan. Eskumako zutabean dagoz ikusgai.
-
EHZ herri bat zuzenean, mila bizipen
Heletatik idazten ari, kanpoan pilotari eta bertsolariak, bi gau, 30 kontzertutik goiti, giro paregabea, gau ederrak, lagun asko, lagun berri gehiago….
Batzutan zaila egiten zaigu azken 14 urte hauetan EHZ festibalean bizitakoa azaltzea. Amets bat da EHZ. Gauzapen pratiko eta militante bat. Euskal Herrian ez da besterik holakorik. Konpromezua, lana, hizkuntza, kultura eta… herri bat zuenean azken finean.Aldudarrak bideoa, mila eskerManu Chao festibalera etortzeak; biderkatu egin du festibalaren erakargarritasuna, jende kopurua, giroa, antolakuntzaren buruhausteak, sarrerak… baina bizitakoa ere hunkigarria izan zen. Une batez, 1985eko uztailaren 7an bizitakoa berriz ospatu genuenean.
Sarri Sarri kantuak, zentsura gainditzen du, Jai Alai Katunbi express bira gogoratzen digu. Bi musikari handiren lana goraipatzen, bizi nahi duen jendea eta herri bat oroitarazten. Mila esker guztiagatik Manu Chao eta FM.
EHZ Zuzenean:
Martxa ta Borroka: -
sarea elkarrizketa da
#nickdutnik gogoeta xume bat
Merkatuak, sareak, hedabideak, etxea, sukaldeak elkarrizketak dira. Ez dago dudarik. Kafea ez dugu twitter bidez eskatzen, maitasuna agian ez da 140 karakterretan sartzen ahal, irudi guztiak ezin daitezke hitzez deskribatu eta ametsek ez bide dute lekurik bit artean.
Baina sarea elkarrizketa bilakatzen ari da. Erantzunak, iritziak, proposamenak, ideiak, kexuak, aldarriak, penak, eskaerak, salaketak… tokia dute gure elkarrizketa digitaletan. Gure erantzun eta mezuetan.
Mezu labur zein programa konprimituetan.
Bart, etb3ko Nickdutnik saioa tarteka ikusten egon denetakoa naiz neu ere. Parte hartzen zelanbait esateko, twitter bidez. Eta gure mezu laburrak, pantaila handian agertu dira, lurreko telebista digitalak aukera hori eman digu. etb3ko arduradunek onetsi dute proposamena eta #nickdutnik saioan zuzeneko mezuak pantailaratu ditugu, ordaindu barik eta nahiko libre.Aurrekariak gurean eta munduan
irratia.com emankizunean aspaldian baliatu ditugu twitter eta facebook, edota zuzeneko txat elkarrizketa web bidez… sortu ginen egunetik bertatik.
Greba orokorraren karietara, antolatu genuen telebista libre eta herritarrean, mezuak klikagarri zeuden Interneteko telebistaren pantailan.Orduan oso esperientzia interesgarria izan zen, duda barik. Asko ikasi genuen, eta telebista interaktiboago, partehartzaileago, libreago batekin hasi ginen pentsatzen. Gauzatzea posible zen, ezberdina, irekiagoa, libreagoa.
etb3 bide onena, digitala
Eta orain, telebista publikoak, hemengoak, bide hori hautatu du. Interesgarria da. Oso. Eta poztu egin gara, zergaitik ez esan. Eta parte hartu eta zoriondu egin ditugu. Bide berria erakusten duelako. Partehartzaileagoa, irekiagoa, sarekoagoa. Zelan adierazi bestela?
2009ko uztailaren 1eko gaueko esperientziaren berri damaigu Ruben Sanchez (lostin.tv / factoria cross media) ia zuzenean prestatutako bideo honetan. Idatzizko post bat ere.
<title> hack the debate </title>Â ekimen interesgarria
Twitter bidez jakin dugu, Current ekimeneko mediaktibistek antzeko zerbait plazaratu zutela AEBko hauteskundeetan. Beraz, bide berri eta interesgarria han bezala hemen ere. Hemen eta han, munduan alegia.
iturria: current.com -
DLRN entzuten gau ta egunez
Musika asko entzuten dudan arren, zenbaitetan denbora gehiago izatea gustatuko litzaidake. Albisteei, liburuei, blogei kasurik egin ez, eta bazkalorduan zein lan denboran musika aditzen egon.
Kontzertuetara joan, eta irratian kantuak pintxatu. Atsedenik gabe egongo nintzatekela ziurta dezaket. Ez naiz aspertu azken 25 urteotan, eta grinak jarraitzen du.
Aspaldian Euskal Herriko talde bereziak entzuten ditut. Bereziki motibatzen naute euskaldunak izan arren, kanpoan arrakasta itzela duten bi proiektuk: We are Standard eta Delorean.
Getxokoak lehenengokoak, blog honetan aipatuak eta bideoren bat jarrita ere banago. Delorean ere maiz izendatuko nituen. Zuzenean biak ikusitako naiz, baina barriro ikusteko arazorik ez. Oker ez banago WAS Heletan dira asteburuon, han be ikusi beharko.
DLRN ez oso aspaldi Bilbon ikusi nituen, ikusiak ditut EHZn ere, eta beste kontzerturen batean… lokal txikietan, handietan baino hobeto.
Baina zarauztarrak, entzuteko be badira. Dantza egiteko musika eta erremixak egiten iaioak dira, eta plazaratu duten azkena, entzuteko modukoa da.Ayrton Senna eta mixtape berezia
Berriki, Ayrton Senna izenburuko lana plazaratu dute. Sarean mixtape berezi bat plazaratu dute, musika eta bideoak jartzeko sortu duten blog berezian Desparrame.Hauek dira kantuok:
1. El Guincho “Kalise (Delorean Remix) – Short Edit†(Young Turks 2009)
2. Delorean “Deli – Short Edit†(Fool House)
3. Mystery Jets “Half In Love With Elizabeth (Delorean Remix)â€
4. The Teenagers “Love No (Delorean Remix)†(Xl)
5. Delorean “Big Dipper – Short Edit†(Fool House)
6. Delorean “Moonson – Short Edit†(Unreleased)
7. Lemonade “Big Weekend (Delorean Remix)†(True Phanter Sounds 2009)
8. Glasser “Glad†(Delorean Remix) (True Phanter Sounds 2009)
9. The Big Pink “Too Young To Love (Delorean Remix)†(Unreleased)
