Matthew Mullenweg da, 1984an jaiotako mutila. Berak sortu zuen blog honetan, eta munduko blog mordo batetan erabiltzen dugun software librea: wordpress. Datorren astean Sevillako Eventoblog topaketan egongo dela eta, bere berri izan dut.

Eta bere bloga irakurtzen hasi naiz. Esan dut: –kontxo! mutikoa dok eta! Interneten ohikoa da hori, gazte gazteak trebe trebe datoz. Eta gainontzekoak erabiltzaile bihurtzen gara. Eta pozik.

Horrelako gazteei esker, orain tresna asko daukagu eskura, sekulako tresnak gainera. Eta Interneten mundu hobe batekin amets egiten dugu, software librearen funtzionamenduak -eta ideologiak- mundua hobea eta askeagoa izan daitekela adierazten digu.

Matt eta beste garatzaile asko, software librea guztion eskura jartzen ari dira. Komunitateak sortzen dira gero, eta programok egokitu, lokalizatu, hobetu, frogatu eta bultzatzen dituzte gero. Eta sekulako dinamika positiboa sortzen du guzti horrek.

Nik, aurrerantzean pozik irakurriko dut Matthew Mullenweg adiskidearen bloga. WordPress tresna izugarri erabilterreza, potentea eta txukuna iruditzen zait. Etengabe garatzen ari da, eta euskaraz sortu den komunitatetxoa ere interesgarria iruditzen zait. Ari gara, eta halakoren batean guk ere elkartu beharko dugu. Gero eta erabiltzaile gehiago ari baikara lanean wordpress plataformarekin.

* Halako batean batuko bagina zer?
* wordpress tailer bat eta zalantza eta plugin workshopa zer moduz?

* Asko gara, batu gaitezen -lema komunista ematen du-

Datorren astean da burutzeko Leioako Arte Ederren fakultatatean (EHU UPV) Never mind the blogs topaketa. Ekimena interesgarria da. Blogen inguruan mintzatzeko topaketa bat, astegunez eta goizean. Unibertsitatera itzultzeko aitzakia. Eta gaiak ondo zehaztu dituztelakoan nago.

Ni joatekoa naiz, eta zu? Interesgarria iruditzen zait planteamendua eta antolaketa modua. Zabaltzen jarraituko dut.

Antolatzaileek inkesta hau pasatu dute mezuarekin batera. Horrek gutxi gora behera eztabaidaren funtsera eroango gaitu.

* Bi lerrotan zure bitakora, blog edo… deskribatu.

* Zergatik erabiltzen duzu blog bat? Zer ezberdintasunak daude beste medioekin?

* Zer nolako tresnak erabiltzen dituzu? Zergatik?

* Komunitate baten parte zarelakoan zaude? Bloggerren topaketaren batera joan al zara?

* Uste al duzu blogging delakoak edota erreminta digitalek jabetzeko, deszentralizatzeko, kontrainformazioa gauzatzeko eta ezaguera sortzeko aukera berriak irekitzen dituzten?

* Kopiatzen al duzu? Kopiatzen al dizute? Inporta zaizu? Copyleft ezagutzen al duzu?

* Eta blogen ondoren zer?

Ez gabiltza geldi. Beti ikasten da zeozer. Eta blogen inguruan, etengabe gauza berriak eta ezberdinak datoz gure artera. Batzuetan, trena azkarregi pasatzen dela iruditzen zaizu, eta mendi puntatik lasai begira geratzeko gogoa sartzen zaigu.

Bestetan aldiz, skate gainean aldapan behera goazela… aldaketon zurrunbiloan sartzeko gogoa sartzen zaizu. Dena da 2.0, dena dago aldagai… dena egitea posible da Interneten. Eta horretan ari gara.

Batzuetan aski duzu, txat batean, edo lagunen bat Gmail edo beste nonbaiten aurkitzea laguntzen hasteko.

Hizkuntzaren inguruko kezkak
WordPress darabilgunok apurka apurka komunitate bat osatzen dugu. Baita euskaraz ere. Gero eta blog gehiago aurkitzen ditugu software libre honekin egindakoak. Gero eta deigarriago eta eleganteagoak. Guk ordea, dakigun apurra bloga mantentzen baliatzen dugu. Blogak berez, lana eskatzen du. Zurea da, zuk mantendu behar duzu. Zuk egin behar dizkiozu aldaketok. Pluginak direla, themea dela, hizkuntzaren inguruko gorabeherak direla… eta ni egia esan, hor nabil herrenen. Kodea barrutik aldatzea ez da hain erraza, eta lagun batzuen laguntzarekin… apurka apurka gune osoa euskaratzen ari naiz. Baina, badiotsuet, informatikaria ez den batentzat, kodea aldatzea ez da hain fazila!

Irratia.com entzungai
Nobedade handiena hori da. Eskumako zutabean aspaldion Jabi Zabala eta biok Bilbo Hiria irratian egiten ditugun saioak entzungai dituzue. 6 urte badira irratia.com proiektuarekin abiatu ginela… eta egia esan, oraindik horrela jarraitzeko gogoa ez zaigu ahitu. Martitzenero elkartzen gara, sarean ikusitakoaz jarduteko. Irratsaioa egiteak lana ematen digu, baina eraberean Interneteko aktualitatean murgiltzeko aukera eskaintzen digu. Orain, blog honetatik ere entzun ditzakezue gure programak. Iruzkinak eta egiteko, hori bai, irrati bitakoran sartu beharko zarete. Zuen partehartzea zinez eskertzen dugu. Badakizue hori.

Aldaketak apurka apurka
Bitartean blogarekin jarraitu beharko dugu. Munduari so egiten, Euskal Herrian zirikatzen, literaturaz eta musikaz iritzia ematen, teknologia berrietan trebatzen… orain arte egin duguna. Eta apurka apurka aldaketak gehitzen guneari. Irudi eta itxura aldetik hor jarraitzen dugu, gorria eta beltza dira nagusi gurean. Gaien aldetik ere, hasierako antzera. Aukera teknikoak gehitu egin zaizkigu: audioak direla, bideoak direla, argazkiak direla… testuari denetarik gehitzeko aukera dugu egun. Eta hori ere baliatu egin behar da.

Blogek, sekulako arrakasta izan dute, munduan bezala gure inguruan ere. Horretaz jakitun gara, eta batzuetan bertigoa ere ematen du zenbait kontu idazteak. Blogak gero eta irakurriagoak dira, eta zinez eskertzen dizkizuet -zaretenak zaretela- ematen dizkidazuen erantzun eta kontseiluak. Batzuetan gorritzeraino lotsatzen da norbera, baina ze arraio, jarraitu egin beharko dugu.